Read Te Tusi Tapu I Te Gana Tuvalu Lomiga Lua NEEMIA 13 Bible Online

NEEMIA 13 - Te Tusi Tapu I Te Gana Tuvalu Lomiga Lua bible

NEEMIA 13

¹ I te taimi ne faitau mai ei a te Tulafono a Mose ki tino o te fenua, ne lagona ei ne latou me isi se mea a fai pela i tino Amoni mo Moapi e tapu ma fakatasi ki tino o te Atua.

² Ne fai te tulafono tena, me i tino Amoni mo Moapi ne seki aumai ne latou ne meakai io me ne vai ki tino Isalaelu i te taimi ne o mai ei latou keatea mai Aikupito. Ne tuku ne latou ne tupe ki a Palaamo ke muna 'tuku ne ia tino Isalaelu, ka ko te motou Atua ne fuli ne ia a te muna fakamalaia tena ki te muna fakamanuia.

³I te lagonaga ne tino Isalaelu a te faitaumaiga o te tulafono tena, tena ne vae keatea ei ne latou a tino fakaatea katoa mai te fakapotopotoga a tino Iutaia.

⁴A te faitaulaga ko Eliasipa, te pule i potu teu koloa o te Faletapu, ko leva eiloa ne masani sale mo Tovia.

⁵Ne talia ne ia ke fakaaoga ne Tovia a te potu lasi tela ne fai mo 'teu a taulaga saito mo mea ma'nogi, mo mea e fakaaoga i te Faletapu, mo taulaga mō faitaulaga, mo tasi vae sefulu o saito, uaina, mo sinu olive kola e ave ma te kau sa Levi, te kau fai pese o te Faletapu, mo te kau galue o te Faletapu.

⁶I te taimi ne fai ei a mea kona, ka ko au e seki nofo i Ielusalema, me i te tolusefulu lua o tausaga o te nofoaiga a Aletaseta[9] te tupu o Papelonia, ne foki atu ei au o asi ki a ia. I se taimi fakamuli ifo, ne toe maua toku taliaga mai i a ia,

⁷tena ne toe foki mai ei au ki Ielusalema. I taku oko atuga, ne poi aka ei au i a Eliasipa ne talia ne ia ke fakaaoga ne Tovia se potu e tasi i te Faletapu.

⁸Ko oko eiloa i toku kaitaua tena ne laku katoa ne au ki tua a mea katoa a Tovia.

⁹Ne fai taku fakatonuga ke fai se sauniga ke faka'ma a potu o te Faletapu, kae ke faka'foki mai katoa a mea o te Faletapu, taulaga saito, mo mea ma'nogi ki koga e tau o tuku ei.

¹⁰ Ne iloa aka foki ne au me i te kau fai pese o te Faletapu mo nisi sa Levi ko tiakina ne latou Ielusalema o foki atu ki olotou manafa, me e se lava mea e maua mai i tino mo tausi latou.

¹¹Ne kote ne au a ofisa me ne seki saga ki te Faletapu, kae toe fakafoki mai ne au a te kau faipese mo te kau sa Levi o toe fakagalue i te Faletapu.

¹² Tena ne toe kamata o aumai ne tino Isalaelu katoa a olotou tasi vae sefulu o saito, uaina mo sinu olive.

¹³Ne fili ne au a tagata konei ke pule i potu teu koloa: ko Selemia, se faitaulaga; Satoka, se tagata poto i te Tulafono; mo Petaia, se sa Levi. Ko Hananu te tama tagata a Sakula kae ko te mokopuna o Matania ko te fesoasoani o latou. Au e talitonu me ka fakamaoni eiloa a tagata kona i te vaevaega o mea kona ki te kau galue a latou.

¹⁴Toku Atua, masaua a mea katoa konei ko oti ne fai ne au mō tou Faletapu, pela foki mo tapuakiga.

¹⁵ I te taimi tena, e lavea ne au a tino i Iuta e 'tau a sua o vine i te Sapati. A nisi tino e fakauta mai olotou asini ki saito, uaina, vine, mati, mo nisi mea ake foki, kae olo mo latou ki Ielusalema; ne fai faka'lei au ki ei ke tapu ne mea e togi atu i te Sapati.

¹⁶E isi ne tagata mai te fa'kai o Tulo e nofo i Ielusalema, ne aumai ne latou a ika mo mea valevale ki loto i te fa'kai o togi atu ki omotou tino i te Sapati.

¹⁷Ne kote ne au a takitaki o te kau Iutaia, aku muna penei, “Kiloke ki te amioga se 'lei tena ko fai ne koutou! Ko fai ne koutou te Sapati ke se 'malu.

¹⁸Tena eiloa te pogai ne fakasala ei ne te Atua a otou tupuga i te fakamaseiga ne ia o te fa'kai tenei. Kae nei ko soli foki ne koutou a te Sapati, ko tena uiga ko ma'nako foki koutou ke fakasala koutou ne te Atua.”

¹⁹Tena la, ne fai ei taku fakatonuga ke pono a mataloa o te fa'kai i te taimi e kamata ei te Sapati, i te afiafi,[10] kae ke se tala eiloa vagana ke oti eiloa te Sapati. Ne faka'tu ne au a nisi tagata i mataloa o te fa'kai ke onoono faka'lei ke seai se mea e aumai ki loto i te fa'kai i te Sapati.

²⁰E fakatasi me fakalua taimi, a tino fai mea togi mea valevale e moe eiloa i tua o te 'pui i te po o te aso lima.

²¹Ne faipati atu au ki a latou penei, “E seai se aogā e faka'tali mai ei koutou i tua na, ke oko ki te taeao. Kafai e toe fai ne koutou te mea tena, ko au ka fakaaoga toku malosi o afuli koutou.” Mai te taimi tena, ne seki toe 'foki mai eiloa latou i se Sapati.

²²Ne fakatonu atu au ki te kau sa Levi ke faka'ma olotou foitino kae ke olo o tiute a mataloa a te fa'kai o onoono faka'lei ko te Sapati ke faka'malu. Te Atua, masaua mai foki au i mea kona ne fai ne au, kae fakasao mai au i tou alofa lasi.

²³ I te taimi tena, ko iloa aka foki ne au me ko tokouke a tino Iutaia ko avaga ki fafine Asetota, Amoni, mo Moapi.

²⁴Te afā o tamaliki a latou e faipati ki te gana Asetota io me ko nisi gana aka, kae se iloa o fai'pati ki te gana a matou.

²⁵Ne kote ne au a tagata kona, lau atu mo muna fakamalaia ki a latou kae kini kae unu olotou laulu. Tena ne fakatauto ne au latou i te igoa o te Atua ke tapu eiloa e toe avaga latou io me ko olotou tama ki tino fakaatea.

²⁶ Aku muna penei, “Ko fafine o fenua fakaatea ne mafua ei te fai agasala a Solomona. A ia se tagata e sili atu i tupu katoa o nisi malō. Ne alofa te Atua ki a ia, tena ne fai ei ne ia ke fai mo tupu i luga i Isalaelu katoa, kae na agasala eiloa a ia.

²⁷I te otou faka'tau, se mea tau ke tau'tali atu matou i te mea tena e fai ne koutou, ko teke ei matou ki te motou Atua i te a'vaga atu o matou ki fa'fine fakaatea?”

²⁸ A Ieoiata ko te tama tagata a Eliasipa te Faitaulaga Sili, kae e isi se tama tagata a ia ne avaga ki te tama fafine a Sanipalata, mai te fa'kai o Peta Holono, tena ne fai ei au ki a Ieoiata ke fano keatea mai i Ielusalema.

²⁹Te Atua, masaua me ko fakaseaoga ne tino konei te tofi faitaulaga pela foki mo te feagaiga a koe ne fai mo faitaulaga mo te kau sa Levi.

³⁰Ne faka'ma ne au a tino mai i amioga mai fenua fakaatea; ne fakatoka ne au a fakatonuga ke tau'tali ei a faitaulaga mo te kau sa Levi, ko te mea ke iloa ne latou olotou tiute e tau o fai.

³¹Ne fakatonu ne au a fafie e sunu ei taulaga ke aumai i taimi 'tau, mo tino ke aumai olotou taulaga o te saito muamua mo fuaga lakau muamua kola e sulu. Te Atua, masaua a mea katoa kona, ke manuia ei au.