Read Te Tusi Tapu I Te Gana Tuvalu Lomiga Lua ESOTO 30 Bible Online

ESOTO 30 - Te Tusi Tapu I Te Gana Tuvalu Lomiga Lua bible

ESOTO 30

¹“Faite se fata-fai-taulaga ki laupapa o te lakau ko te akasia, mo sunu a taulaga manogi.

²E 'tau o pau lei a feitu e fa o te fata-fai-taulaga tena. E 45 senitimita te loa, 45 te lauefa kae e 90 te maluga. A nifo o ia kola e fa e 'tau o soko tasi mo te lakau tela e faite ei te foitino.

³Ufi te koga i luga, mo feitu katoa o ia e fa, pela foki mo nifo o ia ki te tina aulo, kae fakatamilo se laina aulo i ona kaokao.

⁴Faite ne ligi aulo e lua mo sau, kae fakapiki mai lalo ifo o te laina aulo i ona kaokao e lua, mo faulu a amo.

⁵Faite a amo konei ki te lakau ko te akasia, kae ufi ki te aulo.

⁶Ka oti ko tuku ei te fata-fai-taulaga mai tua o te laugatu pui tela e tautau i mua o te Pusa o te Feagaiga. Tena te koga ka fetaui ei au mo koe.

⁷I tafataeao katoa, kafai e vau Alona o fakatoka a moli, e 'tau mo ia o sunu ne taulaga manogi gali i luga i ei.

⁸E 'tau foki mo ia o fai te mea tena mafai e vau a ia o faka'ka moli i te afiafi. A te faiga o taulaga sunu konei e 'tau o fai faeloa i tupulaga katoa.

⁹E isi ne taulaga sunu kola e tapu; ke sa ofo atu i luga i te fata-fai-taulaga tenei, pela mo taulaga manu mo taulaga o mea o te laukele; kae sa 'ligi se taulaga uaina ki luga i ei.

¹⁰E 'tau mo Alona o fai se sauniga mo te faka'maga o te fata-fai-taulaga, e fakatasi i te tausaga. E 'tau mo Alona o nani a nifo o te fata-fai-taulaga ki te toto o te manu tela ko oti ne ta mo fai te taulaga mo te fakamagaloga o agasala. A te mea nei e 'tau o fai i tausaga katoa fakamuli. A te fata-fai-taulaga tenei e 'tau o faka'malu mo oku, ko te Aliki.”

¹¹Muna a te Aliki ki a Mose,

¹²“Kafai ko lau ne koe te aofaki o tino Isalaelu, e 'tau mo tagata takitokotasi o togi mai se lafoga mo tena ola, ko te mea ke seai se fakalavelave e oko ki tena olaga i te taimi e lau ei a tino.

¹³A tino katoa kola e aofia i te lauga tenei, e 'tau katoa o togi te aofaki tonu o tupe tela e manakogina. E 'tau katoa mo tino o togi te lafoga tenei ke fai pela me se taulaga ki a au.

¹⁴A tino katoa kola e aofia i te lauga tenei, tela ko tino kola ko katoa te luasefulu tausaga o fano ki luga, e 'tau katoa o togi mai ki a au a te aofaki tena.

¹⁵E se 'tau mo tino mau'mea o togi fakasilia, e se 'tau foki mo tino mativa o togi fakamu'tana, mafai ko togi ne latou te aofaki tenei mo olotou ola.

¹⁶Puke a tupe konei mai tino Isalaelu kae fakaaoga mo te tausiga o te Faleie tela e nofo ei au. A te lafoga tena ko te togi o olotou ola, ka masaua ei ne au o puipui latou.”

¹⁷Ne fai mai te Aliki ki a Mose,

¹⁸“Faite se pesini ki te palasi mo sena tulaga palasi, Ka oti ko tuku ei i te va o te Faleie o te Aliki mo te fata-fai-taulaga, kae fakafonu ki vai.

¹⁹A te vai tena i ei ka fakaaoga ne Alona mo ana tamaliki mo fulu olotou vae mo lima,

²⁰kae koi tuai o ulu ki loto i te Faleie o te Aliki, e pela foki mafai ka olo atu latou o ofo a taulaga meakai i te fata-fai-taulaga. Ka fai ne latou a te mea tena, ko se tamate ei latou.

²¹E 'tau mo latou o fulu olotou lima mo olotou vae, ke mo a latou e mate. Tena te fakatonuga e 'tau mo latou e pela foki mo olotou fanauga o tautali ki ei ki te se gata mai.”

²²Ne faipati mai te Aliki ki a Mose penei,

²³“Puke a mea fakamanogi gali eiloa — e ono kilokalame o te mulo, e tolu kilokalame o te kinamoni manogi gali, e tolu foki kilokalame o te lakau manogi e igoa ki te kani,

²⁴kae ono kilokalame o te kasia; ke fua katoa ki te mafa tela e talia i te tulafono. Fakaopoopo ki ei e fa lita o te sinu o te olive,

²⁵ko fai ei se sinu tapu, e palu pela me se sausau.

²⁶Fakaaoga te sinu tena o mili te Faleie o oku, mo te Pusa o te Feagaiga,

²⁷mo te taipola mo ana mea katoa, te tulaga‐moli mo ana mea katoa, te fata-fai-taulaga tela e fai ei taulaga sunu o mea manogi,

²⁸te fata-fai-taulaga tela e sunu ei taulaga mo ana mea katoa, e pela foki mo te pesini mo tena tulaga.

²⁹Tena te faiga e fakatapu ei a mea katoa kona, tela ko tapu katoatoa ei a mea kona, ka ko te tino e fakapatele ki ei ka pakia a ia i te mana o te fakatapuga tena ne fai ki mea kona.[26]

³⁰Ka oti aka, ko milimili ei Alona mo ana tama tagata, kae fakasopo ei latou mo fai a faitaulaga ke tavini mai ki a au.

³¹Fai atu ki tino Isalaelu penei, ‘A te sinu milimili malu tenei ke fakaaoga mo taku galuega, i taimi katoa fakamuli.

³²Ke sa ligi ki luga i so se tino, kae tapu foki e palu se sinu ke pau mo te sinu tenei. E tapu te sinu tenei, kae e 'tau eiloa o faka'malu ne koutou.

³³A te tino tela e palu ne ia se sinu ke pau mo te sinu tenei, io me fakaaoga ne ia te sinu tenei ki so se tino e se se faitaulaga, ka se taku a ia se tino o toku fenua.’ ”

³⁴Ne fai mai te Aliki ki a Mose penei, “Puke aka a mea fakamanogi konei, kae fua ke 'pau katoa — ko te sitate, te onika, te kalipanamu mo te tina pulu lipano.

³⁵Ke fakaaoga mo fai a taulaga o mea manogi, kae ke palu pela me se sausau. Fakaopoopo te masima ki ei ke tumau te ma kae manogi lei, kae ke 'malu foki.

³⁶Tukituki ne mea mai ei ko te mea ke liu pauta, ko ave ei ki loto i toku Faleie kae fakamata'tutu i mua o te Pusa o te Feagaiga. Ke faka'malu ne koutou te mea manogi tenei.

³⁷Sa fakaaoga ne koutou se palūga o so se mea manogi ke pau mo te mea nei. Ke faka'malu ne koutou te mea nei me ko oti ne fakatapu mai ki a au.

³⁸Kafai e isi se tino e fai ne ia te palūga tenei mo fai tena sausau, ka se taku a ia se tino o toku fenua.”