Read Te Tusi Tapu I Te Gana Tuvalu Lomiga Lua NEEMIA 9 Bible Online

NEEMIA 9 - Te Tusi Tapu I Te Gana Tuvalu Lomiga Lua bible

NEEMIA 9

¹I te po luasefulu fa o te masina eiloa tena, ne maopoopo a tino Isalaelu o fakaliki'liki mō tapuakiga, e fakaasi i ei te fanoa'noa o latou e tusa mo agasala a latou ne fai. Ko leva foki latou ne faka'mao keatea mai i tino o fenua fakaatea. Ne 'pei latou ki gatu lautaga, kae tuku mo pefu ki luga i olotou ulu, e fakaasi ei te lotou fanoa'noa. Tena, ne tu ei latou ki luga o fakatoese atu ki te Aliki e tusa mo olotou agasala mo agasala a olotou tupuga ne fai.

³E tusa mo te tolu itula ne faitau atu ei a te Tulafono a te Aliki te lotou Atua ki a latou, ka ko te sua tolu itula mai tua ne fakatoese ei latou ona ko olotou agasala kae tapuaki atu ki te Aliki te lotou Atua.

⁴E isi se tulaga laupapa maluga i kona mō te kau sa Levi, kae ne tu mai luga i ei ko Iesua, Pani, Katamiela, Sepania, Puna, Selepaia, Pani mo Kenani. Ne talo latou ki te Aliki te olotou Atua, mo olotou leo e fai eiloa i luga.

⁵Konei a igoa o te kau sa Levi kola ne fai ne latou a muna kamata o te sauniga: ko Iesua, Katamiela, Pani, Hasapeneia, Selepaia, Hotia, Sepania mo Petaia. Muna a latou: “Tu mai ki luga o viki atu ki te Aliki te otou Atua; Viki atu ki a ia ki te se gata mai, se gata mai eiloa! A tino katoa ke viki atu ki tena igoa malu, Tiga eiloa e seai se vikiga faka‐te‐lalolagi e katoatoa i te lei.”

⁶Tena, ne talo atu ei a tino Isalaelu i te talo tenei: “Te Aliki, ko koe fua tokotasi ko te Aliki; Ne faite ne koe a te lagi mo fetu o te vanimonimo. Ne faite ne koe a te fenua mo te tai mo mea katoa i ei; Ne tuku mai foki ne koe a te ola ki mea katoa. A te kau o te lagi e ifo kae tapuaki atu ki a koe.

⁷ Ko koe te Aliki te Atua ne filifili ne koe a Apelamo Kae ne taki ne koe a ia mai Ulo i Papelonia; Kae ne fuli ne koe tena igoa ki a Apelaamo.

⁸ Ne iloa aka ne koe me i a ia se tagata e fakamaoni atu ki a koe Tena ne fai ei ne koe tau feagaiga mo ia. Ne tauto koe ki a ia ke tuku atu mō ia a te fenua o tino Kanana, Mo te fenua o tino Heti mo tino Amoli, Mo te fenua o tino Pelise, tino Iepuse mo tino Kilikase, Ke fai mo fenua ka nofo ei a tino o tena gafa. Ne tausi eiloa ne koe tau feagaiga, me i a koe e fakamaoni.

⁹“Ne lavea ne koe a te puapuaga o omotou tupuga i Aikupito; Ne lagona ne koe te ka'laga a latou mō se fesoasoani i te Tai Kula.

¹⁰ Ne fai ne koe a mea fakaofoofogia ki te tupu mo ana ofisa mo tino o te fenua o Aikupito, Me e iloa ne koe me e fakafita ne latou ou tino. I te taimi tena, ne kamata ei o takutakua tou igoa, tenei eiloa e oko mai ki aso nei.

¹¹ I loto i te tai, ne fakatoka i ei ne koe se auala mo sasale tou fenua, Kae ne 'taki atu ne koe a latou i loto i ei i luga i te laukele malo. A latou kola ne o'mai o afuli ou tino ne ma'lemu i te moana 'poko, E pela me se fatu e apulu i te tai sou.

¹² Ne 'taki ne koe latou i te ao ki te pou kaumana, Kae i te po ne fakamaina ne koe te lotou auala ki te afi.

¹³ I te Mauga o Sinai ne fanaifo ei koe mai te lagi; Ne faipati koe ki ou tino Kae ne tuku atu ne koe ki a latou a tulafono lei mo akoakoga gali.

¹⁴Ne akoako ne koe a latou ke tausi tou Sapati malu, Kae ne tuku atu foki ne koe au tulafono ki a latou e auala i tau tavini ko Mose.

¹⁵ “I te taimi ne fia kai ei latou, ne tuku atu eiloa ne koe a te falaoa mai i te lagi, Kae ne faka'sali mai ne koe a te vai mai i te kaupapa i te taimi ne fiainu ei latou. Ne fai koe ki a latou ke puke mō latou a te fenua tela ne tauto koe ke tuku mō latou.

¹⁶ Ka ko omotou tupuga ne gasolo o fakamatamata kae loto ma'keke Kae ita ma faka'logo ki au fakatonuga.

¹⁷ Ne ita latou ma fakalogo, ne puli i a latou a mea katoa a koe ne fai; Ne puli i a latou a vavega katoa kola ne fai ne koe. Mai luga i te fakamata'mata o latou ne fili ei ne latou se takitaki mo latou, Ke toe faka'foki latou ki te olaga fakapologa i Aikupito Kae e lei i a koe ko te Atua e loto fakamagalo; A koe e alofa, kae fui kaitaua. A tou alofa e tafasili i te lasi, tena seki tuku tiaki atu ei ne koe a latou.

¹⁸Ne faite ne latou se tupua e foliga ki te pulumakau Kae fai mai olotou muna me tena te atua ne 'taki mai ne ia latou keatea mai Aikupito! Te Aliki, ko oko eiloa i te uke o amioga masei a latou ki a koe!

¹⁹ Kae e seki tiakina atu ne koe a latou i te vao, Me i tou alofa e lasi mō latou. E seki ave keatea foki ne koe a te pou kaumana mo te pou afi tela e takitaki ei te lotou auala i te ao mo te po.

²⁰Ko tou aga'lei, tena ne fakatonu atu ei koe ki a latou a mea e tau o fai ne latou; Ne fagai ne koe a latou ki manai kae tuku atu foki ne koe a vai ke inu ei latou.

²¹I te fasefulu tausaga o latou i te vao Ne tuku atu faeloa ne koe a mea e ma'nako latou ki ei; A olotou gatu e se mafai o ma'sei, Mo olotou vae e seki 'pala aka eiloa.

²² “Ne fai ne koe ke fakatakavale sale ne latou a malo e uke, Mo fenua kola e tuakoi mai ki a latou. Ne fakatakavale ne latou te fenua ko Hesepono tela e pule Ne Sekono mo te fenua o Pasana tela e tupu i ei a Oko.

²³Ne tuku atu ne koe ki a latou ne fanau e tokouke pela mo fetu o te lagi i te uke. Kae tuku atu ne koe ke fakatakavale ne latou a te fenua ne tauto ne koe ki olotou tupuga, kae ke nofo foki i ei.

²⁴ Ne puke ne latou a te fenua o Kanana, ko koe ne fakatakavale ne koe a tino kona e nofo i kona. Ne tuku atu ne koe ki ou tino a te malosi o fai a mea e ma'nako latou o fai ki tino mo tupu o Kanana.

²⁵ Ne fao malo ne ou tino a fa'kai e fai olotou olo, Mo laukele ola, mo fale e fonu i koloa, mo vaikeli ko oti ne keli, Mo lakau ko olive, mo lakau fai fuaga, mo toga‐vine. Ne kai latou i mea e ma'nako latou ki ei, Tena ne ga'solo ei latou o puta; Ne fakaaoga mo te fiafia ne latou a mea katoa ne tuku atu ne koe ki a latou.

²⁶ “Ka ko ou tino ne teke kae se fakalogo ki a koe, Ne fulitua latou ki tau Tulafono. Ne tamate ne latou a pelofeta kola ne o'mai o ka'laga ki a latou ke toe fuli atu ki a koe Ne fakaitaita faeloa ne latou a koe,

²⁷Tena ne tuku atu ei ne koe latou ke fakatakavale ne olotou fili, kae ke pule foki i a latou. I taimi ne puapuaga ei latou kae ne ka'laga atu ki a koe mō se fesoasoani, Kae ne tali atu koe ki a latou mai i te lagi. Mai luga i tou alofa lasi, ne uga atu ei ne koe takitaki kola ne o'mai o faka'sao latou mai olotou fili.

²⁸Kafai ko oko ki taimi o te filemu, ko toe agasala foki ei latou, Tena kae tuku atu foki ne koe latou ki lima o olotou fili. Kae i te taimi ne salamo ei latou mai olotou agasala kae ko kalaga atu ki a koe ke faka'sao aka latou, Kae ne lagona ne koe te lotou tagi mai i te lagi, Kae ne fakasao faeloa ne koe latou i tou alofa.

²⁹ Ne fai koe ki a latou ke faka'logo ki au akoakoga, Kae mai te lotou fakamata'mata ne teke ei ne latou au tulafono, Kae e iloa faeloa ne latou me ko te tausi ki tau Tulafono ko te auala tena ki te ola; Kae ko te loto ma'keke mo te fia 'toa o latou tena ne ita ei ma faka'logo ki au tulafono.

³⁰ I tausaga takitasi, e fai faeloa koe ki ei ke sa kalo keatea mai au tulafono. Ne uga ne koe au pelofeta ke faipati ki a latou, Ka ko ou tino e 'tuli olotou taliga, Tena ne tuku atu ei ne koe latou ke fakatakavale ne nisi malo.

³¹Kae ne seki tiaki io me 'ta fakapalele ne koe a latou, Me i a koe e lasi tou alofa. A koe se Atua alofa kae aga'lei!

³² “Te Atua te motou Atua, a koe e tafasili i te maluga! A koe e mana kae fakamataku! A koe e fakamaoni faeloa o tausi au feagaiga. Mai i te taimi ne fakafita ei matou ne tupu o Asulia, Ke oko mai eiloa ki aso nei, ko oko eiloa i omotou puapuaga! A omotou tupu, mo takitaki, mo faitaulaga mo pelofeta, Mo omotou tupuga, mo omotou tino katoa ko oti ne puapuaga. Masaua te puapuaga ko oti ne oko ki a matou!

³³Se mea 'tau te fakasala ne koe a matou; A koe ne tumau tou fakamaoni, e ui eiloa i a matou ko oti ne agasala.

³⁴A omotou tupuga, omotou tupu, omotou takitaki, Mo omotou faitaulaga ne seki tausi ki au Tulafono. Ne seki faka'logo latou ki au fakatonuga mo au muna akoako.

³⁵Ne fakamanuia ne koe a tupu kola ne takitaki i tou fenua i te taimi ne nofo ei latou i te fenua lasi kae laukele ola tela ne tuku ne koe mō latou; Kae ne seki fulitua eiloa latou mai olotou agasala, O tavini atu ki a koe.

³⁶Kae nei, a matou ko fai mo pologa i te fenua tenei ne tuku mai ne koe mo matou, Te fenua laukele ola tenei e maua ei omotou mea'kai.

³⁷A te mea e fua mai ne te laukele e ave ki tupu kola ne tuku ne koe ke pule i a matou, Me i a matou ne agasala. E pule eiloa latou i mea e fai ne latou ki a matou mo omotou pulumakau, Tela la, ko oko eiloa i te motou puapuaga!”

³⁸Mai mea katoa konei ne tupu, ko fai ei te feagaiga malu a matou, tino Isalaelu, ka ko omotou takitaki, mo te kau sa Levi mo omotou faitaulaga ko saina ne latou te feagaiga.