Read Te Tusi Tapu I Te Gana Tuvalu Lomiga Lua ESETA 3 Bible Online

ESETA 3 - Te Tusi Tapu I Te Gana Tuvalu Lomiga Lua bible

ESETA 3

¹I se taimi fakamuli ifo, ne fakasopo ne te Tupu ko Asuelu a te tagata e igoa ki a Hamanu ke fai mo takitaki minisita. A Hamanu ko te tama tagata a Hametata, se tino i te gafa o Akako.

²Ne fakatonu atu te tupu ki ana ofisa katoa ke totuli ki lalo, kae ifo atu ki a Hamanu e fakaasi ei te fakaaloalo o latou ki a ia. Ne fai eiloa ne latou te mea tena kae ko Moletekai fua ne seki fakalogo ki te fakatonuga tena.

³A nisi ofisa o te malo ne fesili atu ki a Moletekai me ai a e seki fakalogo ei a ia ki te fakatonuga a te tupu.

⁴I aso takitasi, ne taumafai a sotia kona ki a Moletekai ke taumafai o fakalogo ki te fakatonuga, ka ko Moletekai e ita eiloa ma fakalogo. Muna a ia penei, “Au se tagata Iutaia, tela la, e se mafai ne au o ifo ki a Hamanu.” Tena ne fai atu ei a Ofisa ki a Hamanu e uiga ki te mea tena, mo te fakatau a latou me ailoga e fakasao ne Hamanu a Moletekai i tena amioga tena.

⁵A Hamanu ko oko eiloa i te kaitaua i te iloaga ne ia i a Moletekai e se manako o totuli o ifo atu ki a ia,

⁶kae i tena logoga i a Moletekai se Iutaia, ne mafaufau ei a ia o fakasala a Moletekai mo tino Iutaia katoa. Ne fai ana fuafuaga ke tamate katoa a tino Iutaia i te Malo o Pelesia.

⁷I te sefulu lua o tausaga o te nofoaiga a te Tupu ko Asuelu, i te masina muamua, te masina o Nisani, ne fai ei te fakatonuga a Hamanu ke fai te vili (e fakaigoa ko te “pulima”) ke sala ei te aso tonu mo te masina e 'tau ei o fakataunu a te togafiti a ia tena. Ko te po sefulu tolu o te sefulu lua o masina, te masina o Atala ne fili ne Hamanu.

⁸Tena, ne fai atu ei a Hamanu ki te tupu penei, “E isi se itu kaiga a tino tenei e salalau i luga i tou malo, kae e isi katoa ne tino pena i itumalo katoa i tou malo. A tu mo amioga e fai ne latou e kese eiloa mai i tu mo amioga e fai ne nisi tino. A latou e se fakalogo ki tulafono o te malo, tela la, e seai se lei e maua ne koe manafai e tuku atu eiloa latou ke fai olotou tu mo amioga kona.

⁹Kaati e lei ke fai sau fakatonuga ke tamate katoa latou mafai e loto ki ei Tou Malu. Kafai e fai ne koe a te mea tena, au e taku tonu atu me ka mafai o sala mai ne au e silia atu i te 340,000 kilokalame siliva ke teu i potu teu koloa o te malo mo fai a galuega o te malo.”

¹⁰Ne tapale ne te tupu tena mama, tela e fakaaoga sale o faka'malu kae fakamailoga ki ei a folafolaga kola e ave sale i loto i te malo, tuku atu ei ne ia ki te fili o te kau Iutaia, ko Hamanu, te tama tagata a Hametata, se tino i te gafa o Akako.

¹¹Muna a te tupu ki a Hamanu penei, “A koe e pule i tino mo olotou tupe; fai te mea e loto koe o fai ki a latou.”

¹²Tela la, i te po sefulu tolu o te masina muamua, ne fakamaopoopo ne Hamanu a failautusi a te tupu kae faitau atu ne ia ke tusi ne latou a te fakasalalauga, kae ke fuli foki ki 'gana kesekese mo vaega tusitusiga kesekese kola e fakaaoga i te malo, kae ke avatu ki takitaki mo kovana mo ofisa katoa. Ne avatu te fakasalalauga tena ki te Tupu ko Asuelu kae ne faka'mau atu mo tena fakailoga tela ko te ata o tena mama.

¹³Ko tino avefekau ne ave ne latou a fakasalalauga kona ki itu malo kesekese i loto i te malo. A te fakasalalauga tena ne fai mai me i te po sefulu tolu o te masina o Atala, a tino Iutaia katoa, tino ma'tua mo tamaliki foliki, fafine mo tamaliki, e 'tau o tamate katoa. E 'tau o tamate katoa latou kae ke seai se tino e alofa ki a latou, mo olotou kope katoa foki ke puke katoa.

¹⁴A te fakasalalauga tena e 'tau o fai ke iloa katoa ne tino i itumalo takitasi, ko te mea ke toka latou manafai ko oko mai a te aso tena.

¹⁵Mai te fakatonuga a te tupu ne fakasalalau atu ei a te fakatonuga tena ki te fa'kai o Susa, te laumua o te malo o Pelesia, ka ko tino avefekau ne ave ne latou te fakatonuga tena ki i itumalo takitasi. Ne nofo ifo a te tupu mo Hamanu o inu, ka ko te fa'kai o Susa ko se 'toka eiloa.