Read Te Tusi Tapu I Te Gana Tuvalu Lomiga Lua 2 NOFOAIGA TUPU 17 Bible Online

2 NOFOAIGA TUPU 17 - Te Tusi Tapu I Te Gana Tuvalu Lomiga Lua bible

2 NOFOAIGA TUPU 17

¹Ne sui ne Iosefatu a tena tamana ko Asa o fai mo tupu, kae ne fakamalosi ne ia a tena fenua ke toka mō se fakalavelave mai Isalaelu.

²Ne tuku ne ia a kautau ki fa'kai o Iuta kola ko oti ne fakatoka fakalei mō se fakalavelave, pela foki i tua o fa'kai o Iuta, mo fa'kai kola ne puke ne Asa i te laukele o Efalaima.

³Ne fakamanuia ne te Aliki a Iosefatu, me i a Iosefatu ne tautali ki faiga a tena tamana i tausaga muamua o tena olaga, kae seki tapuaki atu ki a Paala.

⁴Ne tavini eiloa a ia ki te Atua o tena tamana, ne fakalogo foki a ia ki ana fakatonuga, kae ne seki fai ne ia a amioga kola ne fai ne tupu o Isalaelu.

⁵Ne avatu ne te Aliki ki a Iosefatu, a te pule katoatoa i te malo o Iuta, ka ko tino ne aumai ne latou a meaalofa ki a ia, tela la, ko oko eiloa i tena maumea kae ko fakaaloalogina foki ne tino.

⁶Ne fiafia a ia o tavini atu ki te Aliki, kae ofa a koga tapuaki fapaupau katoa, pela foki a fakatusa o te Atua fafine ko Asaila i Iuta.

⁷I te tolu o tausaga o tena nofoaiga, kae uga ne ia a ofisa konei ke akoako atu a tino i fa'kai o Iuta: ko Penihaila, Opetaia, Sakalia, Netanelu, mo Mikaio.

⁸E tokoiva a sa Levi, kae e tokolua a faitaulaga ne olo tasi atu mo latou kona. A sa Levi, ko Semaia, Netania, Sepatia, Asaelu, Semilamota, Ieonatana, Atonia, Topita, mo Topatonita; ka ko faitaulaga, ko Elisama mo Ieolamo.

⁹Ne puke ne latou te tusi o te Tulafono a te Aliki, kae olo mo latou i fa'kai katoa o Iuta, o akoako a tino.

¹⁰Ne fai ne te Aliki a malo katoa kola i feitu o Iuta ke mataku ma olo o taua ki te Tupu ko Iosefatu.

¹¹E isi ne tino Filisitia ne aumai ne latou ki a Iosefatu a siliva e uke, mo nisi meaalofa. E isi foki ne tino Alapi ne aumai ne latou ki a ia e 7,700 mamoe, kae 7,700 foki a kouti.

¹²Tena la, ne gasolo ake eiloa a Iosefatu o malosi. Ne faite ne ia a koga e nofo ei kautau, mo fa'kai,

¹³kola e teu ei a meakai e uke. Ne tuku ne ia i Ielusalema, a ofisa takutakua,

¹⁴I olotou kaukaiga kesekese. Atina ko te takitaki o kautau mai i kaukaiga o Iuta, e 300,000 sotia i tena pulega.

¹⁵A te tokolua ki a ia, ko Ieoananu, e 280,000 sotia i tena pulega.

¹⁶A te tokotolu ko Amasia te tama tagata a Sikeli, e 200,000 a sotia i tena pulega. A Amasia ne ofo ke tavini a ia ki te Aliki.

¹⁷A te takitaki o kautau mai i kaukaiga o Peniamina, ko Eliata, se sotia takutakua, e 200,000 tagata i tena pulega, e tofu mo talita mo kausana.

¹⁸A tena tokolua ko Ieosapata, e 180,000 tagata i tena pulega, e toka katoa mō se taua.

¹⁹A tagata kona e tavini ki te tupu i Ielusalema, kae e isi foki ne sotia ne fakanofo ne ia i nisi fa'kai o Iuta kola ne fakatoka mō nofo kautau.