Read Te Tusi Tapu I Te Gana Tuvalu Lomiga Lua 2 TUPU 9 Bible Online

2 TUPU 9 - Te Tusi Tapu I Te Gana Tuvalu Lomiga Lua bible

2 TUPU 9

¹I te vaitaimi tena, a te pelofeta ko Elisaia ne kalaga ki te pelofeta tamataene e tokotasi, kae fai atu ki ei penei, “Fakatoka o fano ki Lamota i Kileata. Puke atu te tiā sinu olive tenei;

²kafai e oko koe ki kona, fano eiloa koe o sala a Ieu, te tama tagata a Iosefatu, kae ko te mokopuna o Nimesi. Taki atu ne koe a ia ki se potu seai ne tino i ei, ke mao a ia mai ona takaga,

³ko ligi ei ne koe te sinu olive tenei ki luga i tena ulu, kae fai atu koe penei, ‘A te Aliki ko folafola mai ne ia me ko faū nei ne ia a koe ke fai mo tupu o Isalaelu.’ Ka oti, ko fano fakavave eiloa koe keatea mai i kona.”

⁴Tena ne fanatu eiloa te pelofeta tamataene tena ki Lamota,

⁵maua atu ei ne ia a ofisa o te kautau e fai mai te lotou fono. Muna a te pelofeta tamataene penei, “Tou malu, e isi saku fekau ki a koe.” Ne fesili atu a Ieu, “Ko oi te tino i a matou e faipati koe ki ei?” Ne tali mai te pelofeta, “Tou malu, au e faipati ki a koe.”

⁶ Tena ne olo atu ei laua mo Ieu ki loto i te potu, ligi atu ei ne ia a te sinu olive ki luga i te ulu o Ieu, kae fai atu penei ki a ia, “A te Aliki, te Atua o Isalaelu, ne fai mai penei, ‘Ko faū nei ne au a koe ke fai mo tupu o toku fenua ko Isalaelu.’

⁷E tau o tamate ne koe a tou pule, te tupu, te tama tagata a Aapo, ko te mea ke fakasala ei ne au a Iesepela, i te tamatega ne ia o aku pelofeta, mo nisi tavini a aku.

⁸A tino katoa i te kaiga o Aapo, mo tino o tena gafa e tau o tamate katoa; ka tamate ne au a tagata katoa i tena kaiga, mai te tino foliki ke oko ki te tino matua.

⁹Ka fai fakamasei ne au tena kaiga e pela mo te mea ne fai ne au ki te kaiga o te Tupu o Isalaelu ko Ielopoamo, mo te kaiga o te Tupu ko Paasa o Isalaelu.

¹⁰ A te foitino o Iesepela e se tanu, me ka kai ne kuli i te laukele o Ieseleelu, “I te otiga ne faipati ne te pelofeta tamataene a muna kona, te mea eiloa ko ulu ki tua mo te potu, fano eiloa.

¹¹Ne foki atu a Ieu ki te kau ofisa kola ne fesili mai penei, “E a, e lei mea katoa? Se a te fekau a te tagata fakavalevale tela ki a koe?” Ne tali atu a Ieu, “E iloa ne koutou te mea e manako a ia ki ei.”

¹²Ne tali mai latou, “ikai, e se iloa ne matou. Fakaasi mai me ne a ana muna!” Muna a ieu, “Ne fai mai i te Aliki ne fai mai penei, ‘Ko faū nei ne au koe ke fai mo tupu o Isalaelu.’ ”

¹³I te taimi eiloa tena, ko ofisa eiloa kona ko fola atu olotou gatu loa i luga i te sitepu ke tu ei a Ieu. Ne fakatagi ne latou a pu, kae ka'laga penei, “A Ieu ko fai mo tupu!”

¹⁴Tena, ko Ieu eiloa ko lamalama o tamate ate Tupu ko Iolama, tela e nofo i Ieseleelu. A Iolamo, ne fano ki Ieseleelu o nofo i ei ke 'lei ona pa'kiaga kola ne pa'kia i te tauaga a latou mo te Tupu o Sulia ko Hasaeli i Lamota. Muna a ieu ki ona takaga ofisa, “Kafai koutou e kau mai ki a au, onoono fakalei la ke moa se tino e to ki tua mo Lamota o fano o fakailoa ki tino i Ieseleelu.”

¹⁶Tena ne sopo ei a ia ki luga i tena kaliota, fano ei ki Ieseleelu. A Iolamo i te vaitaimi tena, seki 'lei eiloa. A te Tupu o Iuta ko Asaia e nofo i kona me ne fanatu o asi ki a Iolamo.

¹⁷A te sotia tela e tiute i te taoa i Ieseleelu, ne lavea ne ia a Ieu mo tena kau ko pili atu, tena ne kalaga ei a ia penei, “E isi ne tagata konei e tele mai i olotou solofanua!” Ne tali atu a Iolamo, “Uga atu se tagata ke tele i te solofanua o asi ki ei me ne taugasoa o tatou io me ne tino o te fili.”

¹⁸Ne fanatu te avefekau tena ki a Ieu, kae fai atu penei, “A te tupu e fia iloa ne ia me ko koe e vau i se feitu 'lei me ikai.” Ne tali atu a Ieu, “E seai sau fekau i te feitu tena! Vau o tautali mai i a au.” A te sotia tela e tiute i luga i te taoa ne toe lipoti atu ne ia i te avefekau tela ne fanatu, ko oti ne oko ki te kau tela ne lavea ne ia, kae ko se foki mai.

¹⁹Ne toe uga atu te sua avefekau tela ne fesili atu foki ki a Ieu pela mo te fesili a te avefekau muamua. Ne toe tali atu a Ieu penei, “E seai sau fekau i te feitu tena! Vau o tautali mai i a au.”

²⁰Ne toe lipoti atu foki ne te sotia tiute i te taoa i te avefekau ko oti ne oko ki te kau kola ne lavea ne ia, kae ko se foki mai. Kae ne toe fai atu ana pati penei, “A te takitaki o te kau tena e o'mai, e fakatele mai tena kaliota e pela me se tino fakavalevale, pela eiloa mo Ieu!”

²¹Ne fakatonu atu a Iolamo penei, “Fakatoka mai taku kaliota.” Tena ne olo atu ei laua mo te Tupu ko Asaia, e tofu kaliota eiloa laua, o fakafetaui ki a Ieu. Ne fetaui latou mo Ieu i te fatoaga tela o Napota.

²²Ne fesili atu a Iolamo ki a Ieu penei, “A koe na e vau mo te filemu?” Ne tali atu a Ieu, “E maua pefea te filemu manafai koi mautakitaki mai eiloa a uiga fakataulaitu mo te ifo ki tupua tela ne kamata ne tou matua ko Iesepela?”

²³Muna a Iolamo, “Asaia, te mea tenei se togafiti masei!” Tena mafuli ei a ia o tele keatea.

²⁴Ne tapale aka te kausana a Ieu, sana ei ne ia tena matasana tela ne tu i te tua o Iolamo, sae eiloa ki loto i tena fatu. Ne siga ifo a Iolamo i luga i tena kaliota, mate eiloa;

²⁵tena kae fai atu a Ieu ki tena fesoasoani ko Pitika penei, “Avatu tena foitino o pei atu ki te fatoaga o Napota. Masaua ne koe i te taimi ne olo tasi ei taua i tua o te tamana o Iolamo tela ko Aapo, ne faipati mai ei a te Aliki ki a Aapo penei:

²⁶ ‘Ne lavea ne au a te tamatega o Napota mo ana tama tagata i te aso anafi. Au e tauto me ka fakasala ne au a koe i konei, i te fatoaga foki eiloa tenei.’ Tela la, ne fakatonu atu ei a ieu ki tena fesoasoani penei, “Puke te foitino o Iolamo o ave o pei ki te fatoaga tela e o Napota muamua, ko fakataunu ei a te tautoga a te Aliki tela ne fai.”

²⁷Ne lavea ne Asaia a te mea tena ne tupu, tena ne tele ei a ia i tena kaliota ki te fa'kai o Peta Hakana, kae afuli a ia ne Ieu. Ne fakatonu atu a Ieu ki tena kau penei, “Tamate atu foki a ia tena!” Tena ne sana ne latou a Asaia,[10] pakia eiloa, i te taimi ne tele aka ei a ia i tena kaliota ki te fa'kai o Kulu, i tafa o te fa'kai o Ipeleamo. Ne taumafai eiloa o fakatele a tena kaliota ke oko eiloa ki te fa'kai o Mekito, tena mate ei a ia i kona.

²⁸Ne avatu tena foitino i luga i tena kaliota ne ana ofisa ki Ielusalema, tanu ei a ia i te tanuga o tupu i te Fa'kai o Tavita.

²⁹A Asaia ne fai mo tupu o Iuta i te sefulutasi o tausaga o te nofoaiga a Iolamo, te tama a Aapo, i Isalaelu.

³⁰A Ieu ko oko atu nei ki Ieseleelu. I te logoga a Iesepela i te mea tena ne tupu, ne vali ona mata, teu faka'lei tena ulu, kae tu i te fakamalama i te palesi o kilo ifo ki lalo i te auala.

³¹I te ulu maiga a Ieu i te mataloa o te fa'kai, ne kalaga atu a Iesepela penei, “Semeli![11] Te tagata tatino! Ai a e vau ei koe ki konei?”

³²Ne kilo aka Ieu ki luga kae kalaga atu penei, “Ko oi tino e kau i a au?” E toko lua me toko tolu ofisa o te palesi kola ne kilo ifo mai luga i te famalama

³³kae kalaga atu mo Ieu ki a latou penei, “Pei mai te fafine tena ki lalo!” Ne pei ifo ne latou a Iesepela, pisi valevale eiloa ona toto ki te 'pui pela foki ki solofanua. Ne fakatele atu ne Ieu tena solofanua mo tena kaliota i luga i te foitino o Iesepela,

³⁴fanatu eiloa a ia ki loto i te palesi o kai. I te taimi tena, ne fatoa fai aka ei a ia penei, “Puke atu te fafine masei tena o ave o tanu, i a ia foki la se tama a se tupu.”

³⁵A tagata kola ne olo o tanu a Iesepela, ne maua atu ne latou ko te gati ulu mo ivi o ana lima mo ana vae.

³⁶ I te fakailoa atuga ne tagata kona te mea tena ki a Ieu, muna a Ieu, “i te faipatiga a te Aliki ki a Elia, ne fakaasi ne ia ki ei a te mea ka tupu: ‘Ko kuli ka kai ne latou te foitino o Iesepela i te kogā laukele o Ieseleelu.

³⁷A ivi o ia ka tafola valevale fua i kona pela me ne fekau, ko seai se tino e iloa tonu ne ia ona foliga.’ ”