Read Te Tusi Tapu I Te Gana Tuvalu Lomiga Lua ESOTO 2 Bible Online

ESOTO 2 - Te Tusi Tapu I Te Gana Tuvalu Lomiga Lua bible

ESOTO 2

¹I te taimi tenei, e isi se tagata mai i te matakaiga o Levi ne avaga mo te fafine o te matakaiga foki eiloa tena,

²kae ne maua te la tama, se tamaliki tagata. Ne kilo atu te fafine i te gali o te tamaliki, funa ei ne ia i masina e tolu.

³I te taimi ko se toe mafai ei ne ia o funa te tamaliki, puke ei ne ia a te ato kome, ponopono ne ia ki pulukau ke se 'mama; kae tuku ei ne ia te pepe ki loto, tuku ei ne ia i te vao mouku i kaugutu o te vaitafe.

⁴Ne tu te tuagaene o te tamaliki tenei mai te koga tai mao kae kilokilo me se a te mea ka tupu ki te tamaliki.

⁵Ne vau te pulinisese o koukou i te vaitafe, ka ko ana tavini fafine e sasale i kaugutu o te vaitafe. Ne poi te pulinisese i te laveaga ne ia a te ato e tuku i loto i mouku, uga atu ei ne ia a tena tavini fafine e tokotasi ke puke mai a te ato.

⁶Ne tala ne te pulinisese a te ato tena, lavea ei ne ia te tamaliki tagata e takato i loto. Ne tagi te tamaliki tenei, lagona ei ne te pulinisese a te alofa ki te tamaliki tenei. Muna a ia penei, “A ia nei se tamaliki Epelu.”

⁷I te taimi foki eiloa tena, ne tu mai ei te tuagane o te tamaliki tenei, kae ne fesili mai ki te pulinisese penei, “E fiafia koe ke fano au o kalaga ki se fafine Epelu ke tausi ne ia te tamaliki tena ma koe?”

⁸Ne tali atu a te pulinisese, “Ko lei”. Tela, fano ei te tuagane o te pepe tenei o kalaga ki te matua tonu o te pepe.

⁹Ne fai atu te pulinisese ki te fafine penei, “Puke te tamaliki tenei o tausi ma aku, kae ka togi koe ne au.” Tena ne fano ei te fafine tenei mo te pepe, tausi ei ne ia.

¹⁰Fakamuli ifo, i te matuaga lei o te tamaliki, ave ei ne ia ki te tamafafine a te tupu, tela ne puke ne ia mo fai tena tama tonu. Ne fai aka ei te pulinisese ki a ia eiloa penei, “Ne avaka ne au a te tamaliki tenei mai te vai, tela ne fakaigoa ei ko Mose.”[3]

¹¹ I te tamataenega o Mose, ne fano a ia o fakasula atu ki ona tino, te kau Epelu, lavea ei ne ia te nofo pologa o latou. Ne lavea foki ne ia a te tino Aikupito e tokotasi ne tamate ne ia te tagata Epelu.

¹²Ne kilokilo aka Mose ki ona feitu katoa, seai loa se tino e kilokilo atu ki a ia, i kona foki eiloa, tamate ake ne ia te tino Aikupito tela ne ta ne ia te tagata Isalaelu, kae tanu tena foitino i te one.

¹³I te sua aso, ne toe fanatu a Mose, lavea ei ne ia te tokolua tino Epelu e taua. Ne fai atu a ia ki te tagata tela e 'se, “Ai a e ta ei ne koe tou taina Epelu?”

¹⁴Ne tali atu te tagata Epelu tena penei, “Ko oi te tino ne fai ne ia koe ke pule kae fakamasino i a matou? Ka vau koe o tamate au pela mo te tamatega ne koe te tagata Aikupito tela?” Ne mataku Mose kae mafaufau aka a ia pela me kaati ko iloa faeloa ne tino i te tamatega ne ia te tagata Aikupito.

¹⁵I te logoga o te tupu i te mea tela ne fai ne Mose, ne taumafai a ia ko Mose ke tamate, kae ne sola Mose ki Mitiana, seki maua ei a ia ne te tupu. I te aso e tasi, ne sagasaga Mose i tafa o te vaikeli, kae olo atu a tamaliki fafine e tokofitu a Ietelo, te faitaulaga i Mitiana, o asu vai mo fainu a lafu mamoe mo kouti a te olotou tamana.

¹⁷Kae e isi ne tino leoleo mamoe ne atuli ne latou a tama fafine konei a Ietelo keatea mai i te vaikeli tena. Ne tu ake Mose o faka'sao a tama fafine kona a Ietelo mai nisi tino leoleo mamoe, asu foki ei ne ia a vai mo fainu olotou manu.

¹⁸Ne foki atu tama fafine kona ki te olotou tamana, kae fesili mai te lotou tamana penei, “Ai a ko vave mai ei koutou i te aso nei?”

¹⁹Ne tali atu latou penei, “E isi se tagata Aikupito ne fakasao ne ia matou mai tino leoleo mamoe, kae ne asu ne ia motou vai, fainu foki ne ia a omotou manu.”

²⁰Ne fesili mai te lotou tamana penei, “Tefea la te tagata tena? Ai a ne se aumai ei ne koutou? Olo nei o fai ki ei ke vau ke kai tatou.”

²¹Ne fiafia Mose o nofo i a Ietelo, ne tuku atu foki ne Ietelo tena tama fafine tokotasi ko Sepola ke avaga mo ia.

²²Ne fanau mai ne Sepola, se tama tagata. Ne fai ake a Mose ki a ia eiloa, “Au se tino faka-atea i te fenua nei, tela ka fakaigoa ne au a ia ki a Kelesoma.”[4]

²³I te tausaga mai tua ifo, ko mate te tupu o Aikupito, ka ko tino Isalaelu koi fakapologa faeloa ne tino Aikupito, tela ne tagi ei latou mo se fesoasoani. Ne oko atu te lotou tagi ki te Atua,

²⁴tela ne lagona ne ia te lotou fita, masaua ei ne ia tena feagaiga mo Apelaamo, Isaako mo Iakopo.

²⁵Ne lavea ne Ia te 'nofo pologa o tino Isalaelu; ko oko eiloa i tena alofa ki a latou.[5]