Read Te Tusi Tapu I Te Gana Tuvalu Lomiga Lua ESETA 6 Bible Online

ESETA 6 - Te Tusi Tapu I Te Gana Tuvalu Lomiga Lua bible

ESETA 6

¹I te po eiloa tena, a te tupu e se mafai o to tena moe, tena ne fai ei tena fakatonuga ke aumai a tusi o te malo ke faitau mai ne se tino ki a ia.

² A te vaega ne faitau mai ki a ia e aofia ei a te tala o te mauaga ne Moletekai a te togafiti a Pikitana mo Telesa ke tamate a te tupu; a te tokolua kona ko eunuka o te palesi kola ne tausi ne laua a te mataloa o te potu o te tupu.

³Ne fesili aka a te tupu penei, “Se a te taui lei ko oti ne fai ne tatou ki a Moletekai i te fakasaoga ne ia au?” Ne tali atu ana tavini penei, “E seki ai se taui 'lei kai tuku atu ki a ia.”

⁴Muna a te tupu, “E isi ne aku ofisa e nofo mai nei i te palesi?” I te taimi tenei, a Hamanu ko fatoa oko mai eiloa ki te potu fai fono; a ia ne vau o fai ki te tupu ke ave Moletekai o sisi i te koga sisi tela ko oti ne fakatoka ne ia.

⁵Tena ne tali atu ei ana tavini penei, “Tenei a Hamanu e manako ki a koe.” Muna a te tupu, “Fai ki ei ke vau ki loto.”

⁶Tena ne vau ki loto a Hamanu kae fai atu mo te tupu ki a ia penei, “E isi se tagata e manako au ke fai se fakaaloaloga ki ei. Se a te taui e tau o avatu ki a ia?’ Ne mafaufau ifo a Hamanu i a ia eiloa penei, “Ko oi foki la nei te tino e manako te tupu o fakaaloalo? Se taumate kaati ko au faeloa.”

⁷Tena ne tali atu ei a ia ki te tupu penei, “Fakatonu atu ke aumai ne gatu fakatupu, gatu kola e pei ei koe mō te tagata tenei. Fai se fakatonuga ke fakamau te fakailoga fakatupu ki luga i tau solofanua.

⁹Ka oti ko fai ki se tagata maluga a koe ke fakapei a gatu loa kona ki te tagata tena, kae ke sopo i te solofanua, kae ke taki atu a ia i loto i te malae o te fa'kai. A te tagata maluga tena ke fakasalalau atu ne ia i te taimi e olo atu ei laua penei, ‘Kilo mai me e fakaaloalo penei ne te tupu a te tino e manako a ia o tuku ki ei se taui 'lei!”’

¹⁰Tena kae fai atu mo te tupu ki a Hamanu penei,“Fakavave o puke mai a gatu 'loa kona mo te solofanua, kae fai a fakailoga 'malu kona mō Moletekai te tagata Iutaia. Fai atu ki a ia a mea katoa kona ne fai mai ne koe. Ka maua atu ne koe a ia e sagasaga i te mataloa o te palesi.”

¹¹Tena ne fanatu a Hamanu o puke mai a gatu loa mo te solofanua, fakapei atu ei ne ia a gatu loa ki i a Moletekai. Ne sopo Moletekai ki luga i te solofanua, kae taki atu ne Hamanu a ia i loto i te malae o te fa'kai, kae kalaga sale atu ki tino i te auala penei, “Kilo mai me e fakaaloalo penei ne te tupu a te tino e manako a ia o tuku ki ei se taui 'lei!”

¹²Oti aka, foki atu ei a Moletekai ki te mataloa o te palesi ka ko Hamanu ko foki fakavave ki tena fale, kae pono ona mata me ko oko eiloa i te ma.

¹³Ne fakamatala ne ia ki tena avaga mo ana taugasoa a te mea tena ne tupu ki a ia. Tena la, ne fai atu ei tena avaga mo ana taugasoa poto penei, “A koe pela me se mea ka gasolo o takavale i a Moletekai. A ia se Iutaia kae e se mafai ne koe o fakatakavale. E iku eiloa koe o takavale i a ia.”

¹⁴I te taimi tena koi faipati ei latou, kae oko mai mo eunuka o te palesi o avatu a Hamanu ki te 'kaiga a Eseta.