Read Te Tusi Tapu I Te Gana Tuvalu Lomiga Lua 2 TUPU 12 Bible Online

2 TUPU 12 - Te Tusi Tapu I Te Gana Tuvalu Lomiga Lua bible

2 TUPU 12

¹I te fitu o tausaga o te nofoaiga a Ieu, te tupu o Isalaelu, kae sopo a Ioasa o fai mo tupu o Iuta, kae ne tupu a ia i Ielusalema i tausaga e fasefulu. A tena matua, ko Sipea, mai i te fa'kai o Pelesepa.

²A Ioasa ne fakafiafia ne ia a te Aliki i tena olaga katoa, me i a ia e akoako sale ne te faitaulaga ko Ieoiata.

³E ui eiloa i te feitu tena, a koga tapuaki fapaupau e seki ofa, ka ko tino koi olo eiloa o ofo olotou taulaga kae sunu mea manogi i koga kona.

⁴ Ne fakamaopoopo ne Ioasa a faitaulaga kae fakatonu ki ei ke teu faka'lei aka a tupe kola e maua sale mai taulaga i te Faletapu, ko tupe i taulaga fai sale, mo tupe e maua i te loto malie.

⁵A faitaulaga taki tokotasi ke onoono fakalei ki tupe e avatu ki a latou ne tino kola ne tautua latou ki ei. A te tupe e fakaaoga mo faite a mea o te Faletapu kola ko ma'sei.

⁶I te luasefulu tolu o tausaga o te nofoaiga a Ioasa, kae e seki ai eiloa se galuega kai fai ne faitaulaga ki mea kola e tau o toe faite o te Faletapu.

⁷Tena ne kalaga atu ei a ia ki a Ieoiata mo nisi faitaulaga kae sili atu ki a latou penei, “Ai a e se fai ei ne koutou a mea kola e tau o fakafou o te Faletapu? Mai i te taimi tenei, ka se toe tausi ne koutou a te tupe e maua ne koutou; e tau o aumai ne koutou, ko te mea ke na fai te galuega.”

⁸Ne loto a faitaulaga ki te mea tena, kae ne loto foki ke se fai a mea e tau o faka'fou o te faletapu.

⁹Ne puke mai ne Ieoiata se pokisi, fakapu aka ne ia se pu i te pono, kae tuku atu te pokisi tena i tafa o te fata-fai-taulaga, i te feitu fakaatamai, i te koga e ulu mai ei a tino. A faitaulaga kola e galue i te mataloa e tuku ne latou ki loto i te pokisi, a tupe katoa kola e aumai ne tino tapuaki.

¹⁰Kafai ko uke eiloa a tupe i loto i te pokisi, ko o'mai ei a te failautusi a te tupu mo te Faitaulaga Pule o sunu ke vaivai a siliva, ko fua ei.[13]

¹¹Kafai ko oti ne lau te aofaki tonu, ko tuku atu ei ne laua a te siliva ki tagata kola e pulepule i te faiga o te galuega i te Faletapu. A te tupe tena e togi ei a kamuta, tino faite fale,

¹²tino galue i fatu, mo tino katikati fatu; e togi foki ei a laupapa mo fatu kola e fakaaoga mō te galuega; e togi foki ki ei a nisi mea kola e manakogia mō te galuega.

¹³E seai eiloa se tupe o tupe kona e fakaoga mō te faitega o ipu siliva, pola siliva, pu siliva io me ko mea o moli, io me so se mea ne faite ki siliva mo aulo.

¹⁴A te tupe tena e fakaoga katoa mo togi a tino galue, mo mea e fai ei te galuega.

¹⁵ A tino kola e pule'pule i te faiga o te galuega, ko latou eiloa ko fakamaoni, tela la, e se ti fai sale ki ei ke lau aka a te mea ko oti ne fakamaumau ne latou.

¹⁶ A tupe e maua i taulaga o te toe togiga o te agasala mo te taulaga mō agasala, e se faulu ki te pokisi, me e puke ma faitaulaga.

¹⁷I te taimi tena, a te Tupu o Sulia ko Hasaeli ne taua atu ki te fa'kai o Kata, fakatakavale eiloa ne ia; kae ko mafaufau nei a ia o taua atu ki Ielusalema.

¹⁸Ne puke mai ne te Tupu o Iuta ko Ioasa, a taulaga katoa a tupu kola ko galo atu; ko Iosefatu, ko Ieolamo, ko Asaia, kola ko oti ne fakatapu mō te Aliki, fakatasi ki ei mo ana taulaga mo te aulo katoa i loto i potu teu koloa o te Faletapu mo te palesi, ave katoa ne ia ke fai mo meaalofa ki te Tupu ko Hasaeli. Tena, ne foki atu ei a Hasaeli mo tena kautau mai Ielusalema.

¹⁹A nisi tala e uiga ki te Tupu ko Ioasa e fakamau i te tusi o Te Tala Tuku Fakasolo o Tupu o Iuta.

²⁰A te Tupu ko Ioasa ne alamati o ta ne ana ofisa. Ko Iosaka te tama tagata a Simeata mo Ieosepata, te tama tagata a Someli, ne tamate ne laua a Ioasa i te fale tela ne faite i luga i te laukele tela ne tanu ke laugatasi, i te feitu ki te saegala o Ielusalema, i te auala tela e fanaifo ki Sila. A Ioasa ne tanu i te tanuga o tupu i te Fa'kai o Tavita, kae ne sui a ia ne tena tama tagata ko Amasia o fai mo tupu.