Read Te Tusi Tapu I Te Gana Tuvalu Lomiga Lua 1 TUPU 17 Bible Online

1 TUPU 17 - Te Tusi Tapu I Te Gana Tuvalu Lomiga Lua bible

1 TUPU 17

¹ E isi se pelofeta e igoa ki a Elia mai te fa'kai o Tisepi i Kileata, ne fano o faipati ki te Tupu ko Aapo penei, “Ko fakailoa atu nei ne au i te igoa o te Aliki, te Atua ola o Isalaelu, tenei e tavini au ki ei, me ka se toe ai ne vaiua io me ne vai i se lua io me se tolu tausaga, ke oko eiloa ki te taimi e toe fai ei ne au ke isi ne vaiua.”

²Tena, ne fai mai ei te Aliki ki a Elia penei,

³“Tiaki te koga tenei, kae fano ki te saegala o muni i tafa o te vai o Kilita, i te feitu ki te saegala o te Iolitana

⁴A koe e inu i te vai tena, kae ko oti ne fakatonu ne au a manu eva ko oleva ke aumai sale ne latou au meakai.”

⁵Ne fakalogo Elia ki te fakatonuga a te Aliki, tena ne fano ei a ia o nofo i tafa o te vai o Kilita.

⁶E inu eiloa a ia i te vai tena, ka ko ana falaoa mo kano manu e aumai sale eiloa ne manu eva ko oleva i taeao mo afiafi takitasi.

⁷E seki leva foki, ko te vai eiloa tena ko masa pakupaku, me ko leva seki ai eiloa ne vaiua.

⁸Tena ne fai atu ei te Aliki ki a Elia penei,

⁹ “Fano nei ki te fa'kai o Salefata i tafa o Saitonu o nofo i ei. Ko oti ne fakatonu ne au te fafine ko mate tena avaga i kona ke fagai ne ia a koe.”

¹⁰Tena ne fano eiloa a Elia ki Salefata, kae i tena okoatuga ki te mataloa o te fa'kai ne matea ei ne ia te fafine ko mate tena avaga e tae fafie. Muna a Elia ki te fafine tena, “Fakamolemole aumai aka ne vai ke inu au.”

¹¹I te fanoga o te fafine o aumai ne vai, kae ne toe kalaga atu foki a Elia ki ei ke fakamolemole ke aumai foki ne mu falaoa.

¹²Ne tali atu te fafine tena penei, “Au e tauto atu i te igoa o tou Aliki ola, me e seai ne aku falaoa. E isi la ne mu falaoa mata a aku i loto i te pōla, mo ne mu sinu olive ei i loto i te tiā. Au ne vau o fai fafie i konei ke fano mo au ki toku fale, ke tunu ki ei a mu falaoa kona ma maua mo taku tama tagata. Kaati tena eiloa te 'toe 'kaiga a maua, ko 'nofo ei maua pela ke mate i te fia'kai.”

¹³Muna a Elia ki te fafine tena, “Sa manavase. Fano koe o fakatoka te meakai a koulua. Masaua o faite mai mua se tamā puta falaoa i lua falaoa kona, ka oti ko faite ei a mea a koulua kona e 'toe ma koulua mo tau tama.

¹⁴Me konei a muna a te Aliki, te Atua o Isalaelu: ‘A te falaoa i loto i te pōla tena ka se mafai o palele, pena foki te sinu olive tena i loto i te tiā, ke oko eiloa ki te aso tela e fakato ei ne au a te vaiua.’ ”

¹⁵Ne fano eiloa te fafine tena o fai te mea tela ne fai atu ne Elia, tena ne kai makona eiloa latou kona i aso e uke.

¹⁶E pela eiloa mo muna a te Aliki ki a Elia, a te falaoa i te pola mo te sinu olive i te tia e seki palele eiloa.

¹⁷I se taimi fakamuli, ne masaki malosi te tama tagata a te fafine tena, mate eiloa.

¹⁸Muna a te fafine tena ki a Elia, “Tagata o te Atua, ai a ko fai ei ne koe te mea tenei ki a au? A koe na ne vau fua ke masaua ne te Atua aku agasala, ko tamate ei taku tama tagata?”

¹⁹Muna a Elia penei, “Tuku mai te tamaliki ki a au.” Ne puke aka ne ia a te tamaliki mai lima o te fafine tena, ave ne ia ki luga i tena potu, fakatakato ei ne ia ki luga i te moega.

²⁰Tena ne 'talo ei a ia penei, “Te Aliki toku Atua, ai a ko fai ei ne koe a te mea tenei ki te fafine tenei? A ia ne alofa mai ki a au o tausi fakalei au, kae tenei ko oti ne tamate ne koe a tena tama tagata!”

²¹ Ne takato fakafaō a Elia i luga i te tamaliki e fakatolu taimi, kae talo, muna a ia, “Te Aliki toku Atua, fakaola aka te tamaliki tenei!”

²²Ne talia ne te Aliki te talo a Elia, tena, ko te tamaliki eiloa ko toe manava aka, te mea eiloa ko ola.

²³Ne puke ifo ne Elia te tamaliki ki lalo i tena matua, kae fai atu ki ei penei, “Kiloke, ko ola tau tama!”

²⁴Muna a te fafine tena penei, “Ko iloa nei ne au i a koe se pelofeta a te Atua, ka ko te Aliki e faipati mai sale e auala i a koe!”