Read Te Tusi Tapu I Te Gana Tuvalu Lomiga Lua NEEMIA 5 Bible Online

NEEMIA 5 - Te Tusi Tapu I Te Gana Tuvalu Lomiga Lua bible

NEEMIA 5

¹I se taimi fakamuli ifo, a tino Iutaia, tagata mo fafine, ko kamata o muimui ki olotou taina Iutaia foki eiloa.

²Muna a nisi o latou penei, “A omotou kaiga e tokouke kae e manako matou ki ne saito ke kai matou ke ola matou.”

³Muna a nisi penei, “A matou nei e togi atu omotou fatoaga mo omotou togavine mo omotou fale ke maua ne saito a matou mo omotou kai i a matou ma mate i te fiakai.”

⁴Ka ko nisi ne fai aka foki penei, “A matou nei e kaitalafu foki i tupe ke togi ei a lafoga o omotou fatoaga mo togavine ki te malo.

⁵A matou nei ne tino o te fenua e tasi mo omotou taina Iutaia. E a, a omotou tamaliki nei e se pau mo olotou tamaliki? Kae nei, a omotou tamaliki e fai mo pologa. A nisi o omotou tamaliki fafine ko leva ne fakatau atu ke fai mo pologa. A matou nei ko seai se mea e mafai o fai me i omotou fatoaga mo togavine ko oti ne puke keatea mai i a matou.”

⁶I te lagonaga ne au a pati muimui a latou, ko oko eiloa i toku kaitaua, tena ne mafaufau ei au o fai se mea.

⁷ Ne kaitaua au ki takitaki mo ofisa o te fenua kae fai atu ki a latou penei, “A koutou ko fakapuapuaga ne koutou otou taina!” Ne fakamaopoopo ne au a te fenua ke fakamasino te mataupu, kae fai atu au ki a latou penei.

⁸“I te mea e mafai ne matou, tenei ko oti ne toe togi mai ne matou omotou taina Iutaia kola ne togi atu olotou foitino ke fai mo pologa ki tino o fenua fakaatea. Nei, a koutou ko fai malo ne koutou otou taina ke togi atu olotou foitino ke fai mo pologa a koutou!.” A takitaki ko se faipati me ko se iloa ne latou me ne a olotou pati ka fai.

⁹Tena, kae fai atu au penei, “A te mea tenei e fai ne koutou se mea se lei! E tau mo koutou o ma'taku ki te Atua kae fai te mea tonu. Tena la, e seai se avanoaga o tino fakaatea o faka tauemu mai ki a tatou.

¹⁰Ne talia ne au a tino ke kaitalafu i tupe mo saito mai i a au, e pela foki mo taku kau mo tagata kola e galue i a au. I te taimi nei, ke se toe olo tatou o fai ki tino kola ne kaitalafu i a tatou ke toe togi mai olotou kaitalafu.

¹¹Taumafai o solo keatea a kaitalafu a latou ia koe — me ne tupe, me ne saito, me ne uaina io me ne sinu olive. Kae toe fakafoki atu ki a latou olotou fatoaga, togavine, togā olive, mo olotou fale!”

¹²Ne tali mai a takitaki penei, “Ka fai ne matou te mea tena e fai mai ei koe, ka toe fakafoki atu ne matou olotou mea kae se puke mai ne matou olotou kaitalafu.” Ne kalaga atu au ki faitaulaga ke o'mai kae fai ne au a takitaki ke tauto i mua o latou ke tausi te feagaiga ko oti ne fai ne latou.

¹³Ne tapale ne au te fusi[3] tela e fusi i toku taugasulu kae lulu ne au. Muna a aku penei, “Ka lulu penei koutou ne te Atua manafai se tausi koutou ki te otou feagaiga. Ka ave keatea ne te Atua a otou fale mai i a koutou, pela foki mo mea katoa a koutou kae ka seai eiloa ne otou mea.” A tino katoa kola ne nofo i kona ne fai aka olotou muna penei, “E tonu, e tonu!” Tena kae vikia ei ne latou te Aliki. Ka ko takitaki ne tausi eiloa ki te lotou feagaiga.

¹⁴I tausaga e sefululua, ne fai ei au mo kovana o te fenua o Iuta, mai te luasefulu o tausaga o te nofoaiga a Aletaseta te tupu, ke oko ki te tolusefulu lua o tausaga o tena nofoaiga, e seki kai eiloa au io me ko oku kaiga ki meakai kola e tau o maua ne au i toku tofi ko te kovana.

¹⁵A kovana katoa kola i oku mua ne fakapuapuaga ne latou te fenua kae ne ma'nako ke maua e fasefulu tupe siliva i aso takitasi, mo togi meakai mo uaina. Ke oko foki eiloa ki olotou tavini ne fakafita ne latou a tino. Ka ko au e se fai pena, me i a au e mataku ki te Atua.

¹⁶Ne fakaoti toku malosi i te toe faitega o te 'pui kae e seki maua eiloa ne au ne mea lei. A tino katoa kola ne galue i a au, ne fakatasi katoa ki te galuega o te toe faitega o te pui.

¹⁷A tino e fagai sale ne au i toku fale e tusa mo te selau limasefulu tino Iutaia mo olotou takitaki, kae e kese foki eiloa a tino kola e o'mai ki a au mai malo pili mai.

¹⁸I aso katoa, e tuku atu ne au e tasi te pulumakau tagata, e ono mamoe tafasili i te lei, mo moa e uke ke kai ei a tino i toku fale; kae i te taki sefulu o aso, e aumai sale eiloa ne au a te uaina fou. Kae e iloa eiloa ne au a te mafa o te amoga tena ki tino, tela la, e seki manako au ke maua ne au te tupe tela e tau o maua ne te kovana.

¹⁹Te Atua, au e 'talo atu ki a koe ke masaua ne koe a mea lei konei ko oti ne fai ne au ki tino konei.