Read Te Tusi Tapu I Te Gana Tuvalu Lomiga Lua ESETA 8 Bible Online

ESETA 8 - Te Tusi Tapu I Te Gana Tuvalu Lomiga Lua bible

ESETA 8

¹I te aso foki eiloa tena, ne tuku atu ei ne te Tupu ko Asuelu ki a Eseta a mea katoa a Hamanu, te fili o tino Iutaia. Ne fakaasi atu ne Eseta ki te tupu i a laua e kaiga mo Moletekai, tena la, mai i te taimi tena, ne talia ei a Moletekai ke fanatu sale ki te tupu.

²Ne tapale aka ne te tupu a tena mama mo tena fakailoga i ei, tela ko oti ne toe puke mai ne ia mai i a Hamanu, kae tuku atu ei ne ia ki a Moletekai. Ne tuku atu ne Eseta a Moletekai ke pule ne ia a mea katoa a Hamanu.

³Tena ne toe fanatu a Eseta, o fakasiga ifo i lalo i vae o te tupu kae tagi kae faipati atu ki ei. Ne fakamolemole atu a Eseta ki te tupu ke taumafai o taofi aka a te togafiti masei tela ne fai ne Hamanu, te tino i te gafa o Akako, ki te kau Iutaia.

⁴Ne sisi aka ne te tupu tena tokotoko aulo o fakasaga atu ki a Eseta, tena ne tu aka ei a Eseta kae fai atu penei,

⁵“Tou Malu, kafai e alofa mai koe ki a au kae faka'tau ifo koe se mea e 'tau o fai, ke fakamolemole ke fai aka ne koe se fakasalalauga ke se fakataunu a te fakatonuga tela ne fai ne Hamanu, te tama tagata a Hametata te tagata i te gafa o Akako, e uiga ki te 'ta fakapalelega o te Kau Iutaia i tou malo.

⁶E ola pefea au mafai e oko mai a te puapuaga tenei ki tino o toku fenua, mo oku kāiga foki ka tamate?”

⁷Muna a te Tupu ko Asuelu ki a Eseta mo Moletekai te Iutaia penei, “Kiloke, ko oti ne sisi ne au a Hamanu e tusa mo te togafiti ne fai ne ia ki te kau Iutaia, kae ne avatu ne au ana mea ki a Eseta.

⁸A te fakasalalauga tela ko oti ne fakasalalau atu i te igoa o te tupu, kae ne fakamau foki mo fakailoga fakatupu ki ei, e se mafai o toe solo. E mafai faeloa ne koulua o fai se tusi ki tino Iutaia i toku igoa mo taku fakailoga, so se mea e ma'nako koulua ke fai ne latou.”

⁹A te mea tenei ne tupu i te po luasefulu tolu o te tolu o masina, te masina a Sivani. Ne kalaga atu a Moletekai ki failautusi a te tupu kae faitau atu ne ia ke tusi ne latou a tusi e ave ki tino Iutaia mo kovana, tino ma'luga mo ofisa katoa i te 127 itumalo mai Initia ke oko ki Sutana. A tusi kona ne tusi atu ki itumalo takitasi i te gana mo te tusitusiga e malamalama latou i ei, pela foki ki tino Iutaia, i te gana mo te tusitusiga a latou.

¹⁰A tusi kona ne tusi ne Moletekai i te igoa o te Tupu ko Asuelu, kae fakamau atu ne ia mo te fakailoga fakatupu ki ei. A tusi kona ne fakaoko atu ne avefekau i luga i solofanua ma'kini.

¹¹A tusi kona e fai mai i te tupu ko talia ne ia a tino Iutaia i fa'kai katoa ke fakatoka o taua atu ki tino kola e o'mai o 'ta fakapalele latou. Kafai ko o'mai a tino o se itumalo e tasi mo olotou mea tau o 'ta latou, e mafai faeloa ne latou o taua atu ki a latou o 'ta fakapalele latou fakatasi mo olotou avaga mo tamaliki; e mafai faeloa o 'ta ne latou ke seai eiloa se tino o latou e 'toe kae ke fao mai foki olotou mea katoa.

¹²A te fakasalalauga tena e tau o fakataunu i so se koga i loto i te Malo o Pelesia i te aso ko oti ne fakamoe e ta fakapalele ei a tino Iutaia, ko te po sefulu tolu o te masina o Atala, te sefulu lua o masina.

¹³A te mea tena e tau o fakasalalau atu ke fai mo tulafono, kae ke fakailoa atu ki tino katoa i itumalo takitasi ko te mea ke toka te kau Iutaia o taua atu ki olotou fili manafai ko oko mai te aso tena.

¹⁴I te fakatonuga a te tupu, tena ne 'sopo aka ei a avefekau ki olotou solofanua makini, te mea eiloa ko tele o ave a tusi. A te fakasalalauga tena ne folafola atu foki i loto i te fakai o Susa.

¹⁵Ne fanatu a Moletekai mai te palesi, kae e pei ki gatu lanu moana kae kena, mo te gatu 'loa ne faite ki lino lanu kulakula, mo te kalauna aulo gali i tena ulu. Tena la, a auala o te fa'kai o Susa ko logoa valevale eiloa i leo o te fiafia.

¹⁶A tino Iutaia ko oko eiloa i te fiafia kae ko tai 'toka olotou loto, kae ko isi foki se manatu o te manumalo i a latou.

¹⁷I fa'kai katoa mo itumalo takitasi, kafai eiloa ko faitau atu a te fakasalalauga a te tupu, ka ko tino Iutaia ko oko eiloa i te fiafia kae fai olotou 'kaiga fia'fia. E tokouke eiloa a tino ne loto ke fai latou mo tino Iutaia, me e ma'taku i tino Iutaia.