Read Te Tusi Tapu I Te Gana Tuvalu Lomiga Lua 2 TUPU 17 Bible Online

2 TUPU 17 - Te Tusi Tapu I Te Gana Tuvalu Lomiga Lua bible

2 TUPU 17

¹I te sefululua o tausaga o te nofoaiga a Aasa i Iuta, ne fai ei a Hosia te tama tagata a Ela mo tupu o Isalaelu, kae ne tupu a ia i Samalia i tausaga e iva.

²Ne agasala a ia ki te Aliki, kae e tai lei atu a ia i lo tupu kola ne pulepule ne latou Isalaelu i mua o ia.

³A te Tupu o Asulia ko Salamanesa ne faitaua ki a ia; ne takavale Hosia i a Salamanesa, tena ne togi lafoga sale a ia ki a Salamanesa i tausaga takitasi.

⁴I te tausaga e tasi, ne uga a avefekau a Hosia ki a So, te tupu o Aikupito, o fakamolemole ki ei ke fesoasoani atu ki a ia, tena kae fakagata foki ei tena togi lafoga ki Asulia. I te logoga o Salamanesa i te faiga tena, tena ne puke ei ne ia a Hosia o sai i te falepuipui.

⁵Tena, ne fanatu Salamanesa o taua ki Isalaelu, kae nikoi ne ia Samalia. I te tolu o tausaga mai te taimi ne taumafai ei te tupu o Asulia o puke Samalia,

⁶ko te iva o tausaga tena o te nofoaiga a Hosia, [22] ne fakatakavale ei ne ia a te fa'kai o Samalia, kae ave fakapagota ne ia a tino Isalaelu ki Asulia, kae tuku atu ne ia a nisi o latou ke nofo i te fa'kai o Hala, nisi ke nofo i tafa o te Vaitafe o Hapola i te kogā fenua o Kosana, ka ko nisi i fa'kai o Metai.

⁷A Samalia ne takavale me i tino Isalaelu ne agasala ki te Aliki te lotou Atua, tela ne fakasao ne ia latou mai te tupu o Aikupito, kae taki atu foki latou keatea mai Aikupito.

⁸Ne tapuaki latou ki atua fakaatea, kae tau'tali i tu a tino kola ne afuli ne te Aliki keatea mai te fenua i te taimi ne o'mai ei tena fenua o nofo i ei. Ne fakaakoako foki latou ki amioga fou ne aumai ne tupu o Isalaelu.

⁹A tino Isalaelu ne fai ne latou a mea kola e se fiafia ki ei te Aliki te lotou Atua. Ne faite ne latou a koga tapuaki fapaupau i olotou fa'kai katoa, mai fa'kai foliki ke oko eiloa ki fa'kai lasi.

¹⁰ I luga i koga ma'luga katoa mo lalo o malūga o lakau, ne faka'tu ne latou i ei a tupua fatu mo fakatusa o te atua fafine ko Asaila,

¹¹kae e sunu mea manogi latou i luga i fata-fai-taulaga fapaupau katoa, me e tautali i faiga a tino kola ne afuli keatea ne te Aliki mai i te fenua. Ne fakaoso ne latou te kaitaua o te Aliki i olotou amioga ma'sei katoa,

¹²kae se faka'logo ki te fakatonuga a te Aliki ke se ifo ki tupua.

¹³A te Aliki ne uga ana avefekau mo pelofeta ke folafola atu ki Isalaelu mo Iuta penei: “Tiakina otou amioga ma'sei kae faka'logo mai ki aku fakatonuga kola e tu i loto i te tusi o Tulafono tela ne tuku ne au ki otou tupuga, tenei foki eiloa ne fakaoko mai ki a koutou ne aku tavini ko pelofeta.”

¹⁴Kae ne seki faka'logo eiloa latou; ne loto ma'keke eiloa latou e pela mo olotou tupuga kola e seki fakatuaga ki te Aliki te lotou Atua.

¹⁵Ne 'teke ne latou ana fakatonuga, ne seki tausi ne latou te feagaiga ne fai ne ia mo olotou tupuga, kae ne seki saga foki ki muna akoako kola e folafola mai ne pelofeta. Ne tapuaki latou ki tupua e seai ne aoga, tela la, ko seai foki ne olotou aoga. Ne tau'tali latou i amioga a malo i olotou tafatafa, kae se faka'logo ki te fakatonuga a te Aliki ke sa fakaakoako latou ki amioga a tino pena.

¹⁶ Ne ofa ne latou a tulafono katoa a te Aliki te lotou Atua kae faite aka ne latou ne pulumakau fiti e lua o tapuaki sale ki ei; ne faite foki ne latou se fakatusa o te atua fafine ko Asaila, e tapuaki foki latou ki fetu, kae tavini foki ki te atua ko Paala.

¹⁷ E 'ta ne latou olotou tama tagata mo tama fafine o fai mo taulaga sunu ki atua fapaupau; e talitonu latou ki tino fakataulaitu mo tino poto i fakamatala o mea tupu i aso fakamuli, kae olaga faeloa latou i te fai o mea se 'lei i mua o te Aliki, tena ko fakaoso ei ne latou te kaitaua o te Aliki.

¹⁸Ne kaitaua te Aliki ki tino Isalaelu, tena ne ave keatea ei ne ia latou mai ona mua, kae faka'toe mai fua ne ia te malo o Iuta.

¹⁹A tino foki o Iuta e se faka'logo foki ki tulafono a te Aliki te lotou Atua; e fakaakoako foki latou ki amioga kola ne tauloto mai ne tino Isalaelu mai nisi fenua fapaupau.

²⁰Ne seki fiafia te Aliki ki tino Isalaelu katoa, ne fakasala ne ia latou, kae tuku atu ne ia latou ke fakapologa ne olotou fili amio ma'sei ke oko eiloa ki te taimi ne fulu faka'ma ei ne ia latou mai ona mua.

²¹I te taimi ne vae ei ne te Aliki a te malo o Isalaelu mai i Iuta, kae ne fai ei ne tino Isalaelu a Ielopoamo te tama tagata a Nepata, ke fai mo tupu o latou. Ne fai ne Ielopoamo a tino Isalaelu ke ma'fuli keatea mai i te Aliki, kae taki atu foki ne ia latou ke fai agasala ma'sei katoa.

²²Ne tau'tali latou i a Ielopoamo, kae tumau faeloa te fai ne latou o agasala kola e fai sale ne ia,

²³ke oko eiloa ki te taimi ne ave keatea ei latou ne te Aliki mai ona mua, e pela eiloa mo ana muna ki ana tavini ko pelofeta me e fakataunu eiloa ne ia. Tena, ne ave fakapagota ei a tino Isalaelu ki Asulia, kae konei koi nofo mai eiloa i ei.

²⁴Ne aumai ne te tupu o Asulia a tino mai fa'kai o Papelonia, Kuta, Iva, Hamata, mo Sefavaima, kae tuku ne ia ke nofo i fa'kai o Samalia,[23] o sui a tino Isalaelu kola ne ave fakapagota. Ne puke mo latou a fa'kai kona, nofo eiloa i ei.

²⁵I te kamataga o nofo a tino kona i fa'kai o Samalia, ne seki tapuaki latou ki te Aliki, tena ne uga mai ei ne te Aliki a leona kola ne 'ta ne latou a nisi o tino kona.

²⁶Ne oko atu te fakailoaga ki te tupu o Asulia me i tino kola ne tuku ne ia ke nofo i fa'kai o Samalia, e se iloa ne latou a tulafono a te atua o te fenua tena, tena la, ne uga mai ne te Atua a leona ke 'ta a tino kona e nofo i fa'kai kona.

²⁷Tena ne fai atu ei a te fakatonuga a te tupu penei: “Fakafoki atu se faitaulaga mai faitaulaga kola ne ave fakapagota ne tatou,[24] ke fano o nofo i kona, ke akoako ne ia a tino i kona ki tulafono a te atua o te fenua tena.”

²⁸Tena la, ne fano ei te faitaulaga e tokotasi, tela ne puke fakapagota mai i Samalia, o nofo i Peteli kae akoako ne ia a tino ke tapuaki atu ki te Aliki.

²⁹Ka ko tino kola ne nofo i Samalia ne tumau faeloa o faite olotou tupua, kae tuku ne latou ki koga tapuaki kola ne faite ne te kau Isalaelu. A potukau takitasi e fakatau faite eiloa olotou tupua i fa'kai e nofo ei latou:

³⁰a tino Papelonia e faite ne latou a tupua o te atua ko Sukota Penota; a tino Kuta e faite ne latou a tupua o te atua ko Nelekala; a tino o Hamata e faite ne latou a tupua o te atua ko Asima;

³¹a tino Iva e faite ne latou a tupua o te atua ko Nipasa mo Tataka; ka ko tino o Sefavaima e 'ta olotou tama mo fai taulaga ki te lotou atua ko Atameleko mo Anameleke.

³²A tino konei e tapuaki foki ki te Aliki, kae e fili mai foki ne latou mai olotou tino, so se tino ke fai mo faitaulaga i koga tapuaki fapaupau kae ke ofo foki ne latou a taulaga a latou i koga kona.

³³Tena la, e tapuaki latou ki te Aliki, kae e tapuaki foki ki olotou atua e pela eiloa mo tu o fenua kola ne o'mai ei latou.

³⁴ A tino kona, koi tauave mai eiloa a tu taumua a latou ke oko mai ki aso nei. E se tapuaki latou ki te Aliki, e se tausi foki ki tulafono mo fakatonuga kola ne tuku ne te Aliki ki tino o te gafa o Iakopo, tela ne fakaigoa ne ia ko Isalaelu.

³⁵ A te Aliki ne fai tena feagaiga ki tino Isalaelu kae fakatonu atu ki a latou penei: “Sa tapuaki ki atua fakaatea; sa ifo ki atua kona, io me tavini ki ei; sa ofo foki ne otou taulaga ki ei.

³⁶ A koutou e tau o faka'logo mai ki a au, ko te Aliki tela ne aumai ne ia koutou keatea mai Aikupito ki tena 'mana malosi; a koutou ke ifo mai ki a au kae ofo mai otou taulaga ki a au.

³⁷E 'tau mo koutou o tausi ki tulafono mo fakatonuga kola ne tusi atu ne au mo koutou. E se 'tau koutou o tapuaki atu ki nisi atua,

³⁸kae ke sa puli i a koutou a te feagaiga ne fai ne au mo koutou.

³⁹E 'tau mo koutou o faka'logo mai ki a au, te Aliki otou Atua, kae ka faka'sao ne au koutou mai otou fili.”

⁴⁰Ka ko tino kona e se fia faka'logo eiloa, kae e tumau faeloa o tau'tali i tū mua a latou.

⁴¹Tena la, a tino kona e tapuaki ki te Aliki, kae e tapuaki foki ki olotou tupua; a tino o olotou gafa i aso nei e tau'tali foki eiloa ki olotou faiga.