Read Te Tusi Tapu I Te Gana Tuvalu Lomiga Lua 1 TUPU 20 Bible Online

1 TUPU 20 - Te Tusi Tapu I Te Gana Tuvalu Lomiga Lua bible

1 TUPU 20

¹A te Tupu o Sulia ko Peniata ne fakamaopoopo ana kautau katoa o olo o taua ki te fa'kai o Samalia. Ne kau atu ki a ia a takitaki o malo e tolusefulu lua; ne o'mai mo olotou solofanua mo kaliota o kautasi mo Peniata o taumafai o puke a Samalia.

²Ne uga a avefekau a Peniata ki loto i te fa'kai, ke olo o fai ki te Tupu o Isalaelu ko Aapo penei, “A te Tupu ko Peniata e fai mai

³ke avatu otou aulo mo siliva, otou fafine, mo tama'liki ma'losi eiloa a koutou.”

⁴Ne tali atu Aapo, “Fai ki toku aliki, te Tupu ko Peniata, i a au ko loto ki ei; ko pule a ia i a au mo aku mea katoa.”

⁵Fakamuli ifo, ko toe o'mai a avefekau a Peniata ki a Aapo mo te sua fekau penei: “Au ne fekau atu ki a koe ke aumai katoa au siliva mo aulo, otou fafine mo otou tamaliki.

⁶Kae nei, ka uga atu ne au aku ofisa ke onoono faka'lei ki tou palesi, mo fale o au ofisa, kae ke puke mai katoa a mea e faka'tau ifo latou e tāua.[29] Ka oko atu latou i te taimi penei i te aso taeao.”

⁷Ne fakamaopoopo ne te Tupu ko Aapo a takitaki katoa o te fenua, kae fai atu ki a latou penei, “E lavea ne koutou i te tagata tenei e taumafai o fakaseaoga tatou. Ne uga mai tena fekau ke avatu aku avaga mo tamaliki, aku siliva mo aulo, kae ne talia ne au.”

⁸Ne tali atu a takitaki mo tino penei, “Sa saga ki ei; sa fakavaivai.”

⁹Ne tali atu a Aapo ki avefekau a Peniata penei, “Fai atu ki toku aliki te tupu i a au ne loto ki te fekau muamua, ka ko te taimi nei ko se talia ne au.” Ne 'foki atu a avefekau kona, se leva, toe 'foki mai foki mo te sua fekau

¹⁰mai i a Peniata penei: “Ka aumai ne au a taku kau ke tokouke ke ofa tou fa'kai, kae tali keatea a mea ne faka'masei ki olotou lima. Ke tamate au ne atua manafai e se fai ne au a te mea tena!”

¹¹Ne tali atu te Tupu ko Aapo, “Fai ki te Tupu ko Peniata i te tinā sotia tonu eiloa e fakamatamata fua manafai ko oti ne fai a te taua, kae e se mai mua.”

¹²Ne oko atu te tali a Aapo ki a Peniata i te taimi ne inu ei latou mo takitaki kola e kau mo ia i olotou faleie. Ne fakatonu atu a ia ki tena kau ke fakatoka o taua atu ki te fa'kai o Samalia, tena ne fakatulaga faka'lei ei olotou kau.

¹³I te vaitaimi tena, e isi se pelofeta ne fano ki a Aapo kae fai atu ki a ia penei, “A te Aliki ne fai mai ke sa mataku koe i te kautau lasi tena, me ka tuku mai ne ia ki a koe a te manumalo i a latou i te aso nei. Ka iloa ei ne koe me ko ia ko te Aliki tokotasi.”

¹⁴Ne fesili a Aapo penei, “Tefea te kautau e muamua o taua?” Ne tali mai te pelofeta, “A te Aliki ne fai mai, ko sotia tamataene kola e i lalo o pulega a kovana o kogā fenua e muamua o taua.” Ne fesili te tupu penei, “Ko oi e takitaki ne ia te kautau lasi?” Ne tali mai te pelofeta, “Ko koe.”

¹⁵Tena, ne fakamaopoopo ei ne te tupu a sotia tamataene kola e i lalo o pulega a kovana o kogā fenua, e tusa mo te luaselau tolusefulu lua te aofaki o latou. Ne fakamaopoopo foki ne ia te kautau katoa a Isalaelu, e tusa mo te fitu afe tagata.

¹⁶Ne kamata te taua atuga a latou konei i te tutonu, i te taimi ko kona faka eiloa i ei a Peniata mo te tinotolu mo te tokolua takitaki kola e kau mo ia i loto i olotou faleie.

¹⁷Ne mua a sotia tamataene. A tino kola ne uga atu ne Peniata ke olo o onoono ki te fili, ne o'mai o lipoti mai ki a ia me e isi se potukau tenei e vau mai i loto i Samalia.

¹⁸Ne fai te fakatonuga a Peniata penei, “Ke puke mai fakapagota, faitalia me ne o'mai o taua io me ne o'mai ki se 'lei.”

¹⁹A sotia tamataene ne kamata ne latou te taua, kae tao atu te kautau lasi a Isalaelu i olotou tua,

²⁰Kae ne 'ta eiloa ne latou a tino ne fe'paki latou. Ne 'tele te kau Sulia, kae afuli ne te kau Isalaelu; ne sopo Peniata i tena solofanua o sola keatea, fakatasi mo nisi o ana sotia i solofanua.

²¹Ne maua atu ne te kau a Aapo[30] a solofanua mo kaliota, tena takavale masei eiloa te kau Sulia.

²²Ne fanatu se pelofeta ki te Tupu ko Aapo, kae fai atu penei, “Toe foki o toe fakatoka faka'lei tau kautau, kae fakatoka faka'lei au fuafuaga, me i te tupu o Sulia e toe fai taua mai i te sua taimi.”

²³Ne fai atu a ofisa a Peniata ki a ia penei, “A atua o Isalaelu ne atua o mauga, tena te mea ne takavale ei tatou. Kafai e taua atu tatou ki ei i luga i laukele laugatasi, kae ka fakatakavale eiloa ne tatou.

²⁴Kiloke, ave keatea a te tinotolu mo te tokolua takitaki kona mai i olotou tulaga kae sui atu ki takitaki malalo ifo.

²⁵Ka oti, ko fakamaopoopo aka se kautau ke pela eiloa te lasi mo te kautau tela ne tiaki ne latou a koe; a solofanua mo kaliota ke pena foki eiloa i te uke. Ka taua atu tatou ki tino Isalaelu i koga laugatasi, kae ka fakatakavale eiloa ne tatou i te taimi nei.” Ne loto Peniata ki te faiga tena, tena ne tautali eiloa a ia ki ei.

²⁶I te tau o te muākiga i te sua tausaga, ne fakamaopoopo tena kautau, olo atu eiloa ki te fa'kai o Afeka o taua ki tino Isalaelu.

²⁷Ne fakamaopoopo te kautau a Isalaelu, fakatoka olotou mea tau, olo atu eiloa o manava i te koga e tasi, kae e nofo i potukau e lua, kae faka'saga eiloa ki te kau Sulia. A te kautau Isalaelu e pela fua me se avā muimuiga kouti, manafai e fakatusa ki te kautau lasi eiloa a Sulia, tela e salalau atu i te kogā koga tena.

²⁸E isi se pelofeta ne vau ki te Tupu ko Aapo kae fai atu ki a ia penei, “Konei a muna a te Aliki: ‘Ka avatu ne au ki a koe a te manumalo i te kautau lasi eiloa a Sulia, me ne olo o fai pela i a au se atua o koga malugaluga kae se se atua o koga lauga'tasi. Ka iloa ei ne koe i a au ko te Aliki.’ ”

²⁹I aso e fitu, ne fakatau 'nofo eiloa a te kau Sulia mo te kau Isalaelu i olotou koga, o fakatau fakasaga sua kau ki te sua kau. I te fitu o aso, ne kamata ei te taua a latou, kae ne 'ta ne te kau Isalaelu e tusa mo te selau afe tagata Sulia.

³⁰A tino e toe ne tele ki loto i te fa'kai o Afeka, kae maofa mo te pui o te fa'kai tao foki ei e tusa mo te luasefulu fitu afe. A Peniata ne sola foki ki loto i te fa'kai kae ne muni i te potu ki tua o te fale e tasi.

³¹Ne olo atu ana ofisa ki a ia kae fai atu penei, “A matou ne 'logo i tupu o Isalaelu ko latou eiloa ko a'lofa. Talia mai ke olo matou ki te tupu o Isalaelu, ke 'pei matou ki lautaga kae fusi omotou ua ki lopu, se taumate ka fakasao ne ia koe.”

³²Tena, ne 'sulu ei latou ki lautaga kae saisai a lopu i olotou ua, kae olo atu ki a Aapo o fai ki ei penei, “A tau tavini ko Peniata ko fakamolemole mai ke fakasao a ia.” Ne tali atu a Aapo, “A ia na e ola? Ko oko eiloa i te lei! A ia e pela me se taina ki a au!”

³³A ofisa kona a Peniata ne kilokilo ki se fakailoga e iloa ei ne laua me ko Aapo e ita io me ikai. Tena la, i te takuatuga ne Aapo a te muna penei, “taina,” te mea eiloa ko fai atu a ofisa kona a Peniata penei, “E pena eiloa mo au muna, a Peniata ko tou taina eiloa!” Ne fakatonu atu a Aapo penei, “Aumai Peniata ki a au.” I te okomaiga o Peniata, ne fai atu a Aapo ki ei ke sopo atu ki luga i te kaliota i ona tafa.

³⁴Muna a Peniata ki a Aapo penei, “Ka faka'foki atu ne au ki a koe a fa'kai kola ne puke ne toku tamana mai i tou tamana, kae e mafai foki ne koe o fakatu ne koga fai mea togi ma koe i Tamaseko, e pela mo mea ne fai ne toku tamana i Samalia.” Ne tali atu Aapo, “I te feitu tena, ko fakasaoloto ei ne au a koe.” Ne fai te feagaiga a laua, tena tuku atu ei ne ia ke fano.

³⁵E isi se pelofeta mai se potukau pelofeta ne fakatonu ne te Aliki ke fakatonu atu ki te isi pelofeta ke kati a ia ki tena pelu. Ne seki fai ne te pelofeta a te mea tena,

³⁶ tena ne fai atu ei a ia ki ei penei, “A koe ka tamate ne se leona i te taimi e fanatu ei koe i konei, me i a koe ne teke ki te fakatonuga a te Aliki.” Tena, i te taimi ne fano ei a te pelofeta tena, ko te leona eiloa ko vau, tamate ei a ia tena.

³⁷Ne fanatu te pelofeta tena ki te sua tagata, kae fai atu penei, “Kati mai au ki tau pelu!” Ne kati a ia ne te tagata tela, tena ne pakia ei a ia.

³⁸Ne fusi ne te pelofeta ona mata ki se laugatu ke se matea ona foliga, fano ei o tu i tafa o te auala, o fakatali ke fakasili aka te tupu o Isalaelu.

³⁹I te fakasiliga o te tupu i ona tafa, ne kalaga atu te pelofeta ki ei, kae fai atu penei, “Tou malu, au ne tau i te taua, kae vau te sotia e tokotasi mo te pagota kae fai mai ki a au penei, ‘Tausi te tagata tena; kafai e sao keatea mai i a koe, ka togi ne koe ki tou ola, io me e togi mai ne koe e tolu afe tupe siliva.’

⁴⁰Ne saga au o fai a nisi mea, tena sola ei te pagota.” Ne tali mai te tupu, “A tau sala tena eiloa ko taku mai ne koe, tela la, e tau eiloa o togi ne koe tau sala.”

⁴¹Ne 'sae aka ne te pelofeta a te laugatu tela e fusi i ona mata, tena, kae fatoa lavea mai a ia ne te tupu, i a ia se pelofeta.

⁴²Muna a te pelofeta ki te tupu penei, “Tenei te fekau a te Aliki: ‘A koe ka mate, me ne talia ne koe ke fakasao a te tagata ne fakatonu atu ne au ke tamate. A tau kautau ka fakatakavale me tuku ne latou ke 'sao a te kautau a te fili.’ ”

⁴³Ne foki atu te tupu ki Samalia mo te fanoanoa lasi.