Read Te Tusi Tapu I Te Gana Tuvalu Lomiga Lua ESOTO 22 Bible Online

ESOTO 22 - Te Tusi Tapu I Te Gana Tuvalu Lomiga Lua bible

ESOTO 22

¹“Kafai e kaisoa ne se tino se pulumakau me se mamoe o ta io me fakatau atu, e 'tau o toe avatu ne ia a pulumakau e lima mo sui te pulumakau e tasi kae fa a mamoe mo sui te mamoe e tasi. Kafai la e seai ne ana mea mo taui a mea ne kaisoa ne ia, e 'tau o fakatau atu a ia pela me se pologa mo sui a mea ne kaisoa ne ia

²E tau o togi ne ia a mea kolā ne kaisoa ne ia. Kafai e seai ne ana mea, ko tau ei a ia o togi atu pela me se pologa, ko te mea ke sui ei a mea kola ne kaisoa ne ia.

⁵“Kafai se tino e tuku fua ana manu ke tele valevale i loto i se fatoaga io me se togavine a se isi tino kae kai katoa a fuataga o lakau e ola i loto i te fatoaga, [19] e 'tau mo ia o sui a mea ne fakamasei ki mea tafasili i te 'lei mai ana fatoaga mo togavine.

⁶“Kafai se tino e faka'ka ne ia se afi i tona manafa eiloa, ka ko 'solo atu te afi ki te manafa o te sua tino, ko 'paku katoa ei a saito e ola i ei, ko fati'fati kae siga, ko te tino ne faka'ka ne ia te afi e togi ne ia a mea ko masei.

⁷“Kafai se tino ko talia ne ia ke tausi a tupe io me ne nisi mea aoga a se isi tino ka ko kaisoa i loto i tena fale, kafai ko maua te tino ne kaisoa ne ia, e 'tau o 'togi fakalua ne ia.

⁸Kae kafai e se maua te tino ne kaisoa ne ia, ke ave la te tino ne tausi ne ia a mea aoga kona ki te koga e fai ei tapuakiga, o fai tena tautoga i kona me e seki kaisoa ne ia a koloa a te sua tino.

⁹“I so se fakakinauga e uiga ki koloa, me se pulumakau, me ne mamoe, me ne lavalava, io me ne nisi mea ko 'galo, e 'tau o ave te tokolua kona e finau ki te koga e fai ei a tapuakiga. Ko te tino tela e fakaasi mai ne te Atua me 'se, e 'tau o togi fakalua ne ia ki te sua tino.

¹⁰“Kafai e loto malie se tino ke tausi ne ia se asini a te sua tino, io me se pulumakau, me se mamoe io me se isi manu, ka ko mate, io me pakia, me ave ne se kautau, kae seai se molimau,

¹¹ko te tino tena e 'tau o fano ki te koga tapuaki o fai sena tautoga, me seki kaisoa ne ia te manu a te sua tino. Kafai la e tonu ne seki kaisoa ne ia te manu, ke loto malie la te tino e a ia te manu ke se sui ne te tino tena ana mea ne maumau.

¹²Kae kafai ne kaisoa eiloa, e 'tau o 'togi atu ne ia ki te tino e a ia te manu.

¹³Kafai ne tamate ne se manu fekai, ke aumai la ne ia a mea e 'toe i te foitino o te manu tela ne ta, e fakamaoni ei me ne ta ne se manu fekai; ko se 'togi ei ne ia a te manu ne kai ne manu fekai.

¹⁴“Kafai se tino ne kaitalafu ne ia se manu a te sua tino kae pakia me mate i te taimi e galo ei te tino e a ia, ko te tino kaitalafu ke togi ne ia.

¹⁵Kae kafai ne tupu te mea nei kae nofo i ei a te tino e a ia a te manu, e tau o sui tena manu. Kafai te manu ne togi ne se tino ke fakagalue ne ia i se taimi toetoe, tena eiloa te togi o te manu, manafai e mate io me galo.

¹⁶“Kafai se tagata e moe mo se taupou, kae seki ai sena famau, e 'tau o tuku atu ne ia te 'togi o te tamafine, kae avaga laua.

¹⁷Kafai e se talia ne tena tamana ke avaga mo ia, e 'tau mo ia o 'togi ki te tamana te katoaga o te tupe e 'tau ki te togi o te taupou.

¹⁸“Ke tamate so se fafine e fai vailakau.

¹⁹“Ke tamate so se tino e 'moe mo se manu.

²⁰ “Ke fakasala ki te mate so se tino e ofo atu ne taulaga ki so se atua na ko au fua te Aliki.

²¹“Sa fakafi'ta me fakasaua ki se tino fakaatea, masaua i a koutou ne tino fakaatea i te otou nofoga i Aikupito.

²²Sa fakapuapuagagina a fafine ko mate olotou avaga, mo tamaliki ko seai ne matua.

²³Me kafai e fai ne koutou, ko au ka tali atu ki a latou manafai e ka'laga mai mo se fesoasoani,

²⁴ka ko au ka ita kae tamate koutou i taua. Ko otou avaga foki ka 'nofo taka, mo otou tamaliki ka seai ne olotou tamana.

²⁵“Kafai e tuku atu ne koe ne tupe ke kaitalafu ne so se tino o toku fenua kola e ma'tiva, sa fakapasene au tupe e pela mo tino kola e faka kaitalafu olotou tupe kae ma'nako ke togi atu mo te pasene.

²⁶Kafai ne ave ne koe se gatu o se tino i se togi e fakamau i ei tena kaitalafu ke toe 'togi mai ne ia ki a koe, e 'tau o toe fakafoki ne koe ki a ia kae koi tuai o to te la,

²⁷me tena fua te mea e kafu ei a ia i po mo fakamafanafana ei a ia. Ka mafai pefea o moe a ia seai sena gatu mo pulupulu? Kafai la a ia e kalaga mai ki a au mo se fesoasoani, ka talia ne au, me i a au e 'fonu ite alofa.

²⁸“Sa muna masei ki te Atua,[20] sa muna 'mafa foki ki se takitaki o te otou fenua.

²⁹“Aumai ki a au a taulaga mai fuataga o au saito, uaina mo au sinu olive manafai ko ma'tua. “Aumai foki ki a au otou toekimua tagata,

³⁰pena foki mo toekimua pulumakau mo mamoe. Tuku eiloa te toekimua tagata ke nofo fakatasi mo tena matua i aso e fitu, ka ko te valu o aso e aumai ei ne koe ki a au.

³¹“A koutou ko oku tino, tela la, e se 'tau o kai ki 'kano o so se manu ko oti ne tamate ne manu fe'kai; kae ke avatu ke kai ma kuli.