Read Te Tusi Tapu I Te Gana Tuvalu Lomiga Lua ESOTO 11 Bible Online

ESOTO 11 - Te Tusi Tapu I Te Gana Tuvalu Lomiga Lua bible

ESOTO 11

¹Ne fai mai te Aliki ki a Mose, “Toe tasi eiloa te fakasalaga ka fakaoko ne au ki te tupu o Aikupito mo tena fenua. Ka oti aka ko te mea eiloa ko talia mai ne ia ke olo koutou. Ka ko te tonuga, ka afuli ne ia koutou katoa keatea mai tena fenua.

²Fano nei o fai ki tino Isalaelu ke olo latou katoa o akai atu ki olotou tuakoi ki ne mea e faite ki aulo mo siliva.”

³Ko oti ne fai ne te Aliki te kau Aikupito ke a'lofa ki tino Isalaelu. A mafaufauga o tino maluga mo tino katoa o Aikupito i a Mose se tagata maluga eiloa.

⁴Ne fanatu a Mose ki te tupu kae fai atu penei, “Te Aliki ne fai mai penei, ‘I te valuapo ka fano au i loto i Aikupito,

⁵ka ko toekimua tagata katoa o Aikupito ka mate; e kamata mai i tama tagata a te tupu, tela ko ia ko te suitupu, ke oko eiloa ki te tama tagata a te pologa fafine tela e solo saito. A toekimua foki a pulumakau ka 'mate.

⁶Ka 'tagi paka'laga valevale a tino i luga i Aikupito katoa, ko te taimi muamua foki eiloa tenei ka lagona atu a tino ke 'tagi penei, kae kaati se toe lagona foki te vaega tagi penei i aso fakamuli.

⁷Kae ka seai eiloa se mea ka tupu ki tino Isalaelu; seai foki se kuli ka lagona atu ke tagi ki tino Isalaelu io me ki olotou manu. Tena, ka iloa ei ne koe i a au, te Aliki, e faka'kese ne au a tino Aikupito mo tino Isalaelu.’ ”

⁸Ne fakaoti atu a pati a Mose penei, “Ou tino maluga katoa ka o'mai ki a au o ifo i oku mua, kae ka fakamolemole mai ke na ave keatea oku tino katoa. Ka oti aka ko fano ei au.” Ne fano keatea Mose mai te tupu mo tena kaitaua lasi.

⁹Ko oti ne faipati te Aliki ki a Mose penei, “Ka tumau eiloa te se fakalogo o te tupu ki a koe, ko te mea ke fai ne au a vavega e uke i Aikupito.”

¹⁰Ne fai ne Mose mo Alona a vavega katoa konei i mua o te tupu, kae ne fai ne te Aliki ke makeke te loto o te tupu, tela ne seki talia eiloa ne ia a tino Isalaelu ke olo keatea mai tena fenua.