Read Te Tusi Tapu I Te Gana Tuvalu Lomiga Lua ESELA 1 Bible Online

ESELA 1 - Te Tusi Tapu I Te Gana Tuvalu Lomiga Lua bible

ESELA 1

¹ I te tausaga muamua o te nofoaiga a Kulesa, te tupu o Pelesia,[1] ne fakataunu ei ne te Aliki te mea tela ne faipati ne ia ki te pelofeta ko Ielemia. Ne fai ne te Aliki a Kulesa ke tusi ne ia se fakatonuga ke ave o fakasalalau i kogā koga katoa o tena malo:

² “Tenei te fakatonuga a Kulesa, te Tupu o Pelesia. A te Aliki, te Atua o te lagi, ko oti ne fai ne ia a au ke pule i te lalolagi katoa, kae ko oti ne fai mai ke faite ne au se faletapu mo ia i Ielusalema, i Iuta.

³A te Atua ke fakatasi atu ki a koutou katoa kola ko tino o tena fenua. A koutou ka olo nei ki Ielusalema o toe faite te Faletapu o te Aliki, te Atua o Isalaelu, te Atua tela e tapuaki ki ei a tino i Ielusalema.

⁴Kafai e isi ne tino o te Aliki i te tafeaga e ma'nako ki ne fesoasoani i te taimi e 'foki ei latou, ko olotou tuakoi e 'tau o avatu ne latou ki ei a mea konei: ko siliva mo aulo, mo meakai mo manu mo ave olotou mea, pela foki mo ne taulaga ke ofo ne latou i te Faletapu o te Atua i Ielusalema.”

⁵Tena la, a matai o kaukaiga i matakaiga o Iuta mo Peniamina, mo faitaulaga mo te kau sa Levi, mo tino katoa kola ko ulufia ne te agaga o te Atua ne fakatoka katoa o olo o toe faite a te Faletapu o te Aliki i Ielusalema.

⁶A tuakoi o latou ne fesoasoani atu eiloa ki a latou o avatu olotou mea e uke: ko meāfale siliva pela mo sipunu mo tui mo naifi, ko aulo, ko meakai mō te lotou malaga, mo manu e ave ei olotou mea, mo nisi mea taua aka foki, mo taulaga ei ki te Faletapu.

⁷Ne fakafoki atu ne Kulesa a pōla mo ipu kola ne puke mai ne te Tupu ko Nepukanesa mai i te Faletapu i Ielusalema o ave o tuku ki te faletapu o ana atua.

⁸Ne avatu ne Kulesa a mea kona ki a Meteleta, te teutupe a te tupu, tela ne faite ne ia a mea tāua ke ave ki a Sesepasa, te kovana o Iuta.

⁹A mea kona: ko pōla aulo mō fai a taulaga — 30 ko pōla siliva mo fai a taulaga — 1,000 ko nisi pōla — 29 ko tamā pola aulo — 30 ko tamā pola siliva — 410 mo nisi meafale pena — 1,000

¹¹A te aofaki katoa o mea kona e 5,400 pōla aulo mo siliva mo nisi mea aka kola ne ave ne Sesepasa i te taimi ne foki atu ei a ia fakatasi mo nisi tino o te tafeaga mai i Papelonia ki Ielusalema.