Read Te Tusi Tapu I Te Gana Tuvalu Lomiga Lua ESELA 6 Bible Online

ESELA 6 - Te Tusi Tapu I Te Gana Tuvalu Lomiga Lua bible

ESELA 6

¹Tena la, ne fai eiloa a te fakatonuga a te Tupu ko Taliu ke sukesuke faka'lei aka a tusi kola e fakamau ei a tala tuku fakasolo o te malo o Papelonia.

²Ne maua a te peluga pepa tena e fakamau ei a te fakatonuga a Kulesa i te fa'kai o Ekepatana i te itumalo o Metai. E penei a muna i te pepa tena:

³“I te tausaga muamua o te nofoaiga a te tupu ko Kulesa, ne fai tena fakatonuga ke toe faite a te Faletapu i Ielusalema ke fai mo koga e ofo sale i ei a taulaga kae sunu sale foki i ei a taulaga. A te Faletapu e tau o luasefulu fitu mita te maluga kae luasefulu fitu mita te lauefa.

⁴A 'pui e tau o tasi te laina o laupapa i luga i te taki tolu laina o fatu. A te togi, e togi katoa mai i te tupe a te malo.

⁵A meafale aulo mo siliva pela mo tui mo sipunu mo naifi kola ne puke ne te Tupu o Papelonia ko Nepukanesa mai i te Faletapu i Ielusalema o ave ki Papelonia, e tau nei o toe fakafoki ki koga tonu eiloa kola ne tuku ei i te Faletapu i Ielusalema.”

⁶Tenei te tali a Taliu ne fai: “Ki a Tatenai, te kovana o Eufilate ki te Togala, mo Setala Posenai, mo taina ofisa o koutou i Eufilate ki te Togala. “Faka mao keatea mo te Faletapu,

⁷kae sa fakalavelave ki te faiga o te galuega. Tuku ei ke toe faite a te Faletapu o te Atua i te koga ne tu ei muamua, ne te kovana o Iuta mo takitaki o Iutaia.

⁸Ko fakatonu atu nei au ki a koutou ke fesoasoani nei koutou ki te galuega. A te togi e tau o togi mai i tupe o te malo kola e maua mai i lafoga kola e togi mai ne tino o te Eufilate ki te Togala, ko te galuega ke se fakalavelavegina.

⁹I aso takitasi e tau eiloa o tuku ne koutou ki faitaulaga i Ielusalema so se mea e ma'nako mai ei latou ki ei: ko tamā pulumakau, ko mamoe io me ne tamā mamoe ke sunu mo fai taulaga ki te Atua o te lagi, io me ne saito, me ne uaina, io me ne sinu olive.

¹⁰E tau eiloa o fai a te mea tena ko te mea ke mafai ne latou o ofo olotou taulaga kola ka taliagina ne te Atua o te lagi kae ke talo foki latou ke maua se fakamanuiaga ki a au mo aku tama.

¹¹E toe faopoopo atu taku fakatonuga tenei: kafai se tino e se fakalogo ki te fakatonuga tena, e tau o tapale mai se utupoto laupapa mai tena fale o fakamakaikai tena mata e tasi, ko 'suki atu ei a ia ki ei. Ka ko tena fale ka fai pela me se faka'tuga kaiga.

¹²A te Atua tela ne filifili ne ia Ielusalema ke fai mo koga e tapuaki atu ei a tino ki a ia, ke fakatakavale ne ia so se tupu io me se malo tela e ofa ne ia a te fakatonuga tena io me e taumafai o fakamasei a te Faletapu tenei. Ko au, ko Taliu, ne fai ne au a te fakatonuga tena. Kae e tau o tausi ne koutou mo te fakamaoni.”

¹³Tena la, ne tautali eiloa a te kovana ko Tatenai, mo Setala Posenai, mo taina ofisa o latou ki te mea ne fakatonu mai ne te tupu.

¹⁴Ne fanofano lei eiloa a te galuega i lalo o te pulega a takitaki, Iutaia, kae ne fakamalosigina foki olotou loto ne pelofeta ko Hakai mo Sakalia. Ne palele te Faletapu a latou ne faite, e pela eiloa mo te fakatonuga a te Atua o Isalaelu mo te fakatonuga a Kulesa, mo Taliu mo Aletaseta, kola ko tupu o Pelesia.

¹⁵Ne palele te Faletapu a latou i te po tolu o te masina o Atala i te ono o tausaga o te nofoaiga a te tupu ko Taliu.

¹⁶Tena la, ne maopoopo ei a tino Isalaelu — ko faitaulaga, te kau sa Levi, mo tino katoa kola ne foki mai i te tafeaga o fakatapu a te Faletapu mo te fiafia lasi.

¹⁷I te faiga o te fakatapuga o te Faletapu, ne ofo atu ne latou e selau pulumakau, e luaselau mamoe, kae faselau tama mamoe, ke fai mo taulaga, kae e sefulu lua kouti ke fai mo taulaga mo agasala, e takitasi i matakaiga takitasi o Isalaelu.

¹⁸Ne fakatoka fakalei foki ne latou a faitaulaga mo te kau sa Levi i faiga o tapuakiga i te Faletapu i Ielusalema, e pela eiloa mo fakatonuga kola e tusi mai i loto i te tusi a Mose.

¹⁹ A tino kola ne foki mai mai te tafeaga, ne fakamanatu ne latou a te Paseka i te po sefulu fa o te masina muamua i te tausaga mai tua ifo.

²⁰A faitaulaga katoa, mo te kau sa Levi, ko oti ne faka'ma olotou foitino, tela la, ko 'ma eiloa latou i feitu fakatapuakiga. Ne tamate ne te kau sa Levi a manu mo fai a taulaga o te Paseka mō tino katoa kola ne foki mai i te tafeaga, pela foki mo faitaulaga, pela foki mō latou eiloa.

²¹A tino Isalaelu katoa kola ne foki mai i te tafeaga ne kai katoa i taulaga, pela foki a tino kola ko oti ne tiaki ne latou a amioga fapaupau a tino ne nofo i te fenua, kae ko tapuaki nei ki te Aliki te Atua o Isalaelu.

²²Ne fakamanatu ne latou mo te fia'fia lasi a te Kaiga o Falaoa se Fakafete, i aso e fitu. Ko oko eiloa latou i te fiafia me i te Aliki ne fai ne ia a te tupu o Asulia ke fiafia ki a latou, tena ne 'lago malosi ei a ia i te faiga o te galuega o te 'toe faitega o te Faletapu o te Atua o Isalaelu.