Read Te Tusi Tapu I Te Gana Tuvalu Lomiga Lua 2 NOFOAIGA TUPU 33 Bible Online

2 NOFOAIGA TUPU 33 - Te Tusi Tapu I Te Gana Tuvalu Lomiga Lua bible

2 NOFOAIGA TUPU 33

¹A Manase ne fai mo tupu o Iuta ka ko sefululua ei tausaga o tena olaga. Ne nofo a ia i te nofogaaliki i Ielusalema i tausaga e limasefulu lima.

² A Manase ne agasala ki te Aliki me ne tautali i amioga masei a tino o malo kola ne afuli keatea ne te Aliki mai i te fenua o Kanana, i te taimi ne o'mai ei tena fenua o nofo i ei.

³Ne toe faite aka foki ne ia a koga tapuaki fapaupau kola ne ofa ne tena tamana ko Hesekia. Ne faite ne ia a fata-fai-taulaga mo fai tapuakiga ki a Paala, ne faite foki ne ia a fakatusa o te atua fafine ko Asaila, kae tapuaki atu ki fetu.

⁴ Ne faite ne ia a fata-fai-taulaga fapaupau i loto i te Faletapu, te koga ne fai mai ei te Aliki me ko te koga e tapuaki atu ei a tino ki a ia ki te se gata mai.

⁵Ne faite foki ne ia ne fata-fai-taulaga i malae fono kola e lua, o te Faletapu, mo fai tapuakiga ki fetu.

⁶Ne ta ne ia ana tama tagata i te Vanu ko Hinomo, mo fai a taulaga sunu. Ne fai ne ia a amioga fakataulaitu, kae kalaga sale ki tino poto i fakamatala mea ka tupu, mo tino fakatu agaga. Ne agasala malosi eiloa a ia ki te Aliki, tena ne kaitaua ei te Aliki.

⁷ Ne tuku ne ia se fakatusa i te Faletapu, te koga ne fai ki ei te faipatiga a te Atua, i tena faiatuga ki a Tavita mo tena tama tagata ko Solomona penei: “i konei, i Ielusalema i te Faletapu tenei, ko te koga tela ko oti ne filifili ne au mai i kogā koga katoa o te sefululua matakaiga o Isalaelu, ke fai mo koga e tapuaki mai ei a tino ki a au.

⁸Kae kafai e tautali a tino Isalaelu ki aku fakatonuga, kae tausi a Tulafono katoa kola ne avatu ne taku tavini ko Mose ki a latou, ko se afuli ei ne au a latou keatea mai te fenua tenei ne tuku ne au ki olotou tupuga.”

⁹Ne taki ne Manase a tino Iuta ki te agasala tela e silia atu i agasala kola e fai ne malo kola ne afuli keatea ne te Aliki mai i te fenua o Kanana, i te taimi ne olo atu ei ki ei tena fenua.

¹⁰E ui eiloa ne fakaasi mai ne te Aliki ki a Manase mo tena fenua a te mea e tau o fai ne latou e sao ei latou, kae ne seki fia fakalogo eiloa latou.

¹¹Tena la, ne talia ei ne te Aliki ke vau te kautau a Asulia o puke a Iuta. Ne puke fakapagota ne latou a Manase, fakalave ki kafilo, saisai ki seni, kae ave ki Papelonia.

¹²Ne mafuli atu a ia ki te Aliki tena Atua mo te fakamaulalo, o fakamolemole ki ei mo se fesoasoani, me i a ia ko puapuaga.

¹³Ne talia ne te Atua a te talo a Manase, toetuku ei ne ia ke foki ki Ielusalema o toetu i tena tulaga fakatupu. Ona ko te mea tena, ko iloa tonu ei ne Manase i te Aliki ko te Atua eiloa.

¹⁴Tena la, ne toe avaka ne Manase te maluga o te pui tafa ki tua, i te feitu ki te saegala o te Fa'kai o Tavita, e kamata mai i te kogā koga i te vanu, i tafa o te vaitafe foliki ko Kaiona i te feitu ki matu o te Mataloa o ika mo te kogā laukele o te fa'kai e igoa ko Ofele. Ne tuku atu foki ne ia ne ofisa o kautau ke takitaki i potukau i fa'kai fakaolo o Iuta.

¹⁵Ne ave keatea ne ia mai i te Faletapu a atua fakaatea, mo te fakatusa tela ne tuku ne ia ki kona, ke oko foki eiloa ki fata-fai-taulaga fapaupau i luga i te mauga tena e tu ei te Faletapu, pela foki i nisi koga i Ielusalema; ne ave ne ia a mea katoa kona ki tua o te fa'kai, pei keatea ei ne ia.

¹⁶Ne toe faite fakalei aka ne ia a te fata-fai-taulaga tela e fai ei tapuakiga ki te Aliki, kae ofo atu ne ia i ei a taulaga fakafetai. Ne fakatonu ne ia a tino katoa o Iuta ke tapuaki atu ki te Aliki, te Atua o Isalaelu.

¹⁷E ui eiloa a tino e tumau o ofo olotou taulaga i nisi koga tapuaki, kae e ofo eiloa ne latou ki te Aliki.

¹⁸A nisi tala e uiga ki a Manase, tena talo ne fai ki te Atua, mo fekau a pelofeta kola ne folafola mai ki a ia i te igoa o te Aliki, te Atua o Isalaelu, e fakamaugina katoa i te tusi o Te Tala Tukufakasolo o Tupu o Isalaelu

¹⁹A te talo a te tupu mo te tali a te Atua, mo te tala o agasala ne fai ne ia kae koi tuai ei a ia o salamo — ko amioga masei ne fai ne ia, ko koga tapuaki fapaupau mo te fakatusa o te atua fafine ko Asaila kola ne faite ne ia, mo te tupua tela e tapuaki a ia ki ei‐a mea katoa kona e fakamau i te tusi o Te Tala Tukufakasolo o Pelofeta.

²⁰Ne mate atu Manase kae ne tanu i te palesi; ne sui a ia ne tena tama tagata ko Amoni o fai mo tupu.

²¹A Amoni ne fai mo tupu o Iuta ka ko luasefulu lua ei ona tausaga. Ne nofo a ia i te nofoaga tupu i Ielusalema i tausaga e lua.

²²Ne agasala a ia ki te Aliki e pela eiloa mo tena tamana ko Manase; ne tapuaki a ia ki tupua kola ne tapuaki ki ei tena tamana.

²³Ne seki salamō a ia o fuli atu ki te Aliki e pela mo tena tamana; ne silia atu te fai agasala o ia i lo tena tamana.

²⁴Ne lamalama a ia ne ana ofisa, tamate eiloa ne latou a ia i te palesi.

²⁵Ne tamate ne tino Iuta a ofisa kola ne olo o tamate a Amoni, kae fakasopo ne latou a Iosia, te tama tagata a Amoni, ke fai mo tupu.