Read Te Tusi Tapu I Te Gana Tuvalu Lomiga Lua ESOTO 10 Bible Online

ESOTO 10 - Te Tusi Tapu I Te Gana Tuvalu Lomiga Lua bible

ESOTO 10

¹Ne fai mai te Aliki ki a Mose penei, “Fano ki te tupu. Ko oti ne fai ne au a tena loto mo loto o ana tino maluga ke makeke, ko te mea ke fai ne au a vavega konei ki a latou;

²ko te mea foki ke isi ne tala a koutou e fai ki otou tama mo mokopuna e uiga ki te fakamatakutakuga ne au a tino Aikupito ki vavega konei. Ka iloa ei ne koutou katoa i a Au ko te Aliki.”

³Ne olo atu a Mose mo Alona ki te tupu kae fai atu ki a ia penei, “A te Aliki te Atua o tino Epelu ne fai mai penei, ‘Tefea te taimi ka talia ei ne koe te motou fakatagi? Tuku mai a tino Isalaelu ke olo ko te mea ke tapuaki mai ki a au.

⁴Kafai e se talia faeloa ne koe ko te mea ka fai ne au tou fenua ke 'fonu i sē akelise mā taeao.

⁵Ka faka'fonu ne au te laukele ki sē akelise. Ka kai ne latou a mea katoa kola seki masei i te afā, pela foki mo lakau lasi kola e toe.

⁶Ka 'fonu ou palesi i sē akelise, pela foki mo fale o ou tino maluga mo tino Aikupito katoa. Ka sili atu te lotou fakamataku ki mea fakamataku kola ne lavea ne otou tupuga i aso taumua.’ ” Ne mafuli aka te tupu te mea eiloa ko fano.

⁷Ne fai atu a tino maluga a te tupu ki a ia penei, “Ka gata mafea te fakalavelave mai o te tagata tenei? Na tuku atu a tino Isalaelu ke olo, ko te mea ke tapuaki atu latou ki te Aliki te lotou Atua. E se lavea ne koe Aikupito ko masei valevale?”

⁸Ne toe olo atu a Mose mo Alona ki mua o te tupu kae fai mai te tupu ki a laua penei, “Ka olo nei koutou o tapuaki ki te Aliki te otou Atua. Kae ko oi tonu eiloa tino e olo?”

⁹Ne tali atu a Mose, “Matou e olo katoa, pela katoa mo tamaliki mo tino matua. Ka olo matou mo motou tama tagata mo tama fafine, pela foki mo motou mamoe mo kouti mo omotou pulumakau, me e 'tau mo matou o fai se kaiga fakaaloalo ki te Aliki.”

¹⁰Muna a te tupu, “Au e tauto atu i mua o te Aliki me e se mafai ne au o tuku atu otou fafine mo tamaliki ke olo tasi koutou! Ko iloa tonu eiloa ia koutou e mafaufau o 'teke mai ki a matou.

¹¹Ikai, ko tagata fua e olo o tapuaki ki te Aliki mafai tena te mea e manako koulua ki ei.” I kona foki eiloa, ko Mose loa mo Alona ko afuli ki tua mai mua o te tupu.

¹²Ne fai atu te Aliki ki a Mose penei, “Sisi aka tou lima ki luga i Aikupito o kalaga ki sē akelise. Ka 'mai latou o kai a lakau katoa mo mea katoa kola ne seki masei i te vaiua fatu.”

¹³Ne sisi ake te tokotoko o Mose, kae ne fai ne te Atua a te matagi mai te saegala ke agi i luga o Aikupito i te ao mo te po katoa. I te taeaoakega, ko sē akelise eiloa ko sae ake, ne aumai ne te matagi.

¹⁴Ne o'mai a sē akelise i potukau, fakafonu eiloa te fenua. E seki matea eiloa te uke o sē akelise penei i Aikupito i aso mua, kae kaati ka se toe matea foki te uke penei i aso fakamuli.

¹⁵Ne fakafonu ne latou te laukele, tela pela me ko uli katoa eiloa; ne kai ne latou a mea katoa kola ne seki masei i te vaiua fatu, pela foki mo fuagalakau katoa i luga i lakau. Seai eiloa se lakau lauolaola e 'toe i luga i Aikupito katoa.

¹⁶Ne kalaga fakavave atu te tupu ki a Mose mo Alona kae fai mai ki a laua penei, “Ko oti au ne agasala i mua o te Aliki te otou Atua, pela foki ki mua o koulua.

¹⁷Fakamagalo mai nei au i te taimi nei, kae 'talo ki te Aliki te otou Atua ke ave keatea te fakasalaga masei tenei mai i a au.”

¹⁸Ne fano keatea Mose mai te tupu, 'talo atu ei ki te Aliki.

¹⁹Ne 'fuli ne te Aliki te matagi mai te saegala ki te afā mai te toga la, tela ne fue ne ia a sē akelise ki te kogā tai o Suesa.[10] Seai eiloa se sē akelise ne 'toe i Aikupito.

²⁰Kae ne fakamakeke ne te Aliki te loto o te tupu, ne seki talia ei a tino Isalaelu ke olo.

²¹Ne toe fai mai te Aliki ki a Mose, “Sisi ake tou lima ki te lagi, kae ka oko mai ki luga o Aikupito a te pouliga matolu eiloa tela e mafai o lagona ki te foitino.”

²²Ne sisi ake te lima o Mose ki te lagi, te mea eiloa ko oko mai a te pouliga lasi ki luga o Aikupito katoa i aso e tolu.

²³Ne seki mafai ne tino o Aikupito o matea sua tino ki sua tino. Seki ai foki eiloa se tino o latou kai fano keatea mo tena fale i aso kona e tolu. Ka ko tino Isalaelu e maina faeloa te koga tela e 'nofo ei latou.

²⁴Ne kalaga mai te tupu ki a Mose kae fai mai ki a ia penei, “Ko talia nei ne au ke olo koutou o tapuaki atu ki te Aliki, pela foki mo otou fafine mo tamaliki, ka ko otou mamoe, kouti mo pulumakau ke se ave.”

²⁵Ne tali atu a Mose, “Kafai e fai pena, e 'tau mo koe o tuku mai ne manu mo fai motou taulaga ki te Aliki te motou Atua.

²⁶Ikai, matou e olo eiloa mo motou manu; seai se manu e tuku. E fili eiloa ne matou manu kola ka fai ki ei motou tapuakiga ki te Aliki te motou Atua. Nei, seki oko matou ki te koga tela ka tapuaki atu matou ki te Aliki, e seki iloa ne matou me ne a manu ka fakaaoga ne matou.”

²⁷Ne fakamakeke ne te Aliki te loto o te tupu, tela ne seki tuku atu ei ne ia a latou ke olo.

²⁸Ne fai mai te tupu ki a Mose, “Ke vave eiloa nei koe o fano keatea mai oku mua! Ke mo a eiloa e toe matea koe ne au! I te taimi e toe matea koe ne au, koe ka tamate!”

²⁹Ne tali atu a Mose, “Ko lei, se toe matea ne koe au.”