Read Te Tusi Tapu I Te Gana Tuvalu Lomiga Lua 1 TUPU 19 Bible Online

1 TUPU 19 - Te Tusi Tapu I Te Gana Tuvalu Lomiga Lua bible

1 TUPU 19

¹Ne fakamatala atu ne Aapo ki tena avaga ko Iesepela a mea katoa kola ne fai ne Elia, e pela mo te tamatēga ne ia o pelofeta a Paala.

²Ne uga te fekau a Iesepela ki a Elia penei: “A atua ke tamate ne latou a au i te taimi penei ma taeao manafai e se fai ne au ki a koe a te mea tena ne fai ne koe ki pelofeta a Paala.”

³Ne mataku Elia, tena ne sola ei ke ola a ia; ne puke ne ia tena tavini, olo ei ki Pelesepa i Iuta. Ne tuku ne ia a tena tavini i kona,

⁴ kae sasale atu a ia i te aso kātoa tena ki te vao. Ne manava a ia i kona, i lalo o te maluga o te lakau, kae ko manako fua ke na mate a ia. Ne talo a ia penei, “Te Aliki, au ko oko eiloa i te fita. Na ave keatea toku ola; kaati e sili manafai e na mate atu au!”

⁵Ne takato ifo a ia i lalo o te lakau, moe eiloa. E poi eiloa a ia i te agelu ko fakapatele atu ki a ia kae fai mai penei, “Ala mai o kai.”

⁶Ne kilo aka a ia ki ona tafa, matea ei ne ia te puta falaoa mo te tiā vai i tafa o tena ulu. Ne kai kae inu a ia, toe takato ifo foki ei ki lalo.

⁷Ne toe foki mai a te agelu a te Aliki ki a ia, toe 'fagu atu foki a ia i te fakalua o taimi, muna a te agelu, “Tu ki luga o kai, i a koe ka malaga ki se koga mao.”

⁸Ne tafuke aka Elia, kai kae inu, maua ei tena malosi e sasale ei a ia i aso e fasefulu ki Sinai, te mauga tapu.

⁹I kona, ne ulu ei a ia ki loto i te ana o moe i te po tena. I kona foki eiloa, ko te Aliki eiloa ko faipati atu ki a ia penei, “Elia, ne a au mea e fai i konei?”

¹⁰ Ne tali atu a Elia, “Te Aliki te Atua Malosi, au ne tavini sale atu faeloa ki a koe tokotasi. A tino Isalaelu nei ko oti ne ofa te feagaiga a latou ne fai mo koe. Ko oti ne ofa ne latou au fata-fai-taulaga kae tamate au pelofeta katoa. Ko au fua tenei koi toe, kae konei foki ko taumafai o tamate au!”

¹¹Muna a te Aliki ki a Elia penei, “Fano ki luga i te ulu o te mauga o tu mai i oku mua.” Ne fakasili aka te Aliki pela, fakaagi mai ei ne ia a te matagi malosi eiloa, tela ne malukuluku ei a kaupapa kae ma'tofa foki ei a koga maluga, ka ko te Aliki e se nofo i loto i te matagi. Ne gata te matagi, kae poko te mafuie; ka ko te Aliki e se nofo i loto i te mafuie tena.

¹²Ne gata te mafuie, kae 'ka mo te afi; ka ko te Aliki e se nofo i loto i te afi tena. Ne galo atu te afi tena, kae vau te leo pela me se leo o se tino e musumusu.

¹³I te lagonaga ne Elia a te leo tena, ne 'kofu ana mata ki tena gatu 'loa kae fano o tu i te mataloa o te ana. Ne faipati mai a te leo ki a ia penei, “Elia, ne a au mea e fai i konei?”

¹⁴Ne tali atu Elia penei, “Te Aliki te Atua Malosi, au ne tavini sale faeloa ki a koe tokotasi. Ka ko tino Isalaelu nei ko oti ne ofa te feagaiga a latou ne fai mo koe. Ko oti ne ofa ne latou au fata-fai-taulaga, kae tamate au pelofeta katoa. Ko au fua tenei koi toe, kae konei foki ko taumafai o tamate a au.”

¹⁵ Muna a te Aliki, “Foki nei ki te vao i tafa o Tamaseko, ko ulu atu ei koe ki loto i te fa'kai o faū a Hasaeli ke fai mo tupu o Sulia;

¹⁶ faū a Ieu te tama tagata a Nimesi ke fai mo tupu o Isalaelu, ka ko Elisaia te tama tagata a Safata mai i te fa'kai o Apelu Meola ke sui ne ia a koe o fai mo pelofeta.

¹⁷A tino kola e 'sao mai i lima o Hasaeli ke 'ta ne Ieu, ka ko tino kola e 'sao mai i lima o Ieu ka 'ta ne Elisaia.

¹⁸ Ka faka toe ne au e fitu afe tino i Isalaelu; ko tino eiloa kola e fakamaoni mai ki a au kae e seki ifo eiloa ki a Paala, io me ne sogi ki ana fakatusa.”

¹⁹Ne fano Elia, maua atu ei ne ia a Elisaia e galue o fakamalū mai tena laukele ki ana pulumakau; e sefulutasi vasoa pulumakau i ona mua, ka ko ia e galue i te vasoa pulumakau fakaoti. Ne ui aka te gatu loa o Elia, fakapei atu ei ne ia ki a Elisaia.

²⁰Ne tiaki ne Elisaia ana pulumakau, kae tele atu i tua o Elia, kae fai atu penei, “Faka'tali ke fano au o fakamavae ki toku tamana mo toku matua, ko vau ei au ke olo taua.” Ne tali atu Elia, “Ko 'lei, fano koe. A koe se taofi ne au!”[28]

²¹Ne fanatu Elisaia ki ana pulumakau kola ne galue mai i ei, tamate ne ia kae tunu ne ia. Ne fakaaoga foki eiloa ne ia a te lakau e sai ei a pulumakau mo fai te fafie. Ne tuku atu ne ia a 'kano ki tino, kola ne kai ki ei. Tena fano eiloa a ia o tautali i a Elia, o tavini ki a ia.