Read Te Tusi Tapu I Te Gana Tuvalu Lomiga Lua ESOTO 12 Bible Online

ESOTO 12 - Te Tusi Tapu I Te Gana Tuvalu Lomiga Lua bible

ESOTO 12

¹Ne faipati mai te Aliki ki a Mose mo Alona i Aikupito penei:

²“A te masina nei ka fai mo masina muamua o te tausaga ki a koutou.

³Tuku atu a fakatonuga konei ki tino Isalaelu katoa: I te po sefulu o te masina nei, so se tagata ka fili ne ia se tamā mamoe io me se tamā kouti ma tena kaiga.

⁴Kafai e fuafua ifo a te tagata me e se mafai ne tena kaiga o kai te manu katoa, me sē tokouke latou, ka mafai ne ia o fai ki te kaiga tela e tuakoi mo ia ke kai tasi ne latou a te manu e tasi, ke faka'tau ki te aofaki o latou mo te mea e mafai ne te tino o kai.

⁵E mafai ne te tino o fili se mamoe io me se kouti, kae e tau se manu tagata ko tasi tena tausaga kae seai sena pona.

⁶I te afiafi o te po sefulu fa o te masina, a tino katoa o Isalaelu ka 'ta olotou manu.

⁷E 'tau mo tino o ave ne toto o nini ki pou o olotou mataloa mo luga o mataloa o olotou fale kola ka kai ei olotou manu.

⁸I te po tena e 'tau o tao olotou kano manu, kae ke kai mo aka 'kona o lakau, fakatasi mo falaoa se fakafete.

⁹E tapu e ota io me saka ne kano manu, kae ke tao katoa, fakatasi mo te ulu mo vae mo totoga katoa i loto.

¹⁰Ke mo a e toega ne mea ki te taeao; kafai e isi ne mea e 'toe ka 'sunu katoa.

¹¹E 'tau o kai fakavave ne koutou, i a koutou e fakatoka o malaga, mo otou taka i otou vae mo tokotoko i otou lima. Ko te 'kaiga fiafia o te Paseka tena ki a au, ko te Aliki.

¹²“I te po tena, au ka ulu i loto i te fenua o Aikupito kae ka tamate ne au a toekimua tagata katoa a tino mo manu. Ka fakasala foki ne au a atua katoa o Aikupito, i a Au ko te Aliki.

¹³A te toto i pou o mataloa o otou fale ko te fakailoga tena o fale e 'nofo koutou i ei. Kafai e matea ne au te toto, ka fakaseke ne au te fale tena, kae ka se oko atu te fakasalaga ki a koutou, tela e oko ki tino Aikupito.

¹⁴E 'tau mo koutou o fakamanatu te aso tenei me se aso tāua faka te lotu, e fakamasaua atu ki a koutou te mea ne fai ne Au, te Aliki; ke fakamanatu faeloa ne koutou i tausaga katoa.”

¹⁵Ne fai mai te Aliki penei, “I aso e fitu ke mo a koutou e 'kai ki falaoa faka'fete, kae kai fua ki falaoa se 'fete. I te aso muamua, e 'tau mo koutou o ave keatea katoa a mea faka'fete i otou fale, me kafai e isi se tino e kai ki se falaoa faka'fete i aso kona e fitu, ka se taku a ia se tino o toku fenua.

¹⁶I te aso muamua, pela foki mo te fitu o aso, e 'tau koutou o fakatasi o tapuaki mai ki a au. Seai ne galuega e fai i aso kona, kae mafai fua ne koutou o fakatoka meakai.

¹⁷Tausi faka'lei te aso fakamanatu tenei, me ko te aso tenei tela ne taki ei ne au koutou keatea mai Aikupito. I taimi katoa konei mai mua, e 'tau mo koutou o fakamanatu te aso lasi tenei.

¹⁸E kamata mai te afiafi o te po sefulu fa o te masina muamua ke oko ki te afiafi o te po luasefulu tasi, e se 'tau koutou o 'kai ki ne falaoa faka'fete.

¹⁹E tapu se mea faka'fete e lavea i otou fale i aso kona e fitu. Kafai e isi se tino e kai ki falaoa faka'fete, me se tino Isalaelu io me se tino fakaatea, ka se lau a ia me se tino o toku fenua.

²⁰

²¹Ne kalaga atu a Mose ki takitaki katoa o Isalaelu kae fai atu ki a latou penei, “E 'tau mo koutou takitokotasi o fili se tamā mamoe io me se tamā kouti o tamate, ko te mea ke mafai ne otou kaiga o fakamanuia a te Paseka.

²²Puke se tamā kaula o te lakau ko te Isopo o ufi ki loto i se tanoa e isi i ei ne toto manu,[11] ne toto o manu, kae nani ki ei a pou o mataloa o otou fale mo talava i luga o mataloa. E tapu se tino i a koutou e fano keatea mai tena fale, ke oko eiloa ki te taeao.

²³Kafai ko fano te Aliki i loto i Aikupito o ta olotou tino, ka matea ne ia a toto i luga i talava mo pou o mataloa o otou fale. Ka se fakaoko atu ei ne ia a te agelu o tamate koutou.

²⁴E 'tau mo koutou mo otou tamaliki o tausi a fakatonuga konei ke oko ki te se gata mai.

²⁵Kafai ko ulu koutou ki te fenua tela ne tauto atu ei te Aliki ke avatu mo koutou, e 'tau mo koutou o fai te tapuakiga tenei.

²⁶Kafai e fesili atu otou tamaliki me se a te uiga o te tapuakiga tenei,

²⁷kae ka tali koutou pela, ‘Ko taulaga o te Paseka e fakaaloalogia ei te Aliki, me ne faka'sao ne ia a fale o tino Isalaelu i Aikupito. Ne tamate ne ia a tino Aikupito kae fakasao ne ia matou.’ ” Ne to'tuli a tino Isalaelu kae tapuaki atu ki te Aliki.

²⁸Tela ne olo ei latou o fai te mea tela ne fakatonu ne te Aliki ki a Mose mo Alona.

²⁹I te valuapo, ne tamate ne te Aliki a toekimua tagata katoa i Aikupito, mai i te tamaliki tagata a te tupu, tela ko te suitupu, ke oko eiloa ki te tamaliki tagata a te pagota i loto i te falepuipui. A uluaki tama a manu ne tamate katoa foki.

³⁰I te po tena, ne ala aka a te tupu mo ana tino maluga katoa mo tino katoa o Aikupito. Ne 'tagi paka'laga tino i luga i Aikupito me e seai eiloa se fale ne sao se toekimua tagata i ei.

³¹I te po eiloa tena, ne uga te fekau a te tupu ki a Mose mo Alona kae fai mai ki a laua penei, “Olo keatea mai toku fenua; koulua mo tino Isalaelu katoa! Olo o tapuaki atu ki te otou Aliki, e pela mo te mea e manako koutou ki ei.

³²Puke otou mamoe mo kouti mo pulumakau kae olo. Talo foki ke maua se fakamanuiaga mo oku.”

³³Ne fakavavave ne tino Aikupito a tino Isalaelu ke olo keatea mai te lotou fenua. Muna a tino Aikupito, “Kafai e se olo koutou keatea ko matou ka 'mate katoa.”

³⁴Tela ne puke ei tino Isalaelu ki olotou mea tao falaoa kae faka fonu ki falaoa ko oti ne palu kae seai se mea faka'fete ne fai ki ei. Ne kofukofu ne latou ki olotou gatu, kae amo i olotou ua.

³⁵Ko oti ne fai ne tino Isalaelu te fakatonuga a Mose, ke olo latou o akai ki tino Aikupito ki ne mea e faite ki aulo mo siliva mo ne gatu.

³⁶Ne fai ne te Aliki a tino Aikupito ke a'lofa ki tino Isalaelu, tela ne tuku ei ne latou a mea e ma'nako latou ki ei. I te faiga tena, ne olo ei a tino Isalaelu mo te maumea lasi o Aikupito.

³⁷Ne kamata te malaga a tino Isalaelu, o sasale atu mai Lamese ki Sukota. E tusa mo te ono selau afe tagata, e se aofia i ei a fafine mo tamaliki.

³⁸E tokouke foki tino fakaatea, mo mamoe mo kouti mo pulumakau e uke ne olo tasi latou.

³⁹Ne tao ne tino Isalaelu a olotou falaoa se faka'fete, ko falaoa kola ne aumai ne latou mai i Aikupito. Ne tuli fakavave latou keatea mai Aikupito tela ko se maua ei se taimi o fakatoka meakai io me palu ne falaoa faka'fete.

⁴⁰Ne nofo tino Isalaelu i Aikupito e tusa mo te 430 tausaga.

⁴¹I te aso ne katoa ei te 430 tausaga, ne tiaki ei ne matakaiga o Isalaelu te fenua o Aikupito.

⁴²Ko te po eiloa tenei tela ne filifili ne te Aliki ke aumai ei tena fenua keatea mai Aikupito. Ko te po foki eiloa tenei, tela ka fakatapu atu ki te Aliki i taimi katoa mai mua, me se po e 'tau o fakamanatu faeloa ne tino Isalaelu.

⁴³Ne fai mai te Aliki ki a Mose mo Alona penei, “Konei a tulafono o te Paseka; E seai se tino fakaatea e kai i te 'kaiga o te Paseka.

⁴⁴Kae ka mafai ne so se pologa, tela ko oti ne togi ne so se tino i a koutou o kai manafai ko oti a ia ne pilitome.

⁴⁵E seai se tagata tela se nofo tumau i te fenua io me se tino galue se tumau e tau o kai i te 'kaiga o te Paseka.

⁴⁶A meakai kola ne fakatoka i te fale e tasi e 'tau o kai i loto eiloa o te fale tena. E tapu se mea e ave ki tua, e tapu foki e 'fati se ivi o se manu.

⁴⁷Ko te fenua katoa o Isalaelu e 'tau o fakamasaua te kaiga fakamanatu tenei.

⁴⁸E tapu se tino seki pilitome o kai i te 'kaiga nei. Kafai e isi se tino fakaatea e nofo i te fenua kae fia fakamanuia ne ia a te Paseka o fakaaloalo ki te Aliki, e 'tau mo koutou o pilitome a tagata katoa i tena kaiga. Tela la, ko 'tau ei mo koutou o fai a ia e pela eiloa me se tino tonu o te fenua. Ka talia foki a ia ke kai i te kaiga o te Paseka.

⁴⁹Ko tulafono kona e 'tau o fai ne tino Isalaelu tonu, pela foki mo tino fakaatea kola e nofo i te otou fenua.”

⁵⁰Ne faka'logo katoa a tino Isalaelu o fai a mea kola ne fakatonu ne te Aliki ki a Mose mo Alona.

⁵¹Ko te aso tena tela ne aumai ei ne te Aliki a matakaiga o Isalaelu keatea mai Aikupito.