Read Te Tusi Tapu I Te Gana Tuvalu Lomiga Lua ESOTO 19 Bible Online

ESOTO 19 - Te Tusi Tapu I Te Gana Tuvalu Lomiga Lua bible

ESOTO 19

¹Ne tiaki ne tino Isalaelu a Lefiti, kae ko te aso muamua o te tolu o masina mai tua ifo o te tiakinaga ne latou Aikupito, ne oko atu ei latou ki te vao o Sinai. I kona ne fakamanava ei latou i kautafa o te mauga o Sinai,

³ka ko Mose ne fanake ki luga i te mauga o fai'pati mo te Atua. Ne kalaga mai te Aliki ki a ia mai te mauga, kae fai mai ke faipati atu a ia ki tino Isalaelu, te fanauga a Iakopo, penei:

⁴“Ne lavea ne koutou a mea kola ne fai ne au ki tino Aikupito, mo taku aumaiga i a koutou ki a au i konei, e pela me se aeto e ave ne ia ana tamā punua i luga i ona kapa'kau.

⁵Nei la, kafai e faka'logo mai koutou ki a au kae tausi taku feagaiga, ka fai koutou mo oku tino tonu eiloa. A te lalolagi katoa e o oku, ka ko koutou ko oku tino filifilia,

⁶ko tino kola ko tuku katoatoa mai olotou olaga ki a au, kae ka tavini mai koutou ki a au e pela mo ne faitaulaga.”

⁷Tela la, ne fanaifo a Mose ki lalo mai te mauga, 'luku fakatasi ei ne ia a takitaki o tino Isalaelu kae taku atu ki a latou a mea katoa kola ne fakatonu mai ne te Aliki ki a ia.

⁸Ne tali fakatasi mai a tino katoa penei, “Ka fai ne matou a mea katoa kola ne faipati mai ei te Aliki.” Ne taku atu a te mea tena ne Mose ki te Aliki.

⁹Ne fai mai a te Aliki ki a Mose, “Ka fanatu au ki a koe i te kaumana matolu, ko te mea ke lagona ne tino ma faipati atu au ki a koe, ka talitonu ei foki a latou ki a koe i taimi katoa.” Ne taku atu ne Mose ki te Aliki a te tali a tino Isalaelu ki a ia

¹⁰kae fai mai te Aliki ki a ia penei, “Fano o taku atu ki tino ke fakaaoga te aso nei mo te aso taeao, e fakatapu kae faka'ma ei olotou loto mo te tapuakiga. E 'tau mo latou o 'ta olotou gatu,

¹¹kae ke toka latou i te aso a taeao atu. I te aso tena ka vau ei au ki lalo mai te mauga o Sinai, ki te koga tela e mafai o lavea ei au ne tino katoa.

¹²Fai se tuakoi fakapukupuku i te mauga, ko te mea ke se oko atu ki ei a tino. Fai atu foki ki a latou ke sa olo ake ki te mauga, io me fakapilipili atu ki ei. Kafai e isi se tino e 'laka atu ki ei tona vae, ka tamate a ia;

¹³e 'tau o peipei a ia ki fatu io me sana ki matasana, kae mo a eiloa e fakapatele atu ki ei se tino. E fakasino te mea tena ki tino mo manu; e 'tau eiloa o oko ki ei te mate. I te taimi tela e fakatagi ei te pu, ko fatoa olo ake ei a tino ki luga i te mauga.”

¹⁴Ne fanaifo a Mose ki lalo mai te mauga, folafola mai ei ne ia ki tino ke fakatoka latou mo te tapuakiga. Tela, 'ta ei ne tino olotou gatu,

¹⁵kae ne toe fai mai Mose ki a latou, “Ke toka koutou i te aso e tafa mai ki te aso taeao. Mai i te taimi nei, ke mo a e olo koutou ki otou avaga.”

¹⁶ I te tafataeao o te tolu o aso, ne pa'pa fa'tili kae 'lapa uila, kae sae mai te kaumana matolu i luga o te mauga, lagona ei foki ne tino a te tagi malosi o te leo o te pu. Ne pole'pole i te ma'taku a tino katoa i te koga tena.

¹⁷Ne takitaki atu ne Mose a latou mai te koga ne 'nofo ei latou o fakafetaui ki te Atua, kae ne 'tu atu a latou i kautafa o te mauga.

¹⁸A te mauga o Sinai ne fakapulou ne te au, me i te Aliki ne fanaifo ki lalo i te mauga i te afi. Ne fanake ki luga te au e pela eiloa mo te au o te lase, ka ko na polepole malosi ei foki a tino katoa.

¹⁹A te leo foki o te pu e gasolo ake eiloa o maluga. Ne faipati atu a Mose, kae tali mai a te Atua ki a ia i te fatili.

²⁰Ne fanaifo te Aliki ki te ulu o te mauga o Sinai, kae kalaga ifo ki a Mose ke fanake ki kona. Ne fanake a Mose,

²¹kae ne faipati mai te Aliki ki a ia penei, “Fano ki lalo kae fai atu ki tino ke mo a e oko mai ki te tuakoi manafai e o'mai latou o onoono ki a au; kafai e fai ne latou te mea tena, ka 'mate te tokoukega o latou.

²²A faitaulaga foki kola e o'mai pili mai ki a au, e 'tau o faka'ma olotou loto, i te mea ma fakasala ne au a latou.”

²³Ne fai atu a Mose ki te Aliki, “E se mafai ne tino o olo ake ki luga, me ne fakatonu mai ne koe ke iloa ne matou i te mauga e tapu, kae ke fai foki se tuakoi fakapukupuku i te mauga ke se oko ki ei se tino.”

²⁴Ne tali mai te Aliki, “Fano ki lalo o aumai Alona ke o'mai tasi mo koe. Ka ko faitaulaga mo tino, e se 'tau o oko mai latou ki te tuakoi i te mea ma fakasala ne au a latou.”

²⁵Tela, fanaifo ei a Mose o taku atu ki tino a mea kola ne faipati mai ne te Aliki.