Read Te Tusi Tapu I Te Gana Tuvalu Lomiga Lua 1 TUPU 18 Bible Online

1 TUPU 18 - Te Tusi Tapu I Te Gana Tuvalu Lomiga Lua bible

1 TUPU 18

¹I te tolu o tausaga o te seaiga o ne vai, ne faipati mai ei a te Aliki ki a Elia penei, “Fano o fakailoa atu ki te Tupu ko Aapo me ka faka'to ne au a te vaiua.”

²Tena, fano ei a Elia. A te oge vai i Samalia ko oko eiloa i te fai malosi,

³tena ne kalaga atu ei a Aapo ki a Opetaia, tela e tausi ne ia a te palesi. A Opetaia, ko ia eiloa ko fakamaoni o tapuaki sale ki te Aliki.

⁴I te taimi ne 'ta ei ne Iesepela a pelofeta a te Aliki, ka ko Opetaia ne puke ne ia e toko‐selau o faka'muni i loto i ana, i vaega e lua, e taki tinolima i te vaega e tasi. E fagai kae fainu foki eiloa ne ia.

⁵Muna a Aapo ki a Opetaia penei, 'vau ke olo taua o onoono[26] aka ki vaitafe foliki mo takele papa o vaitafe i te fenua, me e isi ne mouku e ola i ei mo fagai a solofanua mo miula. Kafai e isi ne mouku, kaati ko se 'tau ei o 'ta o'tou manu.”

⁶Ne fakatau olo laua ki kogā koga o te fenua ne loto laua ki ei, sua tino ki te sua feitu ka ko te sua tino ki te sua feitu.

⁷Ne fanatu Opetaia i tena auala, fetaui ei mo Elia. Ne lavea ne Opetaia a Elia, ifo atu a ia i ona mua kae fesili atu penei, “A koe na ko Elia eiloa?”

⁸Ne tali atu Elia, “Ao, au ko Elia eiloa. Fano nei o fai ki tou pule ko te tupu, i a au tenei e nofo i konei.”

⁹Ne tali atu Opetaia, “Se a taku mea ne fai, tenei ko fai ei ne koe a au ke tamate ne te Tupu ko Aapo?

¹⁰I te igoa o te Aliki ola, tou Atua, au e tauto me i a koe ne sala ne te tupu ki fenua katoa o te lalolagi. Kafai ko fakailoa mai ne takitaki o malo kesekese i a koe e galo i te lotou fenua, ka ko Aapo e manako eiloa ke tauto atu a takitaki o fenua taki‐tasi ki a ia i a koe e se nofo i olotou fenua.

¹¹Kae nei, ko manako koe ke fano au o fai ki te tupu i a koe tenei e nofo i konei.

¹²Kae fai la pefea manafai e ave koe ne te agaga o te Aliki ki se koga 'mao i te taimi e fano ei au mai i konei? Tena la, kafai e fai au ki a Aapo i a koe tenei e nofo i konei, kae vau nei, a koe e galo i konei, ko tamate ei ne ia a au. Masaua i a au nei se tino e masani sale o tapuaki mo te fakamaoni ki te Aliki talu mai taku folikiga.

¹³E seki logo koe i te tamatega ne Iesepela a pelofeta a te Aliki, kae ne faka'muni ne au e tokoselau pelofeta i ana, i vaega e lua, e taki tinolima i te vaega e tasi, kae fagai kae fainu foki ne au?

¹⁴Tela la, e fakatonu mai pefea koe ki a au ke fano au o fai ki te tupu i a koe tenei e nofo i konei? Kaati e iku au o tamate ne ia!”

¹⁵Ne tali atu Elia, “I te igoa o te Aliki Maluga tela e tavini au ki ei, au e tauto me ka fakaasi eiloa au ki te tupu i te aso nei.”

¹⁶Tena, ne fano ei a Opetaia ki te Tupu ko Aapo o fai ki ei, tena ne fanatu ei a Aapo o fakafetaui ki a Elia.

¹⁷I te laveaga ne Aapo a Elia, muna a ia penei, “Tena ei koe te tagata faka'tupu fakalavelave i luga i Isalaelu!”

¹⁸Ne tali atu a Elia, “Se ko au te tagata faka'tupu fakalavelave, ko koe mo tou tamana. A koe ko se fakalogo ki te fakatonuga a te Aliki, kae ko tapuaki atu ki fakatusa o Paala.

¹⁹Fakatonu atu ki tino Isalaelu katoa ke fakafetaui mai ki a au i te Mauga o Kalamelu. Fai atu ki pelofeta a Paala kola e faselau limasefulu, mo pelofeta a Asaila kola e faselau kola e kau i ei a te Tupu fafine ko Iesepela ke mai katoa.”

²⁰Tena, ne uga te fekau a Aapo ki tino Isalaelu katoa mo pelofeta a Paala ke maopoopo atu ki te Mauga o Kalamelu.

²¹Ne fanatu Elia ki te vaitino, muna a ia penei, “Ko afea e fai ei ne koutou se filifiliga tonu? Kafai te Aliki ko te Atua, tapuaki atu ki ei; kae kafai te Atua ko Paala, tapuaki atu ki ei.” Ka ko tino e se faipati eiloa.

²²Muna a Elia, “Ko au fua tokotasi nei te pelofeta a te Aliki e toe, kae e faselau limasefulu pelofeta a Paala.

²³Aumai se avā pulumakau; ko pelofeta a Paala ke puke ne latou te pulumakau e tasi o tamate, katikati kae tuku ki luga i fafie, kae ke se faka'ka se afi. Ka fai foki ne au pena te sua pulumakau.

²⁴Tena la, ko pelofeta a Paala ke talo ki te lotou atua ke faka'ka te taulaga a latou; au foki e talo ki te Aliki toku Atua ke faka'ka taku taulaga. Kafai e ka te taulaga a pelofeta a Paala, ko ia ko te Atua, kae kafai ko taku taulaga e ka, ko te Aliki ko te Atua.” Tena, ne ka'laga katoa ei a tino o fakaasi te lotou loto ma'lie.

²⁵Muna a Elia ki pelofeta a Paala, “Fakatoka mua te pulumakau a koutou i a koutou e tokouke. Sa faka'ka ne koutou se afi ki te otou taulaga, kae 'talo ki te otou atua ke faka'ka ne ia.”

²⁶Tena, ne puke mai ne latou te pulumakau a latou, katikati, kae tuku ki luga i te fata-fai-taulaga a latou, kae talo atu ki a Paala ke faka'ka te taulaga a latou. Ne ka'laga latou penei, “Paala, tali mai ki a matou!” Kae e sakasaka eiloa latou i tafa o te fata-fai-taulaga tena ne faite ne latou. Kae e seai eiloa se tali.

²⁷I te tutonu, ko Elia eiloa ko kamata o fakalili a pelofeta kona. Muna a ia, “Talo malosi! A Paala se atua eiloa! Se taumate kaati na koi fai sena miti, io me koi fano ki sena fekau, io me kaati ne fano ki se koga! Io me kaati nei e moe fua, kae e tau o fagu mua ne koutou!”

²⁸Tena ne talo malosi eiloa a pelofeta a Paala, kae katikati olotou foitino ki naifi mo sifi, e pela eiloa mo faigā tapuakiga a latou, tena ko sali valevale ei a toto mai olotou foitino.

²⁹Ne fai eiloa olotou tāga kona ke oko eiloa ki te fakaafiafi; kae seai eiloa se tali io me se mea ke lagona atu.

³⁰Tena, muna a Elia ki te vaitino, “Soloki mai ke pili mai koutou ki a au.” Tena ne maopoopo atu katoa eiloa i ona tafa. Ne toe fakafou aka ne ia a te fata-fai-taulaga a te Aliki tela ne masei.

³¹ Ne puke aka ne ia e sefululua fatu e takitasi i matakaiga takitasi o Isalaelu kola ne fakaigoa ki igoa o tama tagata a Iakopo, Iakopo ko te tagata ne fakaigoa ne te Aliki ki a Isalaelu.

³²Ne fakaaoga ne ia a fatu kona o toe fakafou ki ei a te fata-fai-taulaga e fai ei a tapuakiga ki te Aliki. Ne keli ne ia se lua i tafatafa o te fata-fai-taulaga, e tai maua eiloa se sefulufa o lita o vai e ofi i ei.

³³Ne tuku atu ne ia a fafie ki luga i te fata-fai-taulaga, selesele ne ia a te pulumakau kae tuku atu ki luga i fafie. Muna a ia, “Faka'fonu mai e fa tiā ki vai, kae ligi atu ki luga i fafie mo te taulaga.” Tena, ne fai eiloa ne latou,

³⁴kae ne toe fai atu a ia penei, “Toe tasi” — tena ne toe ligi foki ne latou a te fata-fai-taulaga ki vai. Ne toe fai atu foki a ia ke toe tasi, toe ligi foki ne latou a vai ki luga i fafie.

³⁵Ne sali ifo a vai kona mai te fata-fai-taulaga o sali ki loto i te lua.

³⁶I te itula fakaafiafi, ne fanatu ei te pelofeta ko Elia ki mua o te fata-fai-taulaga kae talo penei, “Te Aliki, te Atua o Apelaamo, Isaako, mo Iakopo, fai aka ke iloa i te aso nei i a koe ko te Atua o Isalaelu ka ko au ko tau tavini, kae ne fai ne au a te mea tenei e tusa mo tau fakatonuga.

³⁷Te Aliki, tali mai, ko te mea ke iloa ne tino konei i a koe ko te Atua, kae ke toe fakafoki mai ne koe a latou ki a koe i te aso nei.”[27]

³⁸Ne aumai ne te Aliki a te afi, tena ne sunu ei a te taulaga, mo fafie mo fatu, ne 'paku foki mo te laukele, masapakupaku foki ei te vai i te lua.

³⁹I te laveaga ne tino a te mea tena, ne ka'laga ei latou penei, “Te Aliki ko te Atua; te Aliki fua tokotasi ko te Atua!”

⁴⁰Ne fai te fakatonuga a Elia penei, “Puke mai a pelofeta a Paala, seai se pelofeta e fakasao!” Tena ne puke mai latou katoa ne te vaitino, 'taki atu ei latou ne Elia ki te vaitafe o Kisona, tena ne tamate ei ne latou a pelofeta kona.

⁴¹Muna a Elia ki te Tupu ko Aapo penei, “Na fano o kai. Ko lagona nei ne au te gulu o te vaiua lasi ko pili o oko mai.”

⁴² I te fanoga a Aapo o kai, ka ko Elia ne kake atu ki te ulu o te Mauga o Kalamelu. Ne punou ifo a Elia ki lalo,

⁴³kae fai atu ki tena tavini, “Fano o kilo pela ki te tai.” Ne fano te tavini kae foki mai, muna a ia, “E seai se mea e lavea ne au.” E fitu taimi ne fai sale Elia ki tena tavini ke fano o onoono ki te tai.

⁴⁴I te fitu o taimi, ne foki mai te tavini, ana muna, “Ne lavea ne au se kaumana foliki e pela eiloa me se lima o te tino i te lasi, kae e fanake mai i te kapakapālagi.” Ne fakatonu atu Elia ki tena tavini penei, “Fano ki te Tupu ko Aapo kae fai ki ei ke na sopo ki tena kaliota o foki ki tena fale i a ia ma maua ne te vaiua.”

⁴⁵I mu taimi eiloa kona, ko te lagi eiloa ko soko i kaumana uli, mo te matagi ko agiagi, ko te vaiua lasi eiloa ko tō ifo. Ne sopo Aapo ki luga i tena kaliota, foki atu eiloa ki Ieseleelu.

⁴⁶Ne oko mai te 'mana o te Aliki ki a Elia; ne faka'mau faka'lei ona gatu ki tena taugasulu kae tele atu i mua o Aapo ki Ieseleelu.