Read Te Tusi Tapu I Te Gana Tuvalu Lomiga Lua ESOTO 32 Bible Online

ESOTO 32 - Te Tusi Tapu I Te Gana Tuvalu Lomiga Lua bible

ESOTO 32

¹I te iloaga ne tino i a Mose seki fanaifo eiloa mai i te mauga, ne fakapotopoto latou ki a Alona kae fai atu ki a ia penei, “Ko se iloa ne matou me se a te mea ko tupu ki te tagata tenei ko Mose, tela ne taki mai ne ia tatou mai Aikupito; tela la, faite aka se atua[27] ke takitaki ne ia tatou.”

²Ne fai mai Alona ki a latou penei, “Tapale keatea a ligi aulo kola e mau i taliga o otou avaga, otou tama fafine, pela foki mo otou tama tagata, kae aumai ki a au.”

³Tela ne tapale ei ne tino olotou ligi kae ave ki a Alona.

⁴Ne puke Alona ki ligi kona, sunu ne ia ke vaivai, kae faite ne ia ki ei se pulumakau aulo. Ne fai aka a pati a tino Isalaelu penei, “Isalaelu, tenei te tou atua tela ne taki ne ia tatou keatea mai Aikupito!”

⁵Tela ne faite ei ne Alona te fata-fai-taulaga i mua o te pulumakau aulo, kae fai tena fakapulaga penei, “Taeao ka fai se kaiga fiafia e fakaaloalo ei te Aliki.”

⁶I te tafataeao malu eiloa o te sua aso, ne aumai ne latou ne manu ke sunu mo fai taulaga, ka ko nisi manu ke kai pela me ne taulaga fakafetai. Ne saga'saga tino ki lalo o fai te lotou 'kaiga, tela ne iku ki te konā valevale kae fai amioga se lei.

⁷Muna a te Aliki ki a Mose, “Vau o na fano ki lalo, i ou tino kola ne taki mai ne koe mai Aikupito, ko fai agasala kae teke mai ki a au.

⁸Ko oti ne tiaki ne latou te auala tela ne fakatonu atu ne au ke tau'tali latou i ei; ko oti ne faite ne latou se pulumakau ki te aulo, kae ko tapuaki kae ofo taulaga ki ei. E fai olotou pati me tenei te lotou atua tela ne taki ne ia latou mai Aikupito.

⁹E iloa ne au me ko oko eiloa te ma'keke o loto o tino konei.

¹⁰I te taimi nei, sa taumafai o taofi mai au. Au ko kaitaua ki a latou, kae ka ta fakapalele ne au latou. Ka ko koe mo tou gafa ka fai ne au mo malo takutakua.”

¹¹Ne fakamolemole malosi eiloa Mose ki te Aliki tena Atua kae fai atu penei, “Te Aliki, ai a ko ita katoa ei koe pena ki ou tino kola ne fakasao ne koe mai Aikupito ki tou mana mo tou malosi?

¹²Koe e manako ke fai aka tino Aikupito pela me ne 'taki mai fua ne koe ou tino ke ta fakapalele i te atu mauga? Sa ita; fuli ou mafaufauga kae sa fakaokogina te fakasalaga tena ki ou tino.

¹³Masaua au tavini ko Apelaamo, Isaako, mo Iakopo, Masaua te tautoga 'malu a koe ne fai mo latou, ke fai ne koe te lotou gafa ke pela mo te uke o fetu i te lagi, kae tuku ne koe ki a latou te fenua tela ne tauto ei koe ke fai mo latou ki te se gata mai.”

¹⁴Tela ne 'fuli ei te loto o te Aliki, kae ne seki fakaoko ei ne ia te fakasalaga tela ne mafaufau a ia ke fakaoko ki ona tino.

¹⁵Ne foki ifo a Mose mai te mauga mo papa fatu e lua kola e tusi ei a tulafono.

¹⁶Ko te Atua ne faite ne ia papa fatu kona e lua kae tusi foki ne ia a tulafono ki luga i ei.

¹⁷Ne lagona ne Iosua te ka'laga o tino, tela ne fai ake ei a ia ki a Mose penei, “E lagona ne au te leo o te taua i te koga e nofo ei 'tou tino.”

¹⁸Muna a Mose, “A te leo tena se, se leo o te manumalo io me se leo o te takavale; kae se leo o tino usu pese.”

¹⁹I te pili atuga o Mose ki te koga e nofo ei latou, ne matea ne ia te pulumakau mo tino e 'saka, tela ne kaitaua malosi eiloa a ia. Ne pei ne ia ki lalo a papa fatu i te tafito o te mauga tela ne ma'fa ei.

²⁰Ne puke ne ia te pulumakau tela ne faite ne latou, sunu ne ia ke liu suavai, tukituki ne ia ke pela me se pauta, kae palu mo te vai. Kae ne fainu ne ia ki ei a tino Isalaelu.

²¹Ne fai atu a ia ki a Alona, “Ne a mea a tino konei ne fai ki a koe, tela ko fai ei ne koe se mea e agasala masei ei latou?”

²²Ne tali atu a Alona penei, “Sa ita mai ki a au; e iloa loa ne koe te loto 'nau o tino konei o fia fai mea 'se.

²³Ne fai mai ki a au penei, ‘Ko se iloa nei ne matou me se a te mea ko tupu ki te tagata tenei ko Mose tela ne aumai ne ia tatou mai Aikupito; tela la, faite aka se atua ke taki ne ia matou.’

²⁴Ne fai au ke aumai olotou mea taulima aulo, a latou kola e isi ne olotou mea taulima aulo ne o'mai mo latou ki a au. Ne 'pei ne au a mea taulima aulo kona ki loto i te afi kae to mai ki tua ko te pulumakau aulo tena!”

²⁵Ko lavea ne Mose i a Alona ko tuku fua a tino ke agasala, kae fai latou pela me ne vale i mua o olotou fili.

²⁶Tela ne tu ei a Mose i te mataloa o te koga e nofo ei latou kae kalaga atu penei, “A latou katoa kola e kau i te Aliki ke o'mai katoa ki konei!” Ne o'mai katoa a tino o te itukaiga o Levi ki ona tafa,

²⁷kae fai atu a ia ki a latou, “A te Aliki te Atua o Isalaelu e fakatonu atu ki a koutou takitokotasi ke puke otou pelu kae ulu i loto i te koga e nofo ei a tino Isalaelu kae tamate otou taina, otou taugasoa mo otou tuakoi.”

²⁸Ne faka'logo a tino o te matakaiga o Levi ki te fakatonuga, tela ne tamate ne latou e tai tolu afe tagata i te aso tena.

²⁹Muna a Mose ki te kau Levi penei, “I te aso nei, i te tamatega ne koutou otou tama tagata[28] mo otou taina, tela ko fakatapu ei koutou ki te tofi o faitaulaga i te galuega a te Aliki; kae ko tuku atu foki ne te Aliki tena fakamanuiaga ki a koutou.”

³⁰I te sua aso, ne fai mai a Mose ki tino Isalaelu penei, “Ko oti ne fai ne koutou se agasala tafasili i te mataga. Kae nei ka toe foki atu au ki te Aliki i luga i te mauga. E se taumate kaati ka mafai ne au o maua se fakamagaloga mo otou agasala.”

³¹Ne foki atu Mose ki te Aliki kae fai atu penei, “Ko oti ne fai ne tino nei se agasala sili i te masei. Ne faite ne latou se atua ki aulo kae tapuaki ki ei.

³²Fakamolemole fakamagalo aka latou. Kafai se fakamagalo ne koe latou, ko 'solo aka la ei toku igoa i te tusi tela e tusi ei ne koe a igoa o tino o tou fenua.”

³³Ne tali mai te Aliki, “Ko latou kola ne agasala mai ki a au e solo olotou igoa i taku tusi.

³⁴Na vau o fano, o taki a tino ki te koga tela ne fai atu ei au. Masaua i taku agelu ka takitaki ne ia koe, e oko mai eiloa te taimi tela ka fakasala ei ne au a tino konei ona ko te lotou agasala.”

³⁵Tela, ne tuku ifo ne te Aliki te famai ki luga i tino, me ne fai ma'lo ne latou Alona ke faite te pulumakau aulo.