Read Te Tusi Tapu I Te Gana Tuvalu Lomiga Lua ESOTO 23 Bible Online

ESOTO 23 - Te Tusi Tapu I Te Gana Tuvalu Lomiga Lua bible

ESOTO 23

¹“Sa fakasalalau se tala se tonu; sa fesoasoani ki se tino agasala i te fai ne koe se molimau 'se.

²Sa tautali i te tokoukega kola e fai mea 'se io me fai ne latou ne molimau se tonu e fuli 'se ei te fakamasinoga tonu.

³Sa fakaasi atu foki i a koe e kau ki se tino mativa i tena fakamasinoga.

⁴“Kafai e matea ne koe, io me fetaui koe mo se pulumakau io me se asini a tou fili ko tele keatea, fakafoki atu ki a ia.

⁵Kafai e siga tena asini ki lalo mo tena amoga, fesoasoani koe ki a ia o fakatu ki luga, kae sa fulitua ki ei.

⁶“Sa kalo keatea mai te mea tonu i taimi e fakamasino ei se tino mativa manafai ko tu i te fono.

⁷Sa fai ne koe se molimau 'pelo, sa fai foki ne koe se tino amiotonu ke mate, me fakasala fakamasei ne au so se tino e fai amioga masei pena.

⁸Sa taliagina se meaalofa fakakolekole, me i meaalofa pena e fakakivi ne ia a mata o tino ke se iloa te mea tonu, kae fakamasei ei foki a olaga o tino amiotonu.

⁹“Sa fakasaua ki se tino o fenua fakaatea, me ko iloa ne koutou te tulaga o tino fakaalofa, me i a koutou ko oti ne 'nofo pela me ne tino fakaalofa i Aikupito.

¹⁰“E ono tausaga e toki ei saito i tau fatoaga, kae fakaputu a fua aoga.

¹¹Kae i te fitu o tausaga, ke mo a e galue koe ki tau fatoaga; sa tau foki ne fuaga i ei. Ko tino ma'tiva e mafai o kai ne latou a mea e ola i loto i fatoaga konei, ka ko te toega, ka fakaaoga ne manu o te vao. Ke fai foki pena i ou togavine mo au togaolive.

¹²“E ono aso o te vaiaso e galue ei koe, ka ko te fitu o aso e malolo ei koe, tela la, ko au pologa mo tino fakaatea kola e galue mo koe, mo au manu foki ko mafai o malolo.

¹³“Fakalogo mai ki mea katoa e faipati atu ne au ki a koutou; sa 'talo ki atua fakaatea, sa takutaku foki olotou igoa.

¹⁴“Ke fakamanatu ne koutou kaiga fiafia e tolu i te tausaga, e fakaaloalogina ei au.

¹⁵I te masina o Apipa, te masina tela ne tiaki ne koutou Aikupito, ko te masina tena e 'tau o fai ne koutou te Kaiga o Falaoa se Faka'fete, e pela mo te mea ne fakatonu atu ne au ki a koutou. Sa 'kai ki falaoa e palu ki mea faka'fete i aso e fitu o te kaiga. E tapu koutou e o'mai o tapuaki mai kae seai se taulaga e aumai.

¹⁶“Ke fai ne koutou te Kaiga o te Katiga o Saito i taimi e kamata ei koutou o tau a fuataga muamua o otou saito. “Ke fai foki ne koutou te Kaiga o Fale Fakamalumalu ave sale i malaga, i tau e ma'tua ei taukai, i te taimi e fakaputu ei ne koutou a fuataga mai otou togavine mo otou togalakau.

¹⁷E 'tau mo tino katoa o o'mai ki kaiga fiafia konei e tolu i tausaga takitasi o tapuaki mai ki a au, ko te Aliki te otou Atua.

¹⁸“Sa palu tasi otou falaoa mo mea faka'fete i taimi e ofo mai ei otou taulaga ki a au ki se manu. A gako o manu e fai taulaga mai ei koutou ki a au, i taimi o otou kaiga konei, ke sa tuku ke oko ki te sua taeao.

¹⁹“I tausaga takitasi, aumai ki te fale o te Aliki te otou Atua a saito muamua a koutou e 'kati. “Sa 'tunu se tamā mamoe io me se kouti ki vai ū o tena matua.

²⁰“Ka uga atu ne au se agelu ke muamua i otou mua o leoleo koutou i te otou malaga, kae ave koutou ki te koga ko oti ne fakatoka ne au mo koutou.

²¹Ava ki a ia kae faka'logo ki a ia. Sa 'teke ki a ia, me ne uga atu ne au a ia, me ka se fakamagalo ne ia koutou mafai e teke atu koutou ki a ia.

²²Me kafai e faka'logo koutou ki a ia kae fai a mea katoa e fakatonu atu ne au, ko au ka tau ki otou fili katoa.

²³Ka fanatu taku agelu i otou mua o ave koutou ki te fenua o tino Amoli, tino Heti, tino Pelise, tino Kanana, tino Hivi mo tino Iepuse ei, kae ka fakamalaia ne au a latou.

²⁴Sa ifo atu koutou o tapuaki ki olotou atua, sa fakaakoako foki ki olotou tapuakiga. Fakamasei aka olotou atua kae ofa ki lalo olotou tupua faite.

²⁵Kafai e tapuaki mai koutou ki a au, te Aliki te otou Atua, kae ka fakamanuia ne au koutou i meakai mo mea inu, e ave foki keatea ne au a famai mai i a koutou.

²⁶Ka seai se fafine i te otou fenua e lele sena tama, io me seai sena tamaliki. Ka tuku atu ne au te ola loa ki a koutou.

²⁷“Ka fakamatakutaku ne au a fenua kola e 'teke ki a koe; ka faka'numi ne au a mafaufau o tino o fenua kola e taua mo koutou, kae ka fai foki ne au otou fili katoa ke 'tele keatea mai i a koutou.

²⁸Ka fai ne au ou fili katoa ke manavase i te mataku;[21] ka afuli keatea ne au a tino Hivi, tino Kanana mo tino Heti i otou mua.

²⁹Ka se afuli ne au latou keatea i te tausaga e tasi; me kafai e fai ne au pena, ka lavaki te fenua, kae ka to uke a manu fe'kai e fita ei koutou.

³⁰Ka ko te faiga, ka afuli fakasolosolo ne au latou, ke oko eiloa ki te taimi e tokouke ei koutou ko fai ei mo koutou te fenua.

³¹E tuku foki ne au a tuakoi o otou fenua; e kamata mai i te Tai Kula ke oko ki te Vaitafe ko Eufilate, mai i te Tai Metitelani ke oko eiloa ki te koga lavaki. Ka fai ne au koutou ke malosi atu i tino o te fenua, kae ka afuli ne koutou latou keatea i otou mua.

³²Ke sa fai eiloa ne koutou se feagaiga mo latou io me ko olotou atua.

³³Ke sa faka'nofo ne koutou a tino kona i te otou fenua, me fai ne koutou pena, ka fai ne latou ke agasala mai koutou ki a au. Kafai e tapuaki koutou ki olotou atua, ko te malei masei tena mo koutou.”