Read Te Tusi Tapu I Te Gana Tuvalu Lomiga Lua ESELA 4 Bible Online

ESELA 4 - Te Tusi Tapu I Te Gana Tuvalu Lomiga Lua bible

ESELA 4

¹A tino kola e fai fili ki tino o Iuta mo Peniamina ne 'logo i tino kola ne 'foki mai mai te tafeaga ko toe faite nei ne latou a te Faletapu o te Aliki, te Atua o Isalaelu.

² Ne olo atu a latou kona ki a Selupapelu mo matai o kaukaiga kae fai atu ki a latou penei, “Talia mai ke fesoasoani atu matou ki a koutou i te faitega o te Faletapu. A matou e tapuaki foki ki te Atua tena e tapuaki koutou ki ei, ka ko matou nei ne ofo sale eiloa omotou taulaga ki a ia talu mai te taimi ne aumai ei matou ne Esalatonu, te tupu o Asulia, ke nofo i konei.”

³Ne tali atu Selupapelu mo Iosua mo matai o kaukaiga ki a latou penei, “A matou se ma'nako ki se fesoasoani mai i a koutou i te faitega o te Faletapu o te Aliki te motou Atua. Tuku ei ke faite eiloa ne matou e pela eiloa mo te fakatonuga a Kulesa, te tupu o Pelesia.”

⁴Tena la, a tino kona ne nofo i te fenua ne taumafai o fakamatakutaku te kau Iutaia kae faka'tuka olotou loto ke se faite te Faletapu.

⁵Ne togi tupe foki ne latou a ofisa o te malo o Pelesia ke taumafai o fakamasei te galuega o te Faletapu. Ne fai faeloa ne latou te amioga se 'lei tena i aso o te nofoaiga a Kulesa pela foki i te nofoaiga a Taliu.

⁶ I te kamataga o te nofoaiga a te tupu ko Asuelu, ne aumai ei a tusi e fakamasei ei a tino kola e nofo i Iuta mo Ielusalema ne olotou fili.

⁷I te taimi foki ne fai ei a Aletaseta mo tupu o Pelesia, ne tusi mai foki a te tusi a Pisilama mo Meteleta, mo Tapale mo tino e kau fakatasi latou, ki te tupu. A te tusi ne tusi i te gana Alamaika kae fakamatala i te taimi e faitau ei.

⁸A te kovana ko Lehuma mo Simisai te failautusi, ne tusi te la tusi ki a Aletaseta e uiga ki Ielusalema:

⁹“Mai i a Lehuma te kovana mo Simisai, te failautusi, pela foki mo tino kola e 'kau fakatasi mo laua, pela foki mo famasino mo ofisa katoa kola ne tagata mai Eleki, Papelonia, mo Susa i te fenua o Elama,

¹⁰fakatasi foki ei mo tino kola ne ave ne te tagata takutakua kae malosi ko Asula Panipala mai i koga ne nofo ei latou, o fakanofo i te fa'kai o Samalia mo kogā koga i te laukele i te feitu ki te Togala o te Eufilate.” [3]

¹¹Konei a muna o te tusi: “Ki te Tupu ko Aletaseta mai ana tavini ko tagata mai i te feitu ki te Togala o te Eufilate.

¹²“A matou e manako ke iloa ne Tou Malu i tino Iutaia kola ne o'mai ki konei mai i nisi kogā laukele o koe ko nofo nei i Ielusalema kae ko toe faite nei ne latou a te fa'kai masei tenei. Ko oti ne kamata te faitega ne latou a pui o te fa'kai kae ko se leva nei kae oti.

¹³Tou 'Malu, kafai ko palele ne toe faite te fa'kai tenei mo ona pui, ko tena uiga ko tino ka fakagata te 'togi lafoga mai, ko foliki ei te tupe e maua ne koe.

¹⁴A matou e i lalo o tau pulega, tela la, e se manako matou ke tupu se mea pena, kae i te motou manatu,

¹⁵ke fai ne koe se fakatonuga ke sukesuke a tusi e fakamau ei a tala tuku fakasolo kola ne tausi ne ou tupuga. Kafai e fai ne koe te mea tena, ka iloa ei ne koe i te fa'kai tenei se fa'kai e masani o teke ki te malo, kae mai taimi mua, ne fakatupu fakalavelave sale ki tupu mo takitaki o itumalo. A ona tino ko latou eiloa ko faigata o pulea. Tena te mea ne fakamasei ei a te fa'kai.

¹⁶Tela la, a matou e talitonu me kafai ko oti ne toe faite te fa'kai tenei mo ona pui, ka se mafai ne Tou 'Malu o pulea fakalei a te itumalo ko Eufilate ki te Togala.”

¹⁷Tenei te tali a te Tupu: “Ki a Lehuma te kovana mo Simisai te failautusi mo tino e kau fakatasi mo laua kola e nofo i Samalia pela foki i kogā koga o Eufilate ki te Togala. Talofa koutou.

¹⁸“A te tusi tela ne aumai ne koutou ki a au ko oti ne faitau mai ki a au i te gana e malamalama ei au.

¹⁹Ko oti ne fai taku fakatonuga ke sukesuke a tusi kona kae e tonu me ko oti ne maua a tala o Ielusalema i aso mua me se fa'kai ne masani o 'teke ki tino kola e pule ia latou, kae se fa'kai foki e fonu i tino teke ki te malo mo tino fakatupu fakalavelave.

²⁰E isi ne tupu takutakua ko oti ne fai mo tupu i kona, kae ko oti ne pule ne latou a te kogā fenua katoa o te Eufilate ki te Togala, kae 'tae ne latou a lafoga mo tupe mai i kona.

²¹Tela la, e tau o fai ne koutou se fakatonuga ke fakagata te toe faitega o te fa'kai tena ke oko ki te taimi e toe maua ei se tonu mai i a au.

²²Na fai eiloa te mea tena, ke mo a e matuku ifo te mea e maua sale ne au.”

²³I te taimi eiloa ne oko mai ei te tusi a Aletaseta ki a Lehuma mo Simisai mo tino e kau fakatasi latou, tena ne olo fakavave atu ei latou ki Ielusalema o taofi te galuega a te kau Iutaia i te toe faitega o te fa'kai.

²⁴A te galuega ki te faitega o te Faletapu ne fakagata muamua kae ne tumau eiloa pena ke oko eiloa ki te lua o tausaga o te nofoaiga a Taliu i Pelesia.