Read Te Tusi Tapu I Te Gana Tuvalu Lomiga Lua ESOTO 25 Bible Online

ESOTO 25 - Te Tusi Tapu I Te Gana Tuvalu Lomiga Lua bible

ESOTO 25

¹Te Aliki ne fai mai ki a Mose penei,

²“Fai atu ki tino Isalaelu ke fai mai se taulaga ki a au. Ke talia ne koe so se taulaga e manako so se tino o avatu.

³Konei la a mea mo fai taulaga: ko aulo, siliva, mo palasi;

⁴laugatu lino gali, te vulu lanu usi, lanu kulakula, mo te kula; mo laugatu fai ki fulufulu o kouti;

⁵pakili o mamoe e fakakula mo pakili manu lei; mo laupepa mai te lakau ko te akasia;

⁶te sinu mo moli; mo mea e fakamanogi ei te sinu milimili mo nisi mea ma'nogi aka foki;

⁷ko fatu kaneli mo nisi fatu taua ake foki ke fakamau ki te efota[23] mo te ufi fatafata o te Faitaulaga Pule.

⁸E 'tau mo te fenua o fai se faleie 'malu mo oku, ko te mea ke nofo atu au ki a latou.

⁹A te faleie mo ana meaafale katoa ke faite e tusa mo te fuafuaga ka fakaasi atu ne au.

¹⁰“Faite se pusa ki te lakau ko te akasia, e 110 senitimita te loa, e 66 senitimita te lauefa, kae 66 a senitimita te maluga.

¹¹Ke ufi ki te tina aulo a loto mo tua, ko fusi fakatamilo ei foki ki te aulo.

¹²Faite ne ligi aulo e fa mo sau te pusa, ko fakapiki ei ki ona vae e fa; e lua i te sua feitu, pena foki te sua feitu.

¹³Faite foki ne amo ki lakau o te akasia kae ufi foki ki te aulo,

¹⁴ko faulu ei ki ligi konei i feitu takitasi o te pusa.

¹⁵A amo konei ke tuku eiloa i loto i ligi kona kae se tau o ave keatea.

¹⁶Ka oti, tuku atu ei a papa fatu e lua ki loto i te pusa, konei ka tuku atu ne au ki a koe, kola e tusi i ei a tulafono.

¹⁷“Faite foki se pono aulo, e 110 senitimita te loa, kae 66 senitimita te lauefa.

¹⁸Tena, ko tuki ei te aulo ke foliga ki ne kelupi e lua.

¹⁹Kae ke faka'tu ki feitu takitasi o te pono. Kae faite ke 'pikitasi mo te pono.

²⁰A kelupi konei ke tu fakafesagai i luga i te pono, mo la kapakau e fola o fakamalumalu ifo ki te pono.

²¹Tuku a papa fatu kona ki loto i te pusa, ko pono ei.

²²Ka fetaui tatou i kona i te pusa, kae mai luga ake o te pono, i te va o kelupi e lua, ka avatu ne au ki a koutou aku tulafono katoa mo te fenua o Isalaelu.

²³“Faite se taipola ki te lakau ko te akasia, e 88 senitimita te loa, e 44 senitimita te lauefa, kae 66 senitimita te maluga.

²⁴Ka oti ko ufi ei ki te tina aulo kae fusi fakatamilo a ona feitu ki te aulo.

²⁵Ko faite aka ei foki ne koe se patini fakatamilo i mata o te taipola, e 75 milimita te lauefa, ko fusi ei fakatamilo ki te aulo.

²⁶Ko faite ei ne ligi ki aulo mo sau sale te taipola, faka'mau atu ki ana tulimanu e fa i koga i ona vae.

²⁷A ligi konei ke fakamau pili ki mata o te taipola.

²⁸Ka ko amo ke faite ki te lakau ko te akasia kae ufi ki te aulo.

²⁹Faite ne tifa, ipu, tia, mo poola e fakaaoga mo ave i ei te suavine e fai ei te taulaga. A mea konei ke faite katoa ki te aulo.

³⁰A te taipola ke tuku i mua o te Pusa o te Feagaiga, kae ke tuku faeloa i luga a te falaoa tapu.

³¹“Faite se tulaga aulo mo te moli. Ke tuki te aulo mo faite ki ei te foitino katoa o te moli, ana pula fakagaligali, pela foki mo moe mo lau ke tasi eiloa te foitino,

³²kae ke isi ne ana maga e ono e fakamau atu ki ona feitu, e tolu i te sua feitu kae tolu foki i te isi feitu.

³³A maga takitasi ke tofu mo pula fakagaligali e tolu, pela mo pula o te lakau ko te alamoni, kae ke isi eiloa ne olotou moe mo lau.

³⁴Faite ne pula e fa ke pela mo pula o te lakau ko te alamoni, mo moe eiloa mo lau mo fakagaligali te pou tu o te foitino moli.

³⁵Fai ke tasi te ponaga i sokoga o kaula taki lua.

³⁶A pona konei pela foki mo kaula mo te foitino moli, e faite ki te aulo ko oti ne tukituki ke fai mo foitino e tasi.

³⁷Faite ne mata moli e fitu mo te foitino moli ko te mea ke maina atu ki mua.

³⁸Ana sikofi mo ana telē ke faite katoa ki te aulo.

³⁹Fakaaoga se 35 kilokalame o te tina aulo mo faite te tulaga moli mo ana nisi mea katoa ake foki.

⁴⁰Fai eiloa ke pau pela mo taku fakaasiatuga ki a koe i luga i te mauga.