Read Te Tusi Tapu I Te Gana Tuvalu Lomiga Lua 2 TUPU 19 Bible Online

2 TUPU 19 - Te Tusi Tapu I Te Gana Tuvalu Lomiga Lua bible

2 TUPU 19

¹I te logoga a te Tupu ko Hesekia i te tala a ana ofisa kona, tena ne saesae ei ona gatu, pei ki te gatu lautaga, kae fano ki te Faletapu o te Aliki.

²Ne uga atu ne ia a Eliakimo, te ofisa pule o te palesi, mo Sepina te failautusi, mo faitaulaga matuatua ei, ke olo ki a Isaia te pelofeta, te tama tagata a Amota. A latou kona e pei foki ki gatu lautaga.

³Tenei te fekau ne olo mo latou mai te tupu ki a Isaia: “A te aso nei se aso o te puapuaga; a matou nei ko fakasala kae ko masiasi faka eiloa. A matou ko pela me se fafine ka fai o fanau, kae ko te vaivai ko se maua ne ia o fanau.

⁴A te tupu o Asulia ko oti ne uga ne ia tena ofisa pule ke fano o fai a muna se 'tau ki te Atua ola. A te Aliki tou Atua ke fakalogo aka ki muna se 'lei konei, kae fakasala atu a latou kola e fai'pati ne latou. Tela la, talo atu aka ki te Atua mo o tou tino konei koi ola mai.”

⁵I te mauaga ne Isaia a te fekau a te Tupu ko Hesekia,

⁶ne avatu ne ia tena tali penei: “A te Aliki e fai mai ki a koe ke sa mataku koe ki pati a te kau Asulia pela i te Aliki e se mafai ne ia o fakasao a koe.

⁷A te Aliki ka fai ne ia a te tupu o Asulia ke logo i se tala tela ka fuli ne ia ona mafaufauga ke foki atu ki tena fenua, tena ka tamate ei a ia ne te Aliki i kona.”

⁸A te ofisa Asulia ko logo i te tupu o latou ko oti ne tiaki ne ia a te fa'kai o Lakisa, kae tenei ko taua atu nei ki te fa'kai tafa atu ko Lipina; tena ne fanatu ei a ia o faipati ki te tupu i kona.

⁹Ne oko atu te tala ki te kautau Asulia i te kautau Aikupito, tela e takitaki ne te Tupu ko Tilaka o Sutana,[25] tela ko vau o taua ki a latou. I te logoga o te tupu o Asulia i te tala tena, ave ei tena tusi ki te tupu o Iuta ko Hesekia mo te fekau tenei,

¹⁰“A te atua tela e talitonu koe ki ei ko oti ne fai atu i a koe e se takavale i a au, kae masaua o sa talitonu ki te mea tena.

¹¹Ko oti ne lagona ne koe a te mea ko oto ne fai ne se tupu o Asulia ki se malō tela e manako a ia o 'ta fakamasei. I tau fakatau e mafai ne koe o sao?

¹²A oku tupuga ne fakatakavale masei ne latou a fakai o Kosana, Halana, mo Lesefa, kae tamate a tino o Petetene kola e nofo i Telasa, kae e se mafai ne atua o latou o fakasao latou.

¹³Ko fea a tupu o fa'kai o Hamata, Apata, Sefavaima, Hena mo Iva?”

¹⁴Ne puke mai ne te Tupu ko Hesekia a te tusi mai avefekau, faitau ei ne ia. Tena ne fanatu a ia ki te Faletapu, fakatakato atu ne ia a te tusi tena i mua o te Aliki, kae talo atu penei,

¹⁵ “Te Aliki te Atua o Isalaelu, tela e sagasaga i tena nofogaaliki mai luga o kelupi, ko koe fua tokotasi ko te Atua tela e pule i malō katoa o te lalolagi. Ne faite ne koe te lagi mo te lalolagi.

¹⁶Te Aliki, kilo mai ki te mea tenei ko tupu ki a matou. Fakalogo mai ki muna se 'lei a Sanelivi konei e fai mai o faka'Itaita a koe, te Atua ola.

¹⁷Te Aliki, e iloa katoa ne matou i tupu o Asulia ko oti ne fakama'sei ne latou a malō e uke, pela foki olotou laukele,

¹⁸kae sunu a olotou atua — kola e se ne atua tonu kae ne fakatusa fua ne faite ki lakau mo fatu ne tino ola.

¹⁹Te Aliki, te motou Atua, fakasao mai matou mai i te kau Asulia, ko te mea ke iloa ne malō katoa o te lalolagi me ko koe te Aliki, ko te Atua.”

²⁰Ne ave te fekau a Isaia ki te Tupu ko Hesekia me ko oti ne lagona ne te Aliki tena talo,

²¹kae tenei tena tali, “Sanelivi, a te fa'kai o Ielusalema e katakata atu ki a koe, kae takalialia i a koe.

²²E iloa ne koe me ko oi tena e faifai muna sale koe ki ei? A koe ko oti ne se ava mai ki a au, te Atua tapu o Isalaelu.

²³Ne uga mai ne koe au avefekau o faipati fakamatamata mai ki a au me ko oti ne fakatakavale ne koe a mauga ma'luga eiloa o Lepanona. Ne faipati fakamatamata mai koe me ne kati ne koe i kona a alasi tafasili i te ma'luga mo paina tafasili i te gali, kae ne oko foki koe ki koga tafa ki loto o te vao.

²⁴Ne fai mai au muna fakamatamata me ne keli ne koe a vaikeli i fenua fakaatea kae inu vai i koga kona, kae ne lakalaka ne au sotia a te Vaitafe o te Naila tela ne masa pakupaku ei.

²⁵“E se iloa ne koe i mea kona ne mea ko leva eiloa ne fuafua ne au i aso mua? Kae nei, tenei ko fakataunu ne au. Ne avatu ne au te malosi ki a koe o ofa ki lalo a fa'kai e isi ne olo o latou.

²⁶A tino e nofo i fa'kai kona ko seai ne olotou malosi; ko oko eiloa i te ma'taku kae 'poi. E pela latou me ne mouku i se fatoaga, io me ne mouku e ola i se tuafale kae vau te matagi vela mai te saegala o fue valevale latou.[26]

²⁷“E iloa fakalei eiloa ne au a mea katoa e uiga ki a koutou; ko mea a koutou e fai, mo koga e olo koutou ki ei. E iloa foki ne au a muna ma'sei a koutou ne fai mai ki a au.

²⁸Ko oti au ne logo i otou muna se 'lei kona ki a au, mo otou pati fakamatamata, tela la, ka fakalave ne au otou isu ki se kafilo kae sai se uka mo taofi otou gutu, kae faka'foki atu koutou i te auala foki eiloa tena ne o'mai koutou i ei.”

²⁹Tena ne fai atu ei a Isaia ki te Tupu ko Hesekia penei, “Tenei te fakailoga o te mea ka tupu. I te tausaga tenei, mo te sua tausaga, a koutou ka kai fua ki saito vao, ka ko te tausaga mai tua atu, ka mafai ei ne koutou o toki otou saito kae kati manafai ko ma'tua, ka mafai foki ne koutou o toki otou vine ko kai eiloa koutou i ei.

³⁰A tino i Iuta kona e toe mai ka olaola 'lei e pela me ne lakau kola e 'mao olotou aka ki lalo i te laukele kae fua mai fuaga e uke.

³¹Ka isi eiloa ne tino i Ielusalema pela foki i te Mauga o Siona ka ola mai, me i te Aliki e manako eiloa o fakatupu te mea tena.

³²“Tenei te muna a te Aliki e uiga ki te tupu o Asulia: ‘Ka se ulu mai lele eiloa a ia ki loto i te fa'kai tenei, io me sana mai sena matasana. Ka seai eiloa ne sotia mo olotou talita e fakapilipili mai ki te fa'kai, kae ka seai ne koga a latou e fakatoka e taumafai ei latou ke oko mai ki loto i te fa'kai.

³³Ka toe foki atu eiloa a ia i te auala ne vau ei a ia, kae ka se oko eiloa ki loto i te fa'kai tenei. Ko au, te Aliki, tenei ne faipati atu.

³⁴Ka puipui ne au te fa'kai tenei kae tausi ne au, ke mo a e takuvalea toku igoa. E fai ne au pena, e tusa foki eiloa mo taku tautoga ki taku tavini ko Tavita.”’

³⁵I te po tena, ne fanatu te agelu a te Aliki ki te koga e nofo ei te kautau Asulia, tamate eiloa ne ia e tusa mo te selau valusefulu lima afe sotia o latou. I te tafataeao, ko ta'kato mai me ko mate katoa!

³⁶Tena ne foki atu ei te tupu o Asulia ko Sanelivi ki Nineva.

³⁷I te aso e tasi, i te taimi ne tapuaki ei a Sanelivi i te faletapu o tena atua ko Nisiloka, kae o'mai ana tama tagata e tokolua ko Atameleko mo Salesa, tamate eiloa ne laua a te tupu ki pelu a laua, tena sola ei laua ki te fenua o Alalata. Ne sui a ia ne te sua tama tagata a ia e igoa ki a Esalatonu, o fai mo tupu.