Read Te Tusi Tapu I Te Gana Tuvalu Lomiga Lua ESOTO 16 Bible Online

ESOTO 16 - Te Tusi Tapu I Te Gana Tuvalu Lomiga Lua bible

ESOTO 16

¹Ne tiakina ne te kau Isalaelu te koga ko Elima, kae i te po sefulu lima o te lua o masina i te otiga ne tiakina ne latou a Aikupito, ne oko atu ei latou ki te koga lavaki ko Sina, tela e tu i te va o Elima mo Sinai.

²I te koga lavaki tena ne fakatagi atu ei tino Isalaelu ki a Mose mo Alona kae fai atu ki a laua penei,

³“E sili atu te 'lei moi ne tamate matou ne te Aliki i Aikupito. I te motou 'nofoga i Aikupito, e mafai faeloa ne matou o sagasaga ki lalo o 'kai fakalei omotou kano manu. E uke foki meakai valevale e kai ne matou, kae e mafai foki ne te tino o kai ki te mea e mafai ne ia o kai. Kae nei, ne aumai fua ne koulua a matou ke mate fiakai i te koga lavaki tenei.”

⁴Ne fai mai te Aliki ki a Mose penei, “Ka faka'to ifo ne au a meakai mai te lagi mo koutou katoa. I aso takitasi, a tino ka olo o tae a meakai e lava ei latou i te aso tena. I te feitu tena, ka tofotofo ne au a latou me e tautali i aku fakatonuga me ikai.

⁵I te ono o aso, e tau o puke mai ne latou a meakai mo aso e lua, ko fakatoka ei.”

⁶Tena ne fai ei Mose mo Alona ki tino Isalaelu katoa penei, “I te afiafi nei ka iloa ei ne koutou me ko te Aliki ne aumai ne ia koutou keatea mai Aikupito.

⁷I te tafataeao, ka matea ei ne koutou a te mainaga o te fakatasi mai o te Aliki. Ko oti ne lagona ne ia te otou mui'mui. Maua nei e fai fua te fakatonuga tela e fai mai ne te Aliki.”

⁸Tela, fai atu ei a Mose penei, “Ko te Aliki ka tuku atu ne ia a kano manu mo otou kai i te afiafi, kae i te taeao ka tuku atu ne ia a falaoa ki te mea e ma'nako koutou ki ei, me ko oti ne lagona ne ia te otou tagi mo te se ma'lie ki a ia. Kafai e mui'mui koutou ki a maua, a te tonuga a koutou e muimui ki te Aliki, me i maua e tau'tali fua i fakatonuga e fai mai ne te Aliki.”

⁹Muna Mose ki a Alona, “Fai atu ki tino Isalaelu katoa ke o'mai o tu i mua o te Aliki, me ko oti ne lagona ne ia te lotou tagi.”

¹⁰I te faipatiatuga a Alona ki te kau Isalaelu, ne saga olotou mata ki te koga lavaki, te mea loa ko matea ne latou te mainaga o te Aliki mai te kaumana.

¹¹Muna te Aliki ki a Mose,

¹²“Ko oti ne lagona ne au a te mui'mui o tino Isalaelu. Fai atu ki a latou me i te taimi eiloa e to ei te la, ka maua ei ne latou ne kano manu mo olotou 'kai; kae i te tafataeao ka maua ne latou a falaoa, e tusa mo te uke e ma'nako latou ki ei. Ka iloa ei ne latou i a au, te Aliki, ko te lotou Atua.”

¹³I te afiafi, ne eva mai a fuifuiga salu uke eiloa tela ko tafola valevale i matafale o olotou fale moe; kae i te tafataeao ko lavea atu te sau i tafafale o latou.

¹⁴I te maloga o te sau ko lavea atu se mea manifinifi pela me se matutuga kiona i luga i te laukele. E malulu kae kena pela me se kiona.

¹⁵I te mateaga ne tino Isalaelu, ne seki iloa ne latou me se a, tela ne fai ake ei latou penei, “Se a te mea tenei?” Ne fai atu a Mose ki a latou penei, “Tenei te meakai tela ko tuku atu ne te Aliki ke kai koutou ki ei.

¹⁶Ko oti ne fai te fakatonuga a te Aliki ke olo koutou takitokotasi o fakaputu meakai kona ne tuku mai ne ia ki te mea e lava koutou i ei. E taki lua lita i te tino tokotasi i te kaiga.”

¹⁷Ne fai ne tino Isalaelu a te fakatonuga tena, a nisi tino e uke olotou mea ne puke, ka ko nisi e mutana.

¹⁸A latou kola e uke olotou mea ne tae e se tō uke, pela foki eiloa mo latou kola ne tae e mutana, e se to mu'tana foki. Tela la, ne tae eiloa ne te tino a te mea e lava lei ei a ia.

¹⁹Ne fai mai a Mose ki a latou penei, “E seai ne mea e faka'toe ki te taeao.”

²⁰E isi ne tino ne seki faka'logo ki a Mose, kae faka'toe eiloa ne latou ne mu mea. I te taeaoakega ko fonu i ilo kae ko manogi masei foki. Tela, ne ita ei a Mose ki a latou.

²¹I tafataeao katoa ne olo a tino o tae te aofaki e ma'nako latou ki ei; kae i taimi ko vela mai ei a te la, a mea kola e toe i te laukele ko liu vai.

²²I te ono o aso, ne tae ne latou fakatau mo aso e lua, e taki fa lita i te tino tokotasi. Ne o'mai katoa a takitaki o Isalaelu o fakamatala ki a Mose te mea tena,

²³kae fai atu a Mose ki a latou penei, “Ko oti ne fai te fakatonuga a te Aliki, i te aso taeao se aso tapu, kae se aso malolo foki, tela e tau o fakatapu atu ki a ia. I te aso nei, tao a mea kola e manako koutou o tao kae saka a mea kola e manako koutou o saka. A mea kola e toe e tau o tuku mo te aso taeao.”

²⁴E pela eiloa mo te fakatonuga a Mose, ne tausi ne latou a mea kola e toe mo te sua aso; seki masei, seki tolo foki ne ilo.

²⁵Muna Mose, “Kai a mea konei i te aso nei, me i te aso nei ko te Sapati, te aso malolo tela ko oti ne fakatapu mo te Aliki. Ka seai ne meakai e lavea ne koutou i otou tafafale.

²⁶E 'tau mo koutou o tae meakai i aso e ono, kae i te fitu o aso, te aso malolo, ka seai ne meakai e maua ne koutou.”

²⁷I te fitu o aso, e isi ne tino ne olo o tae meakai, kae seai ne olotou mea ne maua.

²⁸Tela ne fai mai ei te Aliki ki a Mose penei, “Ka gata afea te se fia faka'logo o koutou ki aku fakatonuga?

²⁹Masaua me ko oti ne tuku atu ne au, ko te Aliki, se aso malolo mo koutou. Tena te mea e tuku faeloa atu ne au ki a koutou a meakai i te ono o aso e fakatau mo aso e lua. E tau mo koutou o nofo malie i otou fale i te fitu o aso.”

³⁰Tena, seki ga'lue ei a tino Isalaelu i te fitu o aso.

³¹Ne fakaigoa ne tino Isalaelu a te meakai tela ne tuku mai ne te Aliki ko te manai,[15] e foliga pela me se tamā fuaga kena, kae ka kai koe ki ei, e pela me se masi ne palu mo te hani.

³²Muna Mose, “Ko oti ne fakatonu mai te Aliki ki a tatou, ke tausi ne manai ma o'tou mokopuna, ko te mea ke lavea ne latou te meakai tela ne tuku mai ne te Aliki ke kai tatou i ei i te koga lavaki, i te aumaiga ne ia tatou mai Aikupito.”

³³Muna Mose ki a Alona, “Puke mai se tia, kae fao ki loto ne manai e tusa mo te lua lita te 'mafa, kae tuku ki loto i se koga tapu ke tausi ma o'tou mokopuna.”

³⁴E pela mo te fakatonuga a te Aliki ki a Mose, ne tuku ei ne Alona i mua o te Pusa o te Feagaiga, ke mafai o tausi faka'lei.

³⁵Ne kai eiloa tino Isalaelu i te manai i te fa sefulu tausaga ke oko eiloa ki taimi ne oko atu latou ki te fenua o Kanana, tela ne nofo tumau ei latou.

³⁶A te mea e fua ki ei manai i aso kona e tusa mo te luasefulu lita.