Read Te Tusi Tapu I Te Gana Tuvalu Lomiga Lua 1 TUPU 21 Bible Online

1 TUPU 21 - Te Tusi Tapu I Te Gana Tuvalu Lomiga Lua bible

1 TUPU 21

¹E isi se togā vine a te tagata e igoa ki a Napota e tu i tafa o te palesi o te Tupu ko Aapo i Ieseleelu.

²I te aso e tasi, ne fai atu Aapo ki a Napota penei, “Tuku mai mo oku tou togā vine me e pili mai ki toku palesi, i a au e manako o fakaaoga te laukele mo fai taku fatoaga lakau kaina. Kae ka sui atu ne au ki se togā vine e 'lei atu, io me e togi tupe atu ne au manafai e manako koe ke togi tupe.”

³Ne tali atu Napota, “A te togā vine tenei se togā vine eiloa mai oku tupuga. E se mafai ne au o avatu ki a koe!”

⁴Ne foki atu a Aapo ki tena fale mo te fanoanoa kae kaitaua i muna a Napota ne fai atu ki a ia. Ne takato a ia i tena moega, o fakasaga ki te 'pui, kae e se kai eiloa.

⁵Ne fanatu tena avaga ko Iesepela ki a ia kae fesili atu penei, “Ai a e fanoanoa ei koe? Ai a e se kai ei koe?”

⁶Ne tali mai a ia penei, “Au e fanoanoa i pati a Napota ki a au. Au ne fai ki ei ke togi ne au tena togā vine, io me sui atu ne au ki se isi togā vine, manafai e manako a ia ke sui kae ne fai mai me e se mafai o aumai ne ia te togā vine ki a au!”

⁷Ne tali atu a Iesepela, “A koe na ko te tupu me ikai? Tu mai ki luga o kai, kae matafiafia. Ka sala ne au se auala e maua ei ne koe te togā vine a Napota!”

⁸Ne tusi ne Iesepela ana tusi kae saina ki te igoa o Aapo, fakamau atu foki mo tena fakailoga ki tusi, kae ave ne ia ki ana ofisa mo tino ma'luga i te fa'kai o Ieseleelu.

⁹E penei a muna o tusi kona: “Valo atu ke maopoopo a tino i se aso e tasi o fakaliki'liki, kae fakanofo Napota i se nofoaga maluga.

¹⁰Sala aka se tokolua ma'sei ke olo o ka'laga i ona mua i a ia ne muna masei ki te Atua mo te tupu. Tena ko ave ei a ia ki tua o te fa'kai o peipei ki fatu ke mate.”

¹¹Tena ne fai eiloa ne ofisa mo tino ma'luga o te fa'kai o Ieseleelu a te fakatonuga a Iesepela.

¹²Ne fakamaopoopo ne latou a tino ke fakaliki'liki i se aso e tasi, kae fakanofo ne latou a Napota i se nofoaga maluga.

¹³Ne o'mai te tokolua ma'sei kae lou ne laua i mata o tino, i a Napota ne pati masei ki te Atua mo te tupu, tena ne ave ei a ia ki tua o te fa'kai o peipei ki fatu ke mate.

¹⁴Ne avatu te fekau ki a Iesepela penei: “A Napota ko oti ne tamate.”

¹⁵I te mauaga ne Iesepela a te fekau tena, ne fai atu ei a ia ki a Aapo penei, “A Napota ko mate. Na fano la o puke ma koe a te togā vine a Napota tena ne ita ke 'togi mai ki a koe.”

¹⁶Tena, ko Aapo eiloa ko fano ki te togā vine ke puke mo ia.

¹⁷Tena, muna a te Aliki ki a Elia, te pelofeta mai i Tisepi penei,

¹⁸“Fano ki a Aapo, te tupu o Samalia. Ka maua atu ne koe i te togā vine a Napota, tena ka puke ne ia mo ia.

¹⁹Fai atu ki a ia a muna konei a te Aliki, ‘Ko oti ne tamate ne koe a te tagata tena, kae puke foki ne koe a tena togā vine?’ Fai ki ei aku muna konei: ‘I te koga eiloa tela ne sepo ei ne kuli a te toto o Napota, ko te koga foki tena e sepo ei ne latou a tou toto!’ ”

²⁰I te laveaga ne Aapo a Elia, ana muna, “Toku fili, e a, ko maua ne koe a au?” Ne tali atu a Elia, “Ao, ko maua ne au. A tou olaga ko tuku katoatoa atu eiloa ki te fai o mea se lei i mua o te Aliki.

²¹Tela la, a te Aliki ko fai mai nei ki a koe penei, ‘Ka aumai ne au te puapuaga ki a koe. Ka tamate ne au a koe, pela foki mo tagata katoa i tou kaiga, mai tino foliki ke oko ki tino matua.

²²A tou kaiga ka fai pela mo te kaiga o te Tupu ko Ielopoamo te tama a Nepata, pela foki mo te kaiga o te Tupu ko Paasa, te tama tagata a Aita, me ne fakaoso ne koe toku kaitaua i te takiga ne koe o tino Isalaelu ki te agasala.’

²³Ka ko Iesepela, muna a te Aliki, i tena foitino ka kai ne kuli i te fa'kai o Ieseleelu.

²⁴A tino i tou kaiga kola e mate i loto i te fa'kai ka kai ne kuli, ka ko tino e mate i tua o te fa'kai ka kai ne manu eva ko valatua.”

²⁵E seai eiloa se tino ne tuku katoatoa tena olaga o fai mea ma'sei i mua o te Aliki e penei mo Aapo — ne pogai katoa i te fakaosoosoga a tena avaga ko Iesepela.

²⁶Ne fai ne ia a agasala ma'sei katoa, i te tapuaki atu o ia ki tupua, e pela mo tino Amoli, kola ne afuli keatea ne te Aliki i te o'maiga o te fenua o Isalaelu.

²⁷I te otiga o Elia ne faipati, ne puke ifo Aapo o saesae ona gatu, tapale keatea ne ia, kae pei ki lautaga. Ne ita ma kai, ne moe mo ona gatu lautaga, kae ko fano sale fua mo te fanoanoa.

²⁸Muna a te Aliki ki te pelofeta ko Elia penei,

²⁹“E lavea ne koe i a Aapo ko oko eiloa i te salamō i oku mua? Ka se aumai ne au te malaia ki a ia i aso o tena olaga, me ne salamō eiloa a ia; kae ka oko mai i aso o tena tama tagata.”