Read Te Tusi Tapu I Te Gana Tuvalu Lomiga Lua 2 TUPU 1 Bible Online

2 TUPU 1 - Te Tusi Tapu I Te Gana Tuvalu Lomiga Lua bible

2 TUPU 1

¹I te mate atuga o te Tupu o Isalaelu ko Aapo, ko te fenua eiloa o Moapi ko teke atu ki te malo o Isalaelu.

²A te Tupu o Isalaelu ko Asaia ne to mai i luga i te fakaosoga o te tuafale o tena palesi i Samalia, kae ne pakia malosi eiloa. Ne uga ne ia a ana avefekau ke olo ki te atua ko Palasepupa, te atua o Ekelona te fa'kai o Filisitia, ke sili ki ei me ko ia e fano o 'lei me ikai.

³Ka ko te agelu a te Aliki ne fakatonu atu ki a Elia, te pelofeta mai Tisepi, ke fano o fakafetaui ki avefekau a te Tupu ko Asaia kae ke sili ki ei penei, “Ai a e olo ei koutou ki te atua o Ekelona ko Palasepupa? A koutou e mafaufau pela me e seai se Atua o Isalaelu?

⁴Fai ki te tupu i te Aliki ne fai atu penei, ‘A koe ka se 'lei mai i tou pakiaga? A koe e mate eiloa!”’ Ne fai eiloa ne Elia a te fakatonuga a te Aliki,

⁵tena ne foki atu ei a avefekau kona ki te tupu. Ne fesili mai a te tupu penei, “Ai a ko 'foki mai ei koutou?”

⁶Ne tali mai latou penei, “E isi se tagata ne fetaui matou, kae fai mai i te Aliki ne fai mai ki a koe penei, ‘Ai a e uga ei au avefekau ke olo ki a Palasepupa, te atua o Ekelona? A koe e mafaufau pela me e seai se Atua i Isalaelu? A koe e se gasolo o lei, a koe e mate eiloa!”’

⁷Ne fesili atu te tupu penei, “E pefea a foliga o te tagata tena?”

⁸ Ne tali mai latou penei, “A te tagata tena e pei ki te gatu loa ne faite ki pakili o manu kae fai tena fusi[1] ki te fusi ne faite foki ki pakili manu.” Muna a te tupu, “Te tagata tena ko Elia!”

⁹Tena, ne uga atu ei ne te Tupu tena ofisa e tokotasi mo te tinolima tagata ke olo o puke mai a Elia. Ne maua atu ne te ofisa tena a Elia e sagasaga mai i luga i te koga maluga, tena ne fai atu a ia ki a Elia penei, “Te tagata o te Atua, a te tupu ko fakatonu mai ki a koe ke vau koe ki lalo.”

¹⁰ Ne tali mai a Elia, “Kafai au se tagata o te Atua, a te afi ke fanaifo mai te lagi ke 'mate ei koutou mo tau kau!” Tena, ko te afi eiloa ko fanaifo, mate ei a te ofisa tena mo tena kau.

¹¹Ne toe uga atu ne te tupu tena sua ofisa mo te sua tinolima tagata ke olo ki a Elia. Ne olo atu latou kona,[2] kae fai atu ki a Elia penei, “Te tagata o te Atua, a te tupu ko fakatonu mai ke vave ifo koe ki lalo!”

¹²Ne tali atu a Elia, “Kafai au se tagata o te Atua, a te afi ke fanaifo mai te lagi ke 'mate ei koutou mo tau kau!” Tena, ko te afi eiloa ko fanaifo, 'mate ei a te ofisa tena mo tena kau.

¹³Ne toe uga atu foki ne te tupu tena sua ofisa mo te tino lima tagata. Ne fanatu te ofisa tena ki luga i te koga maluga tena, totuli ki lalo i mua o Elia, kae fakamolemole atu ki ei, muna a ia, “Te tagata o te Atua, alofa mai ki a au mo taku kau. Sa tamategina matou!

¹⁴A te ava ofisa kola muamua ne 'mate i te afi mai i te lagi; kae fakamolemole, koe ke alofa mai eiloa ki a au!”

¹⁵Ne fai atu te agelu a te Aliki ki a Elia penei, “Olo mo te ofisa tena ki lalo, kae sa mataku.” Tena ne tautali atu ei a Elia i te ofisa tena ki te tupu

¹⁶kae fai atu a Elia ki te tupu penei, “Tenei te fekau a te Aliki ki a koe: ‘A koe e se gasolo o lei mai i tou pakiaga, a koe e mate eiloa, me i a koe ne uga au avefekau ke olo o fakafesili ki te atua o Ekelona ko Palasepupa, e pela eiloa me e seai se Atua o Isalaelu e tau o fano koe ki ei!”’

¹⁷Tena, ne mate eiloa a Asaia, e pela eiloa mo muna a te Aliki ki a Elia. A Asaia e seai ne ana tama tagata, tela la, ne sui a ia ne tena taina ko Iolamo o fai mo tupu, i te lua o tausaga o te nofoaiga a Ieolamo, te tama tagata a Iosefatu, te tupu o Iuta.

¹⁸A nisi tala e uiga ki te Tupu ko Asaia e fakamau katoa i te tusi o Te Tala Tukufakasolo o Tupu o Isalaelu.