Read Te Tusi Tapu I Te Gana Tuvalu Lomiga Lua 1 NOFOAIGA TUPU 15 Bible Online

1 NOFOAIGA TUPU 15 - Te Tusi Tapu I Te Gana Tuvalu Lomiga Lua bible

1 NOFOAIGA TUPU 15

¹E isi ne fale ne faite ne Tavita i te Fa'kai o Tavita,[25] mō ia foki eiloa. Ne fakatoka foki ne ia se koga mo te Pusa o te Feagaiga a te Atua, kae fakatu aka foki ne ia se Faleie mō te Pusa o te Feagaiga.

² Muna a Tavita penei, “Ko te kau sa Levi fua e amo ne latou te Pusa o te Feagaiga, me ko latou fua ne fili ne te Aliki ke aveave sale ne latou, kae ke tavini atu foki ki a ia ki te se gata mai.”

³Tena la, ne fakamaopoopo mai ne Tavita a tino Isalaelu katoa ki Ielusalema, ko te mea ke aumai a te Pusa o te Feagaiga ki te koga ko oti ne fakatoka ne ia mo tuku.

⁴Oti aka, uga ei tena fekau ki tino i te gafa o Alona mo te kau sa Levi ke olo atu ki a ia.

⁵A te sa Levi mai i te kaukaiga o Koate ne vau, ko Ulielu, a ia ko te takitaki o te 120 tagata i tena kaukaiga;

⁶mai i te kaukaiga o Melali, ko Asaia, a ia e pule i tagata e 220;

⁷mai i te kaukaiga o Kelesona, ko Ioelu, e takitaki i te 130 tagata;

⁸mai i te kaukaiga o Elisafana, a te tagata mai te kaukaiga tena ko Semaia, e takitaki i te 200 tagata;

⁹mai i te kaukaiga o Hepelona, ko Elielu, e takitaki i te 80 tagata;

¹⁰kae mai i te kaukaiga o Usieli, ko Aminatapu, e takitaki i te 112 tagata.

¹¹Ne kalaga atu a Tavita ki faitaulaga ko Satoka mo Apiata mo te tokoono sa Levi, ko Ulielu, Asaia, Ioelu, Semaia, Elielu, mo Aminatapu.

¹²Muna a ia ki te kau sa Levi penei, “A koutou ko takitaki o kaukaiga i te matakaiga o Levi. Faka'ma otou foitino, pela foki mo taina sa Levi o koutou, ko te mea ke olo koutou o aumai a te Pusa o te Feagaiga a te Aliki te Atua o Isalaelu ki te koga tela ko oti ne fakatoka ne au.

¹³Ona ko koutou ne seki o'mai i te taimi muamua o amo a te Pusa o te Feagaiga, tena ne fakasala ei matou ne te Aliki te tou Atua, me i a tatou ne seki tavini atu ki a ia e pela mo te mea e tau o fai ne tatou.”

¹⁴Tena la, ne faka'ma a foitino o faitaulaga mo sa Levi, ko te mea ke olo o ave a te Pusa o te Feagaiga a te Aliki te Atua o Isalaelu.

¹⁵ Ne amo ne te kau sa Levi te Pusa o te Feagaiga ki amo, i olotou tuauma, e pela eiloa mo te fakatonuga a te Aliki ki a Mose.

¹⁶Ne fakatonu ne Tavita a takitaki o te kau sa Levi ke fakasoa aka a te kau sa Levi ke usu pese kae tata a pese fiafia ki kitala mo sumepalo.

¹⁷Konei a tagata ne fili mai i kaukaiga tata lakau, ke fakatagi ne latou a sumepalo palasi: ko Hemanu te tama tagata a Ioelu, ko tena kaiga ko Asafo te tama tagata a Pelekia mo Etana te tama tagata a Kusaia, mai i te kaukaiga o Melali. Konei a nisi sa Levi ne fili ne latou ke fesoasoani atu ki a latou, ke fakatagi ne latou a kitala leo maluga: ko Sakalia, Iasielu, Semilamota, Ieielu, Uni, Eliapo, Maseia, mo Penaia. Konei a sa Levi ne fili ke fakatagi ne latou a kitala tagi malalo: ko Matitia, Elifelehu, Mikineia, Asasia, mo sotia tiute o te Faletapu ko Opeta Etoma mo Ieielu

²²Ne fili ne latou a Kenania ke takitaki ne ia a te kau fakatagitagi kona, me i a ia se tagata poto i te tata lakau kae fai pese.

²³A Pelekia mo Elekana, fakatasi mo Opeta Etoma mo Ieia, ne fili ke fai mo sotia tausi o te Pusa o te Feagaiga. A faitaulaga ne fili ke fakatagi ne latou a pu i mua o te Pusa o te Feagaiga, ko Sepania, Iosafata, Natanielu, Amasai, Sakalia, Penaia, mo Eliesa.

²⁵Ne olo atu a Tavita, mo takitaki o Isalaelu, mo takitaki o kautau, ki te fale o Opeta Etoma o puke mai a te Pusa o te Feagaiga, tena ne fai ei te fakafiafiaga lasi a latou.

²⁶Ne ta ne latou e fitu pulumakau tagata kae fitu mamoe mo fai te lotou taulaga, ko te mea ke fesoasoani mai te Atua ki te kau sa Levi kola e amo a te Pusa o te Feagaiga.

²⁷A Tavita e pei ki te gatu loa ne faite ki te lino tafasili i te gali, pena foki a te kau fakatagitagi, mo Kenania te takitaki o latou, mo te kau sa Levi kola e amo i te Pusa. A Tavita e pei foki ki te efota.

²⁸Tena la, ne tau'tali atu katoa a tino Isalaelu i te Pusa o te Feagaiga ke oko eiloa ki Ielusalema, kae e ka'laga i te fiafia, kae fakatagi a pu mo sumepalo, mo kitala.

²⁹I te okomaiga o te Pusa ki loto i te fa'kai, ne fatio ifo a te tama fafine a Saulo ko Mekala mai i te famalama lavea ei ne ia a te Tupu ko Tavita e saka kae evaeva ki luga i te fiafia, tena ko oko eiloa i tena ita ki a Tavita.