Read Te Tusi Tapu I Te Gana Tuvalu Lomiga Lua ESOTO 21 Bible Online

ESOTO 21 - Te Tusi Tapu I Te Gana Tuvalu Lomiga Lua bible

ESOTO 21

¹“Tuku atu ki tino Isalaelu a tulafono konei:

²Kafai e 'togi ne koe se pologa Epelu, e 'tau o tavini a ia ki a koe i tausaga e ono. I te fitu o tausaga ke fakasaoloto a ia kae ke seai se 'togi e tuku mai ne ia ki a koe.

³I te taimi ne vau ei a ia o pologa i a koe e seai sena avaga, ke seai foki sena avaga e olo mo ia manafai e saoloto a ia; kae kafai ne o'mai tasi mo tena avaga, e 'tau foki o olo tasi mo tena avaga.

⁴Kafai ne avatu ne tena matai se avaga ma ia kae ne fanau ne ia ne tamaliki tagata io me ne tama fafine, a te fafine mo tamaliki, e i te pule a te matai, ka ko te tagata, ko ia fua tokotasi e saoloto o fano.

⁵Kae kafai e fakaasi tonu i a ia e alofa eiloa ki tena pule, tena avaga mo ana tamaliki, kae e se manako foki a ia o saoloto,

⁶ke ave la a ia ne tena matai ki te koga e fai ei tapuakiga. I kona e fakatu ei a ia i te mataloa io me ko te pou mataloa kae 'suki tena taliga. Ko fai ei a ia mo pologa i tena olaga katoa.

⁷“Kafai e 'togi atu ne se tagata tena tama fafine ke fai mo pologa, e se mafai o saoloto a ia pela mo pologa tagata.

⁸Kae kafai ne 'togi atu a ia ki se tagata ne manako ke avaga ki a ia, kae nei la ko se manako te tagata tena ki a ia, tela la, ke toe togi atu a ia ki tena tamana. E se mafai ne tena pule o togi atu a ia ki se tino o fenua fakaatea, me e seki tausi faka'lei a ia ne tena matai.

⁹Kafai e togi ne se tagata se pologa fafine mo fai te avaga a tena tama tagata, ke fai la ne ia e pela eiloa me se tamaliki fafine a ia.

¹⁰Kafai se tagata e fai se isi avaga ma ia, e 'tau mo ia o tumau tena tausiga ki tena avaga mua o tuku atu meakai mo gatu, ke oko ki feitu fakatau avaga ne masani ei laua.

¹¹Kae kafai e se fai ne ia a mea konei ki te fafine, e 'tau loa mo ia o fakasaoloto te fafine ke fano e aunoa mo se 'togi e aumai ki a ia.

¹²“So se tino e tamate ne ia se isi tino e 'tau foki a ia o tamate.

¹³Kae kafai ne mate i se mea pasala kae seki mafaufau a ia o ta ke mate, e mafai ne ia o sola ki te koga tela ka filifili ne au mo koutou, me i kona ka sao ei a ia.

¹⁴Kae i te taimi e ita ei se tino, ka ko loto eiloa o ta ke mate se isi tino, ke tamate foki eiloa a ia faitalia me tele ki toku fata-fai-taulaga ke sao a ia.

¹⁵“So se tino e 'kini ne ia tena tamana mo tena matua, ke tamate a ia.

¹⁶“So se tino e kaisoa ne ia se tino o togi atu ki se isi tino io me tausi ne ia mo fai tena pologa, ke tamate a ia.

¹⁷“So se tino e pati mafa ne ia tena tamana mo tena matua, ke tamate eiloa a ia.

¹⁸“Kafai e taua se tokolua, kae pei ne te sua tagata te isi tagata ki se fatu io me fusu, kae e se mate, e se 'tau o fakasala. Kafai a ia tela ne pakia ko se maua o sasale i tena pakiaga, kae fakamuli ifo ne mafai o tu ki luga o sasale i te matafale mo tena tokotoko; ke 'togi la ne te tagata tela ne ta ne ia a ia a ona taimi ko maumau, kae tausi faka'lei foki ke oko ki tena malosi 'lei.

²⁰“Kafai se tagata e pago ne ia sena pologa tagata io me se pologa fafine ki se lakau, kae ne mate te pologa i te koga ne pago ei a ia, ke fakasala a te tagata tena.

²¹Kae kafai te pologa e seki mate i te aso ne pago ei mo te aso mai tua ifo; ke se fakasala a tena pule, me ko lava eiloa ana tupe ne maumau i te 'togiga o tena pologa.

²²“Kafai ne tagata ne taua kae pakia ei se fafine faitama, tela ko lele ei tena tama, kae seai se mea ne tupu ki tena foitino, ko te tagata tela ne pakia ei te fafine ke fakasala, e pule loa te avaga a te fafine i te faiga o tena sala kae fakamaoni ne famasino.

²³Kae kafai ne pakia te fafine, a te fakasalaga, e sui te ola ki te ola,

²⁴ko te mata ki te mata, te nifo ki te nifo, te lima ki te lima, te vae ki te vae,

²⁵te 'paku ki te 'paku, te pakia ki te pakia, te pokomalo ki te pokomalo.

²⁶“Kafai se tagata e pago ne ia te mata o tena pologa tagata io me se pologa fafine, tela ko se aoga ei tena mata, ke fakasaoloto la te pologa e sui i ei tena mata.

²⁷Kae kafai ne pago ne ia se nifo o tena pologa kae to, ke fakasaoloto la te pologa mo sui tena nifo.

²⁸“Kafai e sua ne se pulumakau a se tino kae mate, e 'tau o peipei ki fatu a te pulumakau tena, kae ke se kaigina ana 'kano; ka ko te tino e a ia a te pulumakau e se fakasala.

²⁹Kae kafai te pulumakau ne masani o sua ne ia a tino, ka ko oti ne fakailoa atu ki tena pule, kae ne seki tausi ki loto i se lulu ka ko toe sua foki ne ia se tino ke mate, ke peipei ke mate, ke tamate foki te tino e a ia te manu.

³⁰Kae kafai ko fakataga atu a ia ke 'togi tena sala mo fakasao tena ola, e 'tau mo ia o 'togi te aofaki tonu o tupe e manakogina.

³¹Kafai e mate se tamaliki tagata io me se tamaliki fafine ne sua ne se pulumakau, ko tulafono eiloa kona e fai ki ei.

³²Kafai e mate se pologa tagata io me se pologa fafine ne sua ne se pulumakau, ko te tino e a ia te manu e 'tau o togi ne ia ki te matai o te pologa te tolusefulu tupe siliva, ka ko te pulumakau ke peipei ki fatu ke mate.

³³“Kafai e suke ne se tagata te pono o te lua, io me keli ne ia se lua kae se 'pono, kae to ki loto se pulumakau io me se asini,

³⁴e 'tau la o 'togi ne ia te manu. Ke togi ne ia te tupe ki te tino e a ia te manu, kae puke ma ia a te manu mate.

³⁵Kafai ko mate se pulumakau a se tino ne ta ne se pulumakau a te sua tino, e 'tau mo tagata konei e tokolua o 'togi atu te pulumakau ola kae vaelua te tupe i a laua; ke vaelua foki a 'kano o te manu ko mate.

³⁶Kae kafai e iloa tonu eiloa i te pulumakau e masani sale o 'ta ne ia ne manu kae seki tausi faka'lei ne tena matai, e 'tau mo ia o togi te pulumakau mate ki te pulumakau ola, kae puke ma ia te pulumakau mate.