Read Te Tusi Tapu I Te Gana Tuvalu Lomiga Lua 2 NOFOAIGA TUPU 8 Bible Online

2 NOFOAIGA TUPU 8 - Te Tusi Tapu I Te Gana Tuvalu Lomiga Lua bible

2 NOFOAIGA TUPU 8

¹E tusa mo te luasefulu tausaga ne faite ei ne Solomona a te Faletapu mo tena palesi.

²Ne toe fakafou ne ia a fa'kai kola ne aumai ne te Tupu ko Hilamo, kae uga ne ia a nisi tino Isalaelu ke olo o nofo i ei.

³Ne fakatakavale ne ia a te kogā laukele o Hamata mo Sopa,

⁴kae fai ne ia a te pui o te fa'kai ko Palamila i te vao. Ne toe faite faka'lei ne ia a fa'kai katoa i Hamata, kola ko koga e teu ei meakai.

⁵Ne toe fakafou foki ne Solomona a fa'kai konei: Peta Holono ki luga mo Peta Holono ki lalo, ne fa'kai ne fakaolo, kae e pui ki fiti,

⁶te fa'kai o Palata, fa'kai katoa kola e teu ei meakai, mo fa'kai e tuku i ei ana solofanua mo kaliota. Ne fakataunu eiloa ne ia a fuafuaga a ia ki mea e tau o faite ne ia i Ielusalema, Lepanona, mo te kogā fenua katoa tela e pule ne ia.

⁷Ne fakagalue fakapologa ne Solomona a tino i te gafa o tino Kanana kola e seki tamate ne te kau Isalaelu i te taimi ne puke ei ne latou a te fenua. E aofia i konei, ko tino Heti, Amoli, Pelise, Hivi, mo tino Iepuse, ko tino i olotou gafa koi tumau eiloa o fai mo pologa ke oko mai ki aso nei.

⁹A tino Isalaelu e se galue fakapologa, kae galue i tofiga sotia, ofisa o kautau, takitaki i kau kaliota, mo tino i solofanua.

¹⁰E tusa mo te lua lau mo te tinolima ofisa e pulepule ne latou a galuega a pologa, i mea kola e faite.

¹¹Ne fakamasiki atu ne Solomona a tena avaga, te tama fafine a te tupu o Aikupito, mai i te Fa'kai o Tavita ki te fale ne faite ne Solomona mō ia. Muna a Solomona penei, “E se tau mo ia o nofo i te palesi o te Tupu o Isalaelu ko Tavita, me i so se koga ne tuku ei a te Pusa o te Feagaiga e tapu.”

¹²Ne ofo atu ne Solomona a taulaga ki te Aliki i luga i te fata-fai-taulaga tela ne faite ne ia i mua o te Faletapu.

¹³ Ne ofo atu ne ia a taulaga sunu e pela eiloa mo te mea e manakomia i te Tulafono a Mose mō aso fakamanatu takitasi: ko Sapati, ko Kaiga Fiafia o Masina Tu, mo kaiga fiafia ei kola e tolu i te tausaga — ko te Kaiga o Falaoa se Faka'fete, ko te Kaiga Fiafia o te Katiga o Lakau Kaina, te Kaiga Fiafia o Fale Fakamalumalu.

¹⁴Ne fakasoa foki ne Solomona a galuega fai a faitaulaga i aso takitasi, pela foki te kau sa Levi kola e fesoasoani ki faitaulaga, i te usuga o pese mo te faiga o olotou galuega. Ne fai ne ia a te mea tena, e pela eiloa mo tulafono ne fakamoe ne tena tamana ko Tavita. Ne fakasoa foki ne ia a sotia tiute o te Faletapu i vaega takitasi, e fakatau ki te faiga o olotou tiute i aso takitasi, i mataloa takitasi, e pela eiloa mo te fakatonuga a Tavita, te tagata o te Atua.

¹⁵A fakatonuga kola ne tuku atu ne Tavita ki faitaulaga mo te kau sa Levi, e uiga ki potu teu koloa, mo nisi mea ake foki, ne fakataunu faka'lei katoa.

¹⁶I te taimi tenei, a galuega katoa a Solomona ko palele katoa. A te faitega o te Faletapu, mai i te fakatakatoga o te fakavae ke oko ki te taimi ne palele katoatoa ei, ne fanofano lei mo te manuia.

¹⁷I te otiga o mea kona, ko Solomona eiloa ko fano ki Esionikepa mo Elata, ko taulaga o vaka i te matafaga o te Mataosoga o Akapa, i te fenua o Etoma.

¹⁸Ne avatu ne te Tupu ko Hilamo ki a Solomona a vakamutu e kapeni i ei ana ofisa, kae kauvaka ne ana kauvaka masani. Ne malaga latou mo ofisa a Solomona ki te fenua o Ofeila, kae aumai ne latou ki a Solomona e tusa mo te sefululima afe kilokalame o te aulo.