Read Te Tusi Tapu I Te Gana Tuvalu Lomiga Lua NEEMIA 4 Bible Online

NEEMIA 4 - Te Tusi Tapu I Te Gana Tuvalu Lomiga Lua bible

NEEMIA 4

¹I te logooga a Sanipalata i a matou, te kau Iutaia, ko oti ne kamata o toe faite a pui o te fa'kai, ko oko eiloa i ana kaitaua kae ko vau o fakatauemu matou.

²Ne faipati mai a ia ki a matou i mua o tena kau mo te kautau a Samalia, muna a ia, “Ne a mea a te kau Iutaia fakavale'vale konei e taumafai o fai? I te lotou faka'tau e mafai o palele te lotou galuega i te aso e tasi manafai e ofo atu olotou taulaga? E mafai ne latou o faite a fatu mo fai te galuega mai i te faka'tuga fatu konei ko oti ne sunu?”

³A Tovia e tu mai foki i kona, i tafa o Sanipalata, kae fai mai foki a ia penei, “Se vaega pui pefea e mafai ne latou o faite? Kaati e mafai fua ne te alope o tule ki lalo te pui tena!”

⁴Ne talo au penei, “Te Atua, fakalogo mai ki a latou konei e mai o fakalili matou! A muna fakatauemu a latou ke foki atu eiloa ki a latou. Ke fao malo ne tino a mea katoa a latou, kae ke ave fakapagota latou ki se fenua fakaatea.

⁵Sa fakamagalogina a amioga ma'sei a latou konei e fai, kae sa puli foki a agasala a latou, me konei e fakaitaita mai ki a matou konei e ga'lue.”

⁶Tena la, ne fai eiloa te motou galuega i te toe faitega o te pui o te fa'kai, te mea eiloa ko nofo i te afā te maluga ki luga o te pui, me i tino ko oko eiloa i te loto malosi o galue.

⁷Ne 'logo a Sanipalata mo Tovia mo tino o Alapi, Amoni mo Asetota i te gasolosolo 'lei o te galuega a matou i te faitega o te pui o Ielusalema, mo pu foki i te 'pui ko oti ne pono, tena ko oko eiloa i olotou ita.

⁸Tena la, ne kau fakatasi latou o mafaufau o taua mai ki Ielusalema o fakamasei te galuega,

⁹ka ko matou ne talo ki te motou Atua kae fakatu omotou sotia ke tiute i ao mo po.

¹⁰E isi se pese a tino Iutaia ne usu ne latou penei: “A matou ko gasolo o vaivai i te amoga o amoga; Ko oko eiloa i te uke o faka'tuga fatu masei e tali keatea. E mafai pefea ne matou o faite te pui tenei i te aso nei?”

¹¹A omotou fili e leake eiloa nei me ka se lavea ne matou a latou, io me ka se iloa ne matou manafai ko oko mai latou o tamate valevale matou kae fakagata te motou galuega.

¹²Kae e 'lei me i tino Iutaia kola e nofo tasi mo omotou fili e o'mai faeloa o fakailoa mai ki a matou a fuafuaga a omotou fili e fai sale o taumafai o 'ta matou.

¹³Tena la, ne tuku atu ne au a mea tau ki tino, ko pelu mo tao mo kausana, kae fakatu ne au latou i olotou kaukaiga i loto o te pui, i koga kola e seki oti ne toe faite.

¹⁴E lavea ne au i tino ko oko eiloa i te manava'se, tena ne faipati atu ei au ki a latou mo olotou takitaki mo ofisa penei, “Sa ma'taku i fili o tatou. Masaua i te 'tou Aliki e 'mana kae fakamataku, tela la, ke taua koutou mō te lei o tino o te otou fenua, otou tamaliki, otou avaga, mo otou fale.”

¹⁵Ko iloa ne omotou fili me i matou ko 'logo i olotou togafiti ma'sei, kae ko iloa foki ne latou i olotou fuafuaga ko fakaseaoga ne te Atua. Tena, ne toe 'foki atu katoa matou o toe faite a te 'pui.

¹⁶Mai te taimi tena, te sua vaega o taku kau e ga'lue, ka ko te sua vaega e tiute, e pei ki olotou gatu tau, kae tu mo olotou tao, talita, mo kausana. Ka ko omotou takitaki e saga malosi eiloa ki omotou tino kola e galue i te 'pui.

¹⁷Ke oko foki eiloa ki tino kola e tali mai ne latou a mea e fai ei te galuega, e galue te sua lima ka ko te sua lima e pukepuke i te mea tau,

¹⁸ka ko tino katoa kola e ga'lue e tofu mo pelu e fakamau i olotou kaokao. A te tagata tela e fakatagi ne ia a te pu o te fili e nofo i oku tafa.

¹⁹Ne fai atu au ki tino mo olotou takitaki mo ofisa penei, “A te pui nei ko oko eiloa i te lasi, tela la, tatou e ga'lue vava'mao.

²⁰Kafai e lagona ne koutou te pu ko tagi, tele mai eiloa ki oku tafa. A te tou Atua ka taua mō tatou.”

²¹Tela la, i aso katoa, mai te tafataeao ke oko ki te taimi e sae ei a fetu o te lagi, te afā o matou e ga'lue i te pui, ka ko te sua afā e tiute mo tao i olotou lima.

²²I te taimi tenei, au ne fai ki takitaki mo olotou fesoasoani ke 'tau o nofo i Ielusalema i te po, ko te mea ke mafai ne matou o tiute te fa'kai i te po kae galue i te ao.

²³E seki ui eiloa oku gatu i se po, pela foki taku kau mo aku tavini mo te sotia e tiute ne ia a au. Ka ko omotou meatau e toka faeloa i omotou lima.