Read Te Tusi Tapu I Te Gana Tuvalu Lomiga Lua NEEMIA 10 Bible Online

NEEMIA 10 - Te Tusi Tapu I Te Gana Tuvalu Lomiga Lua bible

NEEMIA 10

¹Te tino muamua ne saina, ko te kovana ko Neemia te tama tagata a Hakalia, tafa atu ki ei ko Setekaia. Konei foki a igoa o tino ne saina:

²Ko Faitaulaga: Ko Selaia, Asalia, Ielemia, Pasula, Amalia, Malakita, Hatusa, Sepania, Maluka, Halima, Melemota, Opetaia, Tanielu, Kinetonu, Paluka, Mesulama, Avia, Mitiamina, Masia, Piligai, mo Semaia.

⁹Ko te Kau sa Levi: Iesua te tama tagata Asania, Pinui i te kaukaiga o Henatata Katamiela, Sepania, Hotia, Kelita, Pelaia, Hananu, Mika, Lehopa, Hasapaia, Sakula, Selepaia, Sepania, Hotia, Pani mo Peninu.

¹⁴Ko Takitaki o te Fenua: Palosi, Pahata Moapi, Elama, Satu, Pani, Puna, Asikata, Pepai, Atonia, Pikivai, Atini, Atela, Hesekia, Asula, Hotia, Hasuma, Pesai, Halifa, Anatota, Nepai, Mkapiasi, Mesulama, Hesila, Mesesapelu, Satoka, Iatua, Pelatia, Hananu, Anaia, Hosia, Hanania, Hasupa, Haloesa, Pila, Sopeka, Lehuma, Hasupana, Maseia, Aia, Hananu, Ananu, Maluka, Halima mo Paana.

²⁸A matou tino Isalaelu, faitaulaga, te kau sa Levi, tino tausi o te Faletapu, tino tātā lakau, tino ga'lue o te Faletapu mo tino katoa kola ne faka'logo ki te Tulafono a te Atua o fakamao keatea mai i tino fakaatea kola e nofo i te motou fenua, ko matou katoa kona, fakatasi mo omotou avaga mo omotou tama'liki kola ko ma'tua ko mafai o malamalama,

²⁹ko kau fakatasi matou mo omotou takitaki o tauto me ka tautali matou i te Tulafono a te Atua, tela ne tuku mai ne te Atua ki tena tavini ko Mose; ka malaia matou manafai e ofa ne matou te motou feagaiga tena. Ka tautali matou i mea katoa kola ne fakatonu mai ne te Aliki te motou Aliki, kae ka tausi eiloa matou ki ana tulafono mo ana fakatonuga.

³⁰ Ka se toe avaga matou ki tino fakaatea konei e nofo tasi matou i te motou fenua.

³¹ Kafai e o'mai a tino fakaatea o togi mai olotou saito io me ne isi mea aka ki a matou i te Sapati, io me se isi aso tapu aka foki, ka se togi eiloa ne matou olotou mea kona. I te taki fitu o tausaga katoa, ka se toe ga'lue matou ki omotou fatoaga, kae ka solo foki ne matou a kaitalafu a tino i a matou.

³² I tausaga takitasi, ka tuku atu ne matou taki tokotasi e lima kalame o siliva o fesoasoani ki te faiga o galuega o te Faletapu.

³³Ka aumai foki ne matou a mea e fai ei tapuakiga i te Faletapu: ko te falaoa tapu, ko taulaga saito i aso takitasi, ko manu vaefa kola e tau o sunu ke fai mo taulaga i aso takitasi, ko taulaga tapu mō te Sapati, pela foki mo te 'Kaiga Fiafia o te Masina Tu, mo nisi 'kaiga fiafia aka foki, ko nisi taulaga tapu, ko taulaga mō te fakamagaloga o agasala a Isalaelu, mo nisi mea aka kola e manakogia mō te Faletapu.

³⁴A matou, tino Isalaelu, faitaulaga mo te kau sa Levi, ka fai ne matou se vili i tausaga takitasi, ke fili sale ei a kaukaiga kola ka aumai ne latou ne fafie, e sunu ei a taulaga e ofo atu ki te Aliki te motou Atua.

³⁵ Ka avatu ne matou ki te Faletapu i tausaga takitasi a te saito muamua o te taukai, mo te fua muamua o fuaga lakau kola ko 'sulu.

³⁶ A tama tagata muamua a matou ka ave ne matou ki faitaulaga i te Faletapu, ke fakatapu mō te Atua, e pela eiloa mo te mea e manakogia i te Tulafono. Ka fakatapu foki ne matou tamā pulumakau muamua a omotou pulumakau, pela foki a tamā mamoe muamua mo tamā kouti muamua.

³⁷ Ka ave ne matou ki faitaulaga i te Faletapu a puta falaoa kola ne faite mai i te saito muamua o te taukai i tausaga takitasi, mo nisi taulaga uaina, sinu olive, mo nisi vaega fuaga lakau a matou. Ka ave ne matou ki te kau sa Levi kola e ao ne latou a takitasi vae sefulu mai i fa'kai fai fatoaga a matou, a takitasi vae sefulu mai lakau kaina kola e ola i te motou fenua.

³⁸ A faitaulaga mai te gafa o Alona e tau o nofo tasi mo te kau sa Levi i te taimi e ao ei a takitasi vae sefulu mai i tino. A te kau sa Levi e tau o ave ne latou e tasi vae sefulu mai takitasi vae sefulu kola ne ao ne latou mai i tino, o ave ki potu 'teu koloa o te faletapu.

³⁹A tino Isalaelu mo te kau sa Levi e tau o ave ne latou a lafoga o saito mo uaina mo sinu olive ki potu teu koloa kola e teu ei a meafale o te Faletapu pela mo sipunu mo tui mo naifi, ko koga foki kona e tu ei a koga nofo o faitaulaga kola e 'tu, mo sotia tiute o te Faletapu, mo te kau faipese o te Faletapu. E se mafai o fakapuli ne matou a te Fale o te motou Atua.