Read Te Tusi Tapu I Te Gana Tuvalu Lomiga Lua NEEMIA 11 Bible Online

NEEMIA 11 - Te Tusi Tapu I Te Gana Tuvalu Lomiga Lua bible

NEEMIA 11

¹A takitaki o te fenua e nofo katoa i Ielusalema, ka ko te 'toega o tino o te fenua, ne fai ne latou a vili e filifili ei a kaiga takitasi mai i te taki sefulu o kaiga ke olo o nofo i te fa'kai tapu o Ielusalema, ka ko te toega o kaiga ke olo o nofo i nisi fa'kai lasi mo fa'kai foliki.

²A tino o te fenua e tavae ne latou a tino kola e ofo ke nofo latou i Ielusalema.

³ I nisi fa'kai foliki mo fa'kai lasi, a tino Isalaelu, faitaulaga te kau sa Levi, tino ga'lue i te Faletapu, mo tino o te gafa o tavini a Solomona, e nofo eiloa i olotou manafa i olotou fa'kai. Tenei te fakasologa o igoa o tino matuatua o te itu malo o Iuta kola e nofo i Ielusalema:

⁴Ko Ataia te tama tagata a Usia kae ko te mokopuna o Sakalia. A nisi tupuga o ia ko Amalia, Sefatia, mo Malaelu, ko tino o te gafa o te tama tagata a Iuta ko Pelesa.

⁵Ko Maseia te tama tagata a Paluka, kae ko te mokopuna o Kolose. A nisi tupuga o ia ko Hasaia, Ataia, Ioialipa, mo Sakalia; ko tino o te gafa o te tama tagata a Iuta e igoa ki a Sela.

⁶Mai i tino o te gafa o Pelesa, e tusa mo te 468 tagata ma'losi e nofo i Ielusalema.

⁷Ko Salu te tama tagata a Mesulama kae ko te mokopuna o Ioeta. A nisi tupuga o ia ko Petaia, Kolaia, Maseia, Itielu, mo Iesaia.

⁸A Kapai mo Salai ko kaiga pili eiloa o Salu. E tusa mo te 928 tino i te matakaiga o Peniamina e nofo i Ielusalema.

⁹A Ioelu te tama tagata a Sikeli ko te takitaki o latou, ka ko Iuta te tama tagata a Hasenua ko te tokolua ofisa maluga i te fa'kai.

¹⁰Ko Ietaia te tama tagata a Ioialipa, mo Iakini.

¹¹Ko Selaia te tama tagata a Hilikia kae ko te mokopuna o Mesulama. A ona tupuga ko Satoka, Melaiota mo Aitupa te Faitaulaga Sili.

¹²E tusa mo te 822 tino o te kaukaiga tenei e galue i te Faletapu. Ko Ataia te tama tagata a Ieloamo kae ko te mokopuna o Pelalia. A nisi o ona tupuga ko Amisi, Sakalia, Pasula, mo Malakita.

¹³E tusa mo te 242 tino o te kaukaiga tena ko matai o kaiga takitasi. Ko Amasai te tama tagata a Asalelu kae ko te mokopuna o Asaia. A nisi o ona tupuga ko Mesilemota mo Imela.

¹⁴E tusa mo te 128 tagata o te kaukaiga tena ne sotia takutakua. A te takitaki o latou ko Sapatielu, se tagata i te kaiga maluga eiloa.

¹⁵Ko Semaia te tama tagata a Hasupa kae ko te mokopuna o Asilikama. A nisi o ona tupuga ko Hasapaia mo Puna.

¹⁶Ko Sapetai mo Iosapata, ne tino sa Levi takutakua eiloa kola e takitaki i galuega i tua o te Faletapu.

¹⁷Ko Matania te tama tagata a Mika kae ko te mokopuna o Sapeti, se tino i te gafa o Asafo. Ne takitaki ne ia a te kaufaipese o te Faletapu i te usuga o te talo fakafetai. Ko Pakapukia, tela ko te tokolua ki a Matania. Ko Apata te tama tagata a Samua kae ko te mokopuna o Kalala, se tino i te gafa o Ietutunu.

¹⁸A te aofaki katoa o te kau sa Levi kola e nofo i te fa'kai tapu ko Ielusalema e tusa mo te 284.

¹⁹Ko Akupa, Talamoni, mo olotou kaiga, e tusa mo te 172 te aofaki katoa.

²⁰A te toega o tino Isalaelu, mo faitaulaga, mo te kau sa Levi, e nofo eiloa i olotou manafa i nisi fa'kai lasi mo fa'kai foliki o Iuta.

²¹A tino ga'lue o te Faletapu e nofo i te sua feitu o Ielusalema e igoa ko Ofele kae e galue i lalo o te fakatonutonuga a Siha mo Kisepa.

²²A te tino fakatonutonu o te kau sa Levi tela e nofo i Ielusalema, ko Usi te tama tagata a Pani kae ko te mokopuna o Hasapaia. A ona tupuga ko Matania mo Mika, ka ko ia se tino i te kaukaiga o Asafo, te kaukaiga tātā lakau o te Faletapu.

²³E isi ne fakatonuga a te malo ke fakasolosolo sale a kaukaiga i te takitakiga o pese i te Faletapu i aso takitasi.

²⁴Ko Petaia te tama tagata a Mesesapelu, mai i te kaukaiga o Sela i te matakaiga o Iuta, e sui ne ia te fenua o Isalaelu i te fono i Pelesia.

²⁵E tokouke eiloa a tino e nofo i fa'kai i tafa o olotou manafa mo fatoaga. A tino i te matakaiga o Iuta e nofo i Kiliata Alapa, i Tipono, mo Iekapaselu, mo fa'kai foliki i tafa o fa'kai lasi kona.

²⁶E nofo foki latou i fa'kai o Iesua, Molata, Petepelete,

²⁷mo Hasalasualo, pela foki i Pelesepa, mo fa'kai i tafatafa.

²⁸E nofo latou i te fa'kai o Sikilaka, i Mekona mo ona fakai foliki,

²⁹i Enelimoni, i Sola mo Ialamuta,

³⁰i Sanoa, i Atulama, mo fa'kai foliki ei i tafatafa o fa'kai kona. E nofo foki latou i Lakisa mo laukele pili atu, pela foki i Aseka mo ona fa'kai foliki. Tena la, a tino o Iuta e nofo i te kogā laukele i te va o Pelesepa i saute mo te Vanu o Hinomo i matu.

³¹A tino i te matakaiga o Peniamina e nofo i Kepa, Mekemase, Ai, Peteli, mo fa'kai foliki i tafatafa o fa'kai kona,

³²i Anatota, Nopa, Anania,

³³Hasola, Lama, Kitaima,

³⁴Hatita, Sepoima, Nepalata,

³⁵Loto, mo Ono, pela foki i te Vanu o Tufuga.

³⁶A nisi potukau sa Levi kola ne nofo i te kogā fenua o Iuta ko ave ke nofo tasi mo tino Peniamina.