Read Te Tusi Tapu I Te Gana Tuvalu Lomiga Lua ESETA 9 Bible Online

ESETA 9 - Te Tusi Tapu I Te Gana Tuvalu Lomiga Lua bible

ESETA 9

¹Ko oko mai nei ki te po sefulu tolu o te masina o Atala, te aso ka fakataunu ei a te fakasalalauga a te tupu, ko te aso ne fakamoemoegina ne fili o te kau Iutaia me ka 'ta ne latou tino Iutaia. Kae tela la, ko tino Iutaia ne manumalo i a latou.

²I koga e nofo ei tino Iutaia i fa'kai takitasi i loto i te malo, a tino Iutaia e fakatoka eiloa o ta se tino e taumafai o 'ta latou. A tino katoa ko ma'taku i tino Iutaia, me ko se maua ne latou o fakatakavale.

³A ofisa o itumalo kesekese, mo kovana mo tino ma'luga, ne fesoasoani ki tino Iutaia me i a latou e ma'taku i a Moletekai.

⁴Ko iloa 'lei eiloa i loto i te malo kātoa, i a Moletekai se tagata maluga eiloa i te palesi, kae tenei e gasolo aka eiloa ki luga.

⁵Tena la, a tino Iutaia e pule eiloa i te mea e fai ne latou ki olotou fili. Ne taua atu latou ki olotou fili, kae ne 'ta valevale eiloa ne latou ki pelu.

⁶E tusa mo te limaselau tino ne 'ta ne te kau Iutaia i loto i te fa'kai o Susa.

⁷E aofia i te kau kona, ko te tino-agafulu tama tagata a Hamanu, te tama tagata a Hametata, te fili o te kau Iutaia: ko Pasanatata, Talafoni, Asipati, Polata, Atalia, Alitata, Palamasita, Alisai, Alitai, Vaisata. E seki ai ne mea ne 'fao ne latou mai olotou fili.

¹¹I te aso foki eiloa tena, ne fakailoa atu foki ki te tupu a te aofaki o tino ne mate i Susa.

¹²Tena ne fai atu ei a te tupu ki a Eseta penei, “I te fa'kai faeloa o Susa, ko tusa mo te limaselau tagata ne tamate ne te kau Iutaia, e aofia ei te tinogafulu tama tagata a Hamanu. E pefea la nei te mea e fai ne latou i nisi itumalo. Se a nei te mea e manako mai koe ki ei? E talia eiloa ne au. Taku mai te mea e manako mai nei koe ki ei kae ka avatu eiloa ne au.”

¹³Ne tali atu a Eseta, “Tou Malu, ke talia ne koe ke toe fai ne tino Iutaia i konei i Susa, ma taeao, a te mea tenei ne fai ne latou i te aso nei. Kae fai atu se fakatonuga ke ave a foitino o tama tagata e tino-gafulu a Hamanu o fakatau'tau i te koga sisi tino.”

¹⁴Ne fai te fakatonuga a te tupu ke fai te mea tena, tena ne fakailoa atu ei a te fakasalalauga tena i loto i Susa. A foitino o tama tagata a Hamanu e tino-gafulu ne fakatau'tau eiloa ke lavea ne tino i te koga sisi tino.

¹⁵I te po sefulu fa o te masina o Atala, ne maopoopo a tino Iutaia i Susa, kae 'ta ne latou e toluselau tagata i te fa'kai tena i te aso tena. Kae e seai ne mea ne puke ne latou mai olotou fili.

¹⁶A tino Iutaia i itumalo takitasi ne fakatoka foki olotou potukau o taua atu ki olotou fili. Ne tamate ne latou e tusa mo te fitusefulu lima afe tino kola e takalialia i a latou. E seki ai foki ne mea ne 'fao ne latou.

¹⁷A te mea tena, ne tupu i te po sefulu tolu o te masina o Atala. I te sua aso, te po sefulu fa, e seai ne tino ne tamate, kae ne fakaaoga ne latou te aso tena o fai 'kaiga fia'fia a latou.

¹⁸A tino Iutaia i Susa ne fai ne latou te po sefulu lima ko te aso malolo o latou, me ne ta ne latou olotou fili i te po sefulu tolu mo te po sefulu fa kae gata i te po sefulu lima.

¹⁹Tena te mea e fakamanatu ei ne te kau Iutaia kola e nofo i fa'kai fo'liki a te po sefulu fa o te masina o Atala, se aso fiafia, se aso e fai fakaala ei latou kae fai meaalofa meakai ki olotou taina Iutaia eiloa.

²⁰Ne fakamau ne Moletekai a mea kona ne tupu, kae avatu ne ia a tusi ki tino Iutaia katoa i loto i te Malo o Pelesia,

²¹o fakaasi ki a latou ke fakamanatu ne latou a te po sefulu fa mo te po sefulu lima o te masina o Atala ke fai mo aso malolo i tausaga takitasi.

²²A aso kona ko aso ne fakatakavale ei ne te kau Iutaia a olotou fili; ko te masina foki tena ne tau o fanoa'noa ei a tino Iutaia, kae nei ko fai mo masina e lifu kae fia'fia ei latou. A aso kona e tau o fakamanatu i faiga o fakaala mo 'kaiga, kae tuku atu mo meaalofa meakai ki nisi taina pela foki ki tino ma'tiva.

²³Tena, ne tau'tali eiloa a tino Iutaia ki te fakatonuga a Moletekai, tena ne fai ei te aso tena se aso e fakamanatu sale i tausaga takitasi.

²⁴ A Hamanu te tama tagata a Hametata, te tino i te gafa o Akako, kae ko te fili o te kau Iutaia, ne fai ne ia te vili (io me ko te “pulima”) ke iloa aka ei te aso e 'tau ei o 'ta fakapalele a te kau Iutaia; a Hamanu ne mafaufau ke 'ta fakapalele katoa.

²⁵Ka ko Eseta ne fano ki te tupu, tena ne fai ne te tupu se fakasalalauga e tusi ki lalo ke taua atu te kau Iutaia ki tino e o'mai o 'ta latou — tena la, a Hamanu ne mate eiloa i te togafiti ne faite ne ia ke 'ta ei te kau Iutaia — ne sisi a ia fakatasi mo ana tama tagata i te koga sisi tino.

²⁶Tena te mea e fakaigoa ei a aso malolo kona ko te Pulima. Mai luga i te tusi a Moletekai, mo mea kona ne tupu ki tino Iutaia,

²⁷ne fai ei ne tino Iutaia ke fai mo tulafono ki a latou mo tino i olotou gafa, mo so se tino e fia fai mo tino Iutaia, me i tausaga takitasi a aso konei e lua e tau faeloa o fakamanatu, e pela eiloa mo te fakatonuga a Moletekai.

²⁸Ne iku aka ei, me i tino Iutaia katoa i so se tupulaga i itumalo katoa mo fa'kai katoa e tau o masaua kae fakamanatu a aso o te Pulima i taimi katoa fakamuli.

²⁹Tena ne tusi ei ne Moletekai mo Eseta, te tama fafine a Apihaila, a te tusi i te igoa o Eseta e uiga ki te fakamautuga o te Pulima, e lago malosi atu ei ki te tusi tela ne tusi ne Moletekai.

³⁰A te tusi e fakatuatusi ki tino Iutaia katoa, mo kopi ne ave ki itumalo katoa e 127 i te Malo o Pelesia. A te tusi tena e fakamanuia atu foki ki tino Iutaia katoa,

³¹kae fakatonu atu foki ki a latou mo tino o olotou gafa ke fakamanatu a aso o te Pulima i te taimi tonu, e pela eiloa mo tulafono ne tautali latou i ei mō te faiga o te fakalikilikiga mō tapuakiga mo faiga o fanoa'noa. A te mea tena ne fakatonu mai ne Moletekai mo Eseta, te avaga a te tupu.

³²A te fakatonuga a Eseta e fakamalosi ei te tulafono o te Pulima, ne tusi ki lalo i te tusi.