Read Te Tusi Tapu I Te Gana Tuvalu Lomiga Lua ESOTO 24 Bible Online

ESOTO 24 - Te Tusi Tapu I Te Gana Tuvalu Lomiga Lua bible

ESOTO 24

¹Muna a te Aliki ki a Mose, “O'mai ki a au i luga i te mauga, koutou mo Alona mo Natapu mo Apiu, mo te tinofitu takitaki o Isalaelu. Ka koi tai mao koutou, ke pu'nou koutou ki lalo o tapuaki mai.

²Ko koe fua e Mose e fakapilipili mai ki a au, e seai aka foki. E tapu foki ma olo ake te fenua ki te mauga.”

³Ne fanatu a Mose o taku atu a fakatonuga mo tulafono katoa ki te fenua, kae tali fakatasi mai tino katoa penei, “Ka fai ne matou so se mea e faipati mai ei te Aliki.”

⁴Ne tusi katoa ki lalo ne Mose a fakatonuga a te Aliki. I te taeaopogipogi o te sua aso, ne fakatu ne ia se fata-fai-taulaga i kautafa o te mauga, faka'tu ei mo fatu e sefululua e faka'tau ki matakaiga e sefululua o Isalaelu.

⁵Tena, uga atu ei ne ia a tamataene tupu'tupu ke olo o 'sunu a taulaga ki te Aliki, ne sunu foki ne latou ne nai pulumakau mo fai taulaga fakafetai.

⁶Ne ave ne Mose te āfa o toto o manu o 'ligi ki loto i te tanoa, ka ko te sua vaega ne ligiligi ne ia ki te fata-fai-taulaga.

⁷Tela, ave ei ne ia te tusi o te feagaiga ko oti ne tusi ki ei a fakatonuga katoa a te Aliki, o faitau mo te leo maluga ki te fenua. Ne tali mai latou penei, “Ka faka'logo matou ki te Aliki, kae ka fai ne matou a mea katoa ko oti ne fakatonu mai ne ia.”

⁸Tena ne ave ei ne Mose a toto i loto i te tanoa o apiapi i luga o tino. Ana muna, “Tenei te toto e fakamau ei te feagaiga a te Aliki ne fai mo koutou i te taimi ne tuku atu ei ne ia a fakatonuga.”

⁹A Mose mo Alona mo Natapu mo Apiu mo te tinofitu takitaki o tino Isalaelu ne olo ake ki luga i te mauga

¹⁰kae ne matea ne latou te Atua o Isalaelu. Mai i lalo ifo o ona vae e isi se mea e foliga pela me se fatu safaila, e lanu usi e pela mo te lagi.

¹¹E seai se fakalavelave ne fakaoko ne te Atua ki takitaki konei o Isalaelu, ne matea ne latou te Atua, tela ne kai kae inu fakatasi ei latou.

¹²Ne fai mai te Aliki ki a Mose, “Vau ki a au i luga i te mauga. I te taimi e oko mai ei koe, ka avatu ne au ki a koe a papa fatu e lua kola ko oti ne tusi ne au ki ei a tulafono katoa mo fakatonutonu a tino.”

¹³A Mose mo Iosua, tena fesoasoani, ne fakatoka, kae ne kamata ne Mose[22] te la malaga ki luga i te mauga tapu.

¹⁴Ne fai atu a Mose ki takitaki, “Fakatali koutou i konei ke toe foki mai maua. Kiloke, a Alona mo Hulo konei e fakatasi koutou. So se tino e isi sena kinauga e fia sukesuke, e mafai o fano ki a laua.”

¹⁵Ne fanake a Mose ki te Mauga o Sinai, kae ne ufi katoa te mauga ne te kaumana.

¹⁶A te mainaga o te Aliki ne oko ifo ki luga o te mauga. Ne lavea ne tino Isalaelu te mainaga tena, e pela me se afi e ka i te ulu o te mauga. A te kaumana tenei ne ufi ne ia te mauga i aso e ono, kae i te fitu o aso ne kalaga mai te Aliki ki a Mose mai te kaumana.

¹⁸Ne fanake a Mose ki luga o te mauga ki loto i te kaumana. Ne nofo a ia i kona i ao mo po e fasefulu.