Read Te Tusi Tapu I Te Gana Tuvalu Lomiga Lua ESOTO 3 Bible Online

ESOTO 3 - Te Tusi Tapu I Te Gana Tuvalu Lomiga Lua bible

ESOTO 3

¹I te aso e tasi, ne tausi ei ne Mose a mamoe mo kouti a te tamana o tena avaga ko Ietelo, te faitaulaga o Mitiana. Ne taki atu ne ia te lafu i loto i te koga lavaki, oko atu eiloa a ia ki te mauga tapu, ko Sinai.

²Ne matea ne Mose i kona te agelu a te Aliki e pela me se ulaaga o te afi e maina ake mai i loto o te vao. Ne lavea ne Mose i te lakau e 'ka, kae se 'paku.

³Ne mafaufau ake Mose penei, “Ko fakaofoofogina te mea nei. Ai a e se 'paku ei te lakau tenei? Au ka fakapilipili ki ei ke matea faka'lei ne au.”

⁴I te mateaga ne te Aliki i a Mose ko fakapilipili atu, ne kalaga mai ei a ia mai loto i te lakau penei, “Mose! Mose!” Ne tali atu Mose, “Io, au tenei.”

⁵Ne fai mai te Atua ki a Mose, “Sa to fakapilipili mai. Tapale keatea ou taka i a koe e tu i luga i te laukele tapu.

⁶Au ko te Atua o otou tupuga, ko te Atua o Apelaamo, Isaako, mo Iakopo.” Tena, ne pono ei ne Mose ona mata, me mataku ma kilo ki te Atua.

⁷Ne toe fai mai te Aliki ki a Mose penei, “Ko oti ne lavea ne au te fakapologa fi'ta o tino Isalaelu ne tino Aikupito; ko oti ne lagona ne au te lotou tagi ke fakasao latou mai te fakapologa ne tagata Aikupito. E iloa ne au olotou puapuaga katoa,

⁸tenei ko fanaifo ei au ki lalo ke fakasao latou mai tino Aikupito, ke 'taki foki latou keatea mai Aikupito, ki se fenua e 'lei kae lasi, se fenua e maumea kae laukele ola, tela e nofo ei tino Kanana, tino Heti, tino Amoli, tino Pelise, tino Hivi, mo tino Iepuse.

⁹Ko oti ne lagona ne au te tagi a oku tino, kae lavea foki ne au a faiga se lei a tino Aikupito ki a latou.

¹⁰Tenei la ka uga atu koe ne au ki te tupu o Aikupito ke tuku atu oku tino ke taki ne koe keatea mai tona fenua.”

¹¹Kae fai atu Mose ki te Atua, “Au se tagata fua e seai se aoga. E fano pefea au ki te tupu ke tuku mai a tino Isalaelu ke taki ne au keatea mai Aikupito?”

¹²Kae tali mai te Atua, “Au e fakatasi atu ki a koe. Kafai ko takitaki mai ne koe a tino Isalaelu keatea mai Aikupito, ka tapuaki koe ki au i luga i te mauga tenei; ko fai ei te mea tena mo fakamaoniga i a koe ne uga ne au.”

¹³Ne tali atu Mose penei, “Kafai e fano au ki tino Isalaelu kae fai atu ki a latou penei, ‘Te Atua o otou tupuga ne uga mai ne ia au ki a koutou’, kae kafai e fesili mai pela ‘Ko oi tena igoa?’ Se a taku tali ka fai ki a latou?”

¹⁴Ne fai mai te Atua, “Ko Au Ko Au eiloa. Tenei te tali a koe e 'tau o fai ki a latou: ‘A ia tela e fakaigoa Ko Au Eiloa[6] ne uga mai ne ia au ki a koe.’

¹⁵Fai ki tino Isalaelu i a Au, te Aliki, te Atua o olotou tupuga, te Atua o Apelaamo, Isaako mo Iakopo ne uga mai ne ia koe ki a latou. Tena toku igoa ki te se gata mai. Tenei toku igoa ka fakaigoa ei au ne tupulaga katoa fakamuli.

¹⁶Fano o fakamaopoopo a takitaki katoa o tino Isalaelu kae fai ki a latou i a Au, te Aliki, te Atua o olotou tupuga, te Atua o Apelaamo, Isaako mo Iakopo ne matea ne koe. Fai ki a latou i Au ne fanatu ki a latou kae ne lavea ne au a faiga a tino Aikupito ki a latou.

¹⁷Ko tonu i a Au i a latou ka taki keatea mai Aikupito, te koga tela e 'nofo pologa ei latou kae ka ave latou ki se koga maumea kae laukele ola, te fenua o tino Kanana, tino Heti, tino Amoli, tino Pelise, tino Hivi mo tino Iepuse.

¹⁸“Oku tino ka fakalogo atu ki a koe. I te taimi tena, e 'tau mo koe o olo fakatasi mo takitaki o Isalaelu ki te tupu o Aikupito kae fai atu penei ki a ia, ‘Te Aliki, te Atua o tino Epelu, ko oti ne fakaasi mai ki a matou. Fakasaoloto mai matou ke olo ki te vao, i aso e tolu, o avatu omotou taulaga ki te Aliki te motou Atua.’

¹⁹E iloa ne au me ka se mafai ne te tupu o Aikupito o fakasaoloto atu koutou ke olo, seiloga ke fai malo.

²⁰Kae ka fakaaoga toku malosi o fai mea fakama'taku ke fakasala i ei Aikupito. Ka oti aka mea kona, ko talia mai ei tino Isalaelu ke olo.

²¹“Ka fai ne au tino Aikupito ke a'lofa atu ki a koutou, ko te mea kafai ko olo oku tino, ke isi ne koloa e olo mo latou.

²²A fafine Isalaelu katoa ka olo atu ki tino Aikupito kola e tuakoi mo latou, mo so se fafine Aikupito e nofo i tona fale, o akai ki a latou ki ne gatu, mo mea faite ki aulo mo siliva. Ka fakapei a mea kona ne te kau Isalaelu ki olotou tamaliki tagata mo tamaliki fafine, kae ka olo latou mo te maumea o Aikupito.”