Read Te Tusi Tapu I Te Gana Tuvalu Lomiga Lua ESOTO 31 Bible Online

ESOTO 31 - Te Tusi Tapu I Te Gana Tuvalu Lomiga Lua bible

ESOTO 31

¹Ne fai mai te Aliki ki a Mose penei,

²“Ko oti ne fili ne au a Pesaleli, te tama tagata a Uli, kae ko te mokopuna o Hulo, mai te matakaiga o Iuta,

³kae ko oti ne faka'fonu ne au a ia ki toku mana. Ko oti ne tuku ne au ki ei te poto mo te atamai i te lomiga mo te faitega o fatagata —

⁴te fakatokaga o ata gali eiloa mo te faitega o fatagata kona ki aulo mo siliva mo palasi.

⁵E pela foki mo te katiga mo te fakatokaga o mea taulima aulo mo siliva; e pela foki mo te faitega o lakau ki fatagata ke oko eiloa ki galuega fakagaligali.

⁶Ko oti foki ne fili ne au a Oliapo te tama a Aisamako mai te matakaiga o Tanu, ke ga'lue mo ia. Ko oti foki ne ave ne au te atamai lasi ki nisi tufuga poto, ko te mea ke mafai ne latou o fai a mea katoa kola ne fakatonu atu ne au:

⁷ko te Faleie tela e nofo ei au, ko te Pusa o te Feagaiga mo tena pono, ko meafale katoa i loto i te Faleie,

⁸te taipola mo mea katoa i ei, ko te tulaga‐moli aulo mo mea katoa o ia, ko te fata-fai-taulaga mo sunu taulaga manogi,

⁹ko te fata-fai-taulaga mo taulaga sunu mo ana mea katoa, ko te pesini fulufulu mo tena tulaga,

¹⁰ko gatu tafasili i te gali mo Alona mo ana tama tagata mafai ko nofo i te tofi faitaulaga,

¹¹ko te sinu milimili tapu, mo te taulaga manogi lei, mo te Potu Tapu. Kafai ko faite a mea katoa konei, ke tau'tali katoa i te fakatonuga tela ko oti ne fai atu ne au.”

¹²Ne fakatonu atu te Aliki ki a Mose,

¹³ke fai atu ki tino Isalaelu penei, “Ke faka'malu ne koutou te Sapati, te aso malolo o oku, i te mea tena se fakailoga i toku va mo koutou, i taimi katoa fakamuli, e iloa ei i a au, te Aliki, ko oti ne fai ne au koutou mo oku tino tonu.

¹⁴E 'tau mo koutou o tausi te aso malolo tena, me se aso e tapu. A te tino e se tausi ki te Sapati, kae fai ana galuega i te aso tena, e 'tau o fakasala ki te mate.

¹⁵E ono aso e fai ei otou galuega, ka ko te fitu o aso se aso malolo kae malu tela e fakatapu mo oku. A te tino e galue i te aso tena e tamate.

¹⁶A tino Isalaelu ke tausi faka'lei ki te aso tenei ke fai mo fakailoga o te Feagaiga.

¹⁷A te mea tena se fakailoga tumau i toku va mo tino Isalaelu, me ne faite ne au a te lagi mo te lalolagi i aso e ono, kae i te fitu o aso ne gata taku galuega kae fakamanava ei au.”

¹⁸I te otiga ne faipati te Aliki ki a Mose i te mauga o Sinai, ne tuku ei ne ia papa fatu e lua kola e tu a tulafono ne tusi eiloa ne te Atua.