Read Te Tusi Tapu I Te Gana Tuvalu Lomiga Lua 2 TUPU 7 Bible Online

2 TUPU 7 - Te Tusi Tapu I Te Gana Tuvalu Lomiga Lua bible

2 TUPU 7

¹Ne tali atu Elisaia, “Fakalogo mai ki muna a te Aliki! I te taimi penei ma taeao, ka mafai ne koe o togi i Samalia se tolu kilokalame o te saito tafasili i te 'lei io me se ono kilokalame o te kalite i te tupe siliva e tasi.”

²Muna a te ofisa a te tupu ki a Elisaia penei, “E se mafai lele eiloa o taunu tau muna tena ne fai, faitalia foki eiloa manafai e faka'to ifo nei eiloa ne te Atua te vaiua!” Ne tali atu a Elisaia, “Ka lavea ne koe te fakataunuga o aku muna kona ne fai, kae ka se kai lele eiloa koe ise meakai i meakai kona.”

³E tokofa tagata lepela kola e nofo i tua o te fa'kai ne fai aka olotou muna penei, “Ai a ka nofo fua ei tatou konei ke mate tatou?

⁴E seai se aoga e olo ei tatou ki te fa'kai me i a tatou e mate fua i te fia'kai i ei; kafai e nofo tatou i konei, tatou e mate foki. Kae e 'lei ke olo tatou ki te koga e 'nofo ei a te kautau a Sulia. Kafai e tamate ne latou tatou, e 'lei faeloa i a tatou foki la ne tino e tau o mate. Kae e manuia tatou manafai e fakasao tatou ne latou.”

⁵Tena la, i te afiafi, ko kamata o pouli, ne olo atu ei latou kona ki te koga e nofo ei a te kau Sulia, kae i te oko atuga a latou, e seai eiloa se tino i te koga tena.

⁶A te Aliki ko oti ne fai ne ia a te kau Sulia ke lagona ne latou se gulu o se kautau lasi e fanatu ki te koga e nofo ei latou, mo solofanua mo kaliota; tena la, ne mafau'fau te kau Sulia i te tupu o Isalaelu ne togi ne ia a te tupu o Aikupito mo te tupu o tino Heti ke olo atu mo olotou kau o taua ki a latou.

⁷Tena la, i te afiafi tena, a tino Sulia ne tele ke ola latou, kae tiakina olotou faleie, solofanua, mo asini mo mea katoa a latou.

⁸I te oko atuga o te tokofa tagata lepela kona ki te mata o te koga e nofo ei te kau Sulia, ne ulu atu latou ki loto i te faleie, kai aka kae inu i kona, puke aka foki ne latou a siliva mo aulo mo gatu, ave ei ne latou o funa i se koga. Ne foki mai latou, toe ulu atu ki loto i te sua faleie, toe fai foki ne latou a mea kola ne fai ne latou i te faleie muamua.

⁹Ne toe fai aka olotou muna i a latou eiloa penei, “E se tau o fai ne tatou a te mea tenei! A te mea tenei se tala fakafiafia, e tau o na fakailoa atu ne tatou. Kafai e fakatali tatou ke taeao ko fakailoa atu ei ne tatou, kaati e iku eiloa tatou o fakasala. Tatou ka olo o fakailoa ki ofisa a te tupu!”

¹⁰Tena ne tiakina ei ne latou a te koga tena ne nofo ei te kau Sulia, kae foki atu ki Samalia. Ne ka'laga atu latou ki sotia leoleo o te mataloa penei, “A matou ne olo ki te koga ne nofo ei a te kau Sulia kae seai eiloa se tino ne lavea ne matou i ei, seai foki ne leo e lagona atu, a solofanua mo asini e mau mai eiloa i koga ne sai i ei, mo faleie, kola eiloa e tu mai.”

¹¹Ne fakasalalau atu ne leoleo kona a te tala tena, tena ne lipoti atu ei ki te palesi.

¹²I te taimi koi po faeloa, ka ko te tupu ne pula aka mai tena moega kae fai atu ki ana ofisa penei, “E iloa ne au a te togafiti a te kau Sulia! E iloa ne latou i te oge meakai tenei e poko i konei, tena la, ko tiaki ei te koga ne nofo ei latou o olo o muni i te vao. I te lotou mafaufau me ka tiiaki ne tatou a te fa'kai tenei o olo o sala meakai, tena ko mai ei latou o puke fakapagota tatou, kae puke mo te fa'kai.”

¹³Ne faipati aka mo tena ofisa e tokotasi penei, “A tino i te fa'kai tenei ko se aoga, ko pela eiloa me ne tino ko leva ne mate. Tela la, e lei ke uga ne tatou ne tino ke olo i solofanua e lima konei e toe, ke iloa tonu ne tatou me se a te mea ko tupu.”

¹⁴Ne fili aka ne latou a tagata, tuku atu ei ne te tupu e lua kaliota ke olo i ei, mo te fakatonuga ke onoono faka'lei me se a te mea ko tupu ki te kautau a Sulia.

¹⁵Ne oko atu eiloa latou kona ki te Iolitana, kae i te auala, ne lavea ne latou a gatu mo nisi mea kola ne tiakina ne te kau Sulia i te taimi ne tele ei latou. Tena ne foki atu ei latou o fakailoa ki te tupu.

¹⁶Ne olo atu a tino Samalia o puke mai a mea i te koga ne nofo ei te kautau a Sulia. Tela la, a te tolu kilokalame o te saito tafasili i te 'lei io me ko te ono kilokalame o kalite ko tusa fua mo te siliva e tasi te togi, ko taunu ei a muna a te Aliki ne fai.

¹⁷A te ofisa a te tupu tela e oloolo sale mo ia ko oti ne fai ne ia ke pule i te tausiga o te mataloa o te fa'kai. Ne mate a te ofisa tena me ne lakalaka ne tino, e pela eiloa mo muna a Elisaia i te taimi ne fanatu ei a te tupu ki a ia.

¹⁸A Elisaia ne fai ko ia ki te tupu me i te taimi penei i te aso a taeao, a te tolu kilokalame o te saito tafasili i te lei io me ko te ono kilokalame o te kalite ka togi i Samalia ki te siliva e tasi,

¹⁹ka ko te ofisa tena ne tali aka penei, “E se mafai o tupu se mea pena, vagana foki eiloa manafai e faka'to nei eiloa ne te Aliki se vaiua!” A Elisaia ne tali ki te ofisa penei, “Ka lavea ne koe ki ou mata a te mea tena manafai ko taunu, kae ka se tami eiloa tou gutu ki se meakai.”

²⁰Tena eiloa te mea ne tupu ki te ofisa tena; ne lakalaka a ia ne tino i te mataloa o te fa'kai.