Read Te Tusi Tapu I Te Gana Tuvalu Lomiga Lua 1 NOFOAIGA TUPU 23 Bible Online

1 NOFOAIGA TUPU 23 - Te Tusi Tapu I Te Gana Tuvalu Lomiga Lua bible

1 NOFOAIGA TUPU 23

¹ I te taimi ko toeaina ei a Tavita, ne fai ne ia tena tama ko Solomona ke fai mo tupu o Isalaelu.

²Ne fakamaopoopo ne te Tupu ko Tavita a takitaki katoa o Isalaelu, pela foki mo faitaulaga mo te kau sa Levi.

³Ne lau ne ia te aofaki katoa o te kau sa Levi kola ko taki tolusefulu tausaga o fano ki luga. A te aofaki katoa e tusa mo te 38,000.

⁴E luasefulu fa afe ne tuku ne te tupu ke pulepule ne latou te faiga o te galuega o te Faletapu, e ono afe ke fakamaumau ne latou a tala o mea, kae fakamasino a kinauga,

⁵e fa afe ke tiute, kae e fa afe ke tavae ne latou te Aliki o fakaaoga a mea fakatagitagi kola ne aumai ne te tupu mo fakaaoga i vikiga o te Atua.

⁶Ne vaevae ne Tavita a te kau sa Levi ki vaega e tolu, i olotou kaukaiga eiloa: Kelesona, Koate, mo Melali.

⁷A Kelesona e tokolua ana tama tagata: ko Latana mo Simei.

⁸A Latana e tokotolu ana tama tagata: ko Ieielu, Setama, mo Ioelu.

⁹A latou ko matai o kaukaiga kola ne 'tupu mai i a Latana. (A Simei e tokotolu ana tama tagata: ko Selomota, Hasielu, mo Halana).

¹⁰A Simei e tokofa ana tama tagata:ko Iahata, Sina, Ieusa, mo Pelia, tena te fakasologa mai i te tino matua o fanaifo ki te tino foliki. A Ieusa mo Pelia e se tokouke tino i o la gafa, tena la, ne lau ei laua se kaukaiga e tasi.

¹²A Koate e tokofa ana tama tagata: ko Amalamo, Isala, Hepelona, mo Usieli.

¹³ A tena tama matua ko Amalamo, ko te tamana o Alona mo Mose. A Alona mo tena gafa ne fakatapu ke pule ne latou a mea tapu ki te se gata mai, ke sunu ne latou a mea manogi i te tapuakiga ki te Aliki, ke tavini latou ki a ia, kae fakamanuia a tino i te igoa o te Aliki.

¹⁴Ka ko tama tagata a Mose, te tagata o te Atua, ne fakatasi ki te kau sa Levi.

¹⁵A Mose e tokolua ana tama tagata, ko Kelesoma mo Eliesa.

¹⁶A te takitaki i tama tagata a Kelesoma ko Sepuelu.

¹⁷A Eliesa e tokotasi eiloa tena tama tagata, ko Lehapaia, ka ko Lehapaia e tokouke tena gafa.

¹⁸A Isala, te tama tagata a Koate i te tokolua, e isi sena tama tagata, ko Selomita, te matai o te kaukaiga.

¹⁹A Hepelona, te tama tagata a Koate i te tokotolu, e tokofa ana tama tagata: ko Ielia, Amalia, Iasielu, mo Iekameamo.

²⁰A te tama fakaoti a Koate, ko Usieli, e tokolua ana tama tagata, ko Mika mo Isia.

²¹A Melali e tokolua ana tama tagata, ko Mali mo Musi. A Mali e tokolua foki ana tama tagata, ko Eleasalo mo Kiso.

²²A Eleasalo ne mate seai ne ana tama tagata, kae ne tama fafine fua. Ana tama fafine ne avaga ki olotou fai tuagaene, tama tagata a Kiso.

²³A Musi, te tama tagata i te tokolua a Melali, e tokotolu ana tama tagata: ko Mali, Eta, mo Ielemota.

²⁴Tena te gafa o Levi, i olotou kaukaiga mo kaiga takitasi, ko tino katoa kona ne fakamau olotou igoa. A tino katoa i tena gafa, kola ko taki luasefulu tausaga o fano ki luga, e tofu katoa mo vaega o latou i te galuega ki te faitega o te Faletapu o te Aliki.

²⁵Muna a Tavita, “A te Aliki te Atua o Isalaelu ko oti ne aumai ne ia te filemu ki tena fenua, ka ko ia ka nofo eiloa i Ielusalema ki te se gata mai.

²⁶ Tela la, ko se toe manakogia te kau sa Levi ke aveave ne latou te Faleie o te Aliki mo mea katoa kola e fakaaoga i tapuakiga.”

²⁷Mai i luga i te toe fakatonuga a Tavita, tena ne fakamau ei a igoa o tino Sa Levi katoa ke ga'lue, manafai ko katoa taki luasefulu tausaga.

²⁸ Konei a galuega ne fakasoa ki ei latou: ke fesoasoani ki faitaulaga i te gafa o Alona i tapuakiga i te Faletapu, ke tausi ne latou a potu ateatea mo potu o te Faletapu, kae ke tausi ke mo ā e lailai i feitu faka‐tapuakiga a mea tapu katoa;

²⁹ke fakatoka kae tausi te falaoa e ofo atu ki te Atua, falaoa e fakaaoga i taulaga, falaoa e se palu ki te mea fakafete, taulaga kola e tao, mo te falaoa e palu mo te sinu olive; o fua te 'mafa mo te uke o taulaga o te Faletapu;

³⁰kae o viki kae tavae te Aliki i taeao mo afiafi katoa,

³¹pela foki i taimi kola e ofo ei a taulaga sunu ki te Aliki i Sapati, i te Kaiga Fiafia o te Masina Tu, mo nisi kaiga fiafia faka‐te‐lotu. E isi eiloa ne tulafono ne fakatoka ke fakasino ei te aofaki o sa Levi e tau o fai ne latou te galuega tenei i taimi takitasi. A te kau sa Levi, ne tuku ki ei te tofi o tapuaki atu ki te Aliki, i taimi katoa.

³²Ko latou e pule i te tausiga o te Faleie o te Aliki mo te Faletapu, pela foki o fesoasoani ki olotou kaiga ko faitaulaga i te gafa o Alona, i tapuakiga i te Faletapu.