Read Te Tusi Tapu I Te Gana Tuvalu Lomiga Lua 1 NOFOAIGA TUPU 21 Bible Online

1 NOFOAIGA TUPU 21 - Te Tusi Tapu I Te Gana Tuvalu Lomiga Lua bible

1 NOFOAIGA TUPU 21

¹A Satani ne taumafai o aumai se fakalavelave ki luga i tino Isalaelu, tena ne fai ei ne ia a Tavita ke fai se lauga o tino.

²Ne fakatonu atu Tavita ki a Ioapo mo nisi Ofisa penei, “Olo i loto i Isalaelu, mai i te sua mata ki te sua mata, o lau a tino. E fia iloa ne au te aofaki kātoa o tino.”

³Ne tali atu a Ioapo “A te Aliki ke fakatokouke ne ia a tino Isalaelu, ke selau taimi i te uke i lo te taimi nei! Tou 'malu, a latou ne tavini katoa a koe. Ai a e manako ei koe o fai te mea tenei, ke agasala te fenua katoa?”

⁴Ka ko te tupu ne fai malo ne ia Ioapo ke fakalogo ki te fakatonuga. Ne fano Ioapo malaga atu i loto i te fenua kātoa o Isalaelu, oti i ei, foki mai ei ki Ielusalema.

⁵Ne taku mai ne ia ki te Tupu ko Tavita a te aofaki katoa o tagata ko 'tau o fai mo sotia: e tasi te miliona mo te selau afe i Isalaelu, kae e faselau fitusefulu afe i Iuta.

⁶Ne seki lau ne Ioapo a tino i te matakaiga o Levi mo te matakaiga o Peniamina, me e se tonu mo tena loto a te fakatonuga a te tupu.

⁷Ne seki fiafia te Atua ki te mea tena ne fai, tena ne fakasala ei ne ia Isalaelu.

⁸Muna a Tavita ki te Atua, “Ko oti ne fai ne au se agasala tafasili i te masei, i te faiga ne au o te mea tenei! Fakamolemole fakamagalo mai au. Ko oko eiloa i toku valea i taku mea ne fai.”

⁹Tena, kae fai atu te Aliki ki te pelofeta a Tavita ko Kato penei,

¹⁰“Fano o fai ki a Tavita me e tolu a mea konei e tuku atu ne au ke filifili a ia i te mea e manako a ia ki ei. E fai eiloa ne au te mea e filifili ne ia.”

¹¹Ne fanatu a Kato ki a Tavita, fakaasi atu ne ia te fekau a te Aliki, kae fesili atu penei, “Tefea te mea e manako koe ki ei?

¹²Ko tausaga e tolu o te oge? Me ko masina e tolu e afuli sale ei koutou ne kautau a te fili? Io me ko aso e tolu e ta ei koutou ne te Aliki ki tena pelu kae aumai a famai ki te otou fenua, kae tuku mai ne ia tena agelu ke tamate valevale a tino Isalaelu? Se a te tali ka avatu ne au ki te Aliki?”

¹³Ne tali atu a Tavita ki a Kato penei, “Ko oko eiloa i te faigata o te tulaga tenei ko nofo ei au! Au e se manako ke fakasala au ne tagata o te lalolagi. Ke fakasala au ne te Aliki, me i a ia e alofa.”

¹⁴Tena ne aumai ei ne te Aliki te famai ki Isalaelu, kae ne 'mate i ei e tusa mo te fitusefulu afe tino Isalaelu.

¹⁵Oti aka, uga ei ne ia a te agelu ke ofa fakamasei a Ielusalema, kae ne toe 'fuli ona mafaufauga, kae fai atu ki te agelu penei, “Ko lava! Fakagata i kona!” A te agelu i te taimi tena e tu i tafa o te koga solo saito a te tagata Iepuse ko Alauna.

¹⁶Ne lavea ne Tavita te agelu e tu i te ea, kae e puke tena pelu i tena lima, ko toka o 'ta fakamasei Ielusalema. Tena la, a Tavita mo takitaki katoa o Isalaelu, kolā e 'pei ki gatu lautaga, ne ifo ki lalo, pa'tele eiloa olotou mata ki te laukele.

¹⁷Ne talo Tavita penei, “Te Atua, ko au ne agasala. Ko au ne fai taku fakatonuga ke lau a tino. Se a te mea 'se a tino konei ne fai? Te Aliki toku Atua, fakasala mai au mo toku kaiga, kae sa fakasalagina tou fenua.”

¹⁸Ne fai atu te agelu a te Aliki ki a Kato ke fakatonu atu ki a Tavita ke fano o faite se fata-fai-taulaga i te koga solo saito a Alauna, kae tapuaki atu ki te Aliki.

¹⁹Ne fakalogo Tavita ki te fakatonuga a te Aliki, tena ne fano ei a ia o fai te mea ne fai atu ne Kato.

²⁰I te koga solo saito tena, a Alauna mo ana tama tagata e tokofa e solo saito, kae i te laveaga ne latou te agelu, ko tama tagata eiloa kona ko tele o muni.

²¹I te laveaga ne Alauna a Tavita ko sae atu, ne tiakina ne ia te koga solo saito kae ifo ki lalo, mo ona mata e patele ki te laukele.

²²Muna a Tavita ki a ia penei, “Togi mai tau koga solo saito tenei, ko te mea ke faite ne au se fata-fai-taulaga i konei ki te Aliki, ke fakagata te famai tenei e poko. E avatu eiloa ne au a te togi katoa.”

²³Muna a Alauna, “Tou 'Malu, puke ma koe, kae fai te mea e manako koe o fai. Konei a pulumakau ke sunu mo fai te taulaga i luga i te fata-fai-taulaga, kae konei foki a laupapa solo saito mo fai a fafie, mo saito mo fai te taulaga. Ko tuku atu katoa ne au ki a koe.”

²⁴Kae ne tali atu te tupu penei, “ikai, e togi atu eiloa ne au te togi katoa. E se mafai ne au o avatu ki te Aliki a te mea a koe, se mea e seai se tupe a aku ne maumau ki ei.”

²⁵Tena, ne tuku atu ei ne ia e onoselau tupe aulo ki a Alauna mo togi te koga solo saito.

²⁶Ne faite ne Tavita se fata-fai-taulaga i kona ki te Aliki, kae ofo ne ia i kona a taulaga sunu mo taulaga fakafetai. Ne talo a ia ki te Aliki, kae ne tali mai te Aliki o aumai te afi mai i te lagi o sunu a taulaga i luga i te fata-fai-taulaga.

²⁷Ne fai atu te Aliki ki te agelu ke tuku keatea tena pelu, tena ne fakalogo ei te agelu ki te fakatonuga.

²⁸Ne lavea ne Tavita me ko talia ne te Aliki tena talo, tena ne ofo atu ei ne ia a taulaga i luga i te fata-fai-taulaga, i te koga solo saito a Alauna.

²⁹I te taimi tenei, a te Faleie o te Aliki tela ne faite ne Mose i te vao, mo te fata-fai-taulaga tela e sunu sale i ei a taulaga, koi tuku eiloa i te koga tapuaki i Kipeona.

³⁰A Tavita ne seki fano o tapuaki i kona ki te Atua, me e mataku i te pelu a te agelu.