Read Te Tusi Tapu I Te Gana Tuvalu Lomiga Lua ESOTO 34 Bible Online

ESOTO 34 - Te Tusi Tapu I Te Gana Tuvalu Lomiga Lua bible

ESOTO 34

¹Ne fai mai a te Aliki ki a Mose, “Toe kati aka ne papa fatu e lua, e pela eiloa mo papa fatu mua kae ka tusi ne au ki ei a muna kola ne tusi i papa fatu mua kola ne foa ne koe.

²A koe ke toka i te tafataeao o te aso taeao o vau ki te Mauga o Sinai, ke fetaui taua i luga i te taulu.

³E seai se tino e olo ake mo koe; e tapu foki se tino e matea i so se koga o te mauga, e seai foki se mamoe me se pulumakau e matea ke kaikai i kautafa o te mauga.”

⁴Tela, toe kati ei ne Mose a papa fatu e lua, kae i te tafataeao o te sua aso ne ave ei ne ia ki luga i te Mauga o Sinai, e pela eiloa mo te fakatonuga a te Aliki.

⁵A te Aliki ne fanaifo i te kaumana, kae ne 'tu mo Mose i kona, taku atu ei ne ia a tena igoa tapu tela ko te Aliki.

⁶Ne fakasili atu a te Aliki i mua o ia kae kalaga atu penei, “Ko au ko te Aliki, ko te Atua tela e fonu i te alofa mo te kaimalie, e tuai o ita kae lasi tena alofa mo tena fakamaoni.

⁷E tausi ne au taku feagaiga i afe o tupulaga,[29] e fakamagalo fua ne au agasala mo amioga masei katoa; kae e fakasala eiloa ne au a olotou tama mo tama a olotou tama, ke oko eiloa ki te tolu mo te fa o tupulaga ona ko agasala a olotou matua.”

⁸Ne ifo fakavave a Mose kae tapuaki atu ki te Aliki.

⁹Ana muna, “Te Aliki, kafai e tonu eiloa e fiafia koe ki a au, e fakamolemole atu au ke olo fakatasi tatou. A tino konei ne tino loto ma'keke, fakamagalo mai omotou agasala mo omotou amioga masei, kae talia mai matou ke fai mo ou tino tonu.”

¹⁰Ne fai mai te Aliki ki a Mose penei, “Ko fai nei ne au se feagaiga mo tino Isalaelu. Ka fai foki ne au i olotou mata a mea lasi kola e seki fai lele eiloa i te lalolagi nei. Ka matea ne tino katoa a mea lasi konei e mafai o fai ne au ko te Aliki, me ka fai ne au se mea fakamataku e auala i a koe.

¹¹Tausi ki tulafono konei ne tuku atu ne au ki a koe i te aso nei. Ka afuli keatea ne au a tino Amoli, tino Kanana, tino Heti, tino Pelise, tino Hivi mo tino Iepuse mai ou mua.

¹²Sa fai se feagaiga mo tino o te fenua tenei e fano koe ki ei, i a koe ma fakatogafiti ei ne latou,

¹³E se tena fua te mea, kae ofa ki lalo a olotou fata-fai-taulaga, tuki foki ke ma'lepe a olotou pou tupua kae kati foki ki lalo a fakatusa o te lotou atua fafine ko Asaila.

¹⁴“Sa tapuaki ki se isi atua, me i a au te Aliki, e se talia eiloa ne au se vaega tapuakiga pena.

¹⁵Sa fai se feagaiga mo tino o te fenua tena, me kafai latou e tapuaki kae fai taulaga ki olotou atua fapaupau, ka kami koe ne latou ki olotou fakatasiga, ka fakaosoosogina ei koe o kai ki olotou meakai kola ne ofo atu ki olotou atua.

¹⁶Au tama tagata e iku o fai avaga ki fafine o fenua fakaatea konei, ka taki ei ne fafine konei au tama ke se fakamaoni mai ki a au, kae ke tapuaki atu ki olotou atua fapau'pau.

¹⁷“Sa faite ne atua fiti ke tapuaki koutou ki ei.

¹⁸“Tausi ki te 'Kaiga o Falaoa se Fakafete e pela eiloa mo te mea ne fakatonu atu ne au ki a koe; kai ki falaoa e se fakafete i aso e fitu o te masina o Apipa, me e tena te masina ne tiaki ei ne koutou te fenua o Aikupito.

¹⁹“A toekimua tagata a tino pela foki mo manu fagai e aku katoa,

²⁰kae e tau o sui ne koe a asini toekimua tagata takitasi ki se tamā mamoe ke fai i ei a te taulaga. Kafai e se sui ne koe ko fati la a te ua o te tamā asini ke mate. “E seai se tino e vau mai oku mua kae seai sena taulaga.

²¹“E ono aso e fai ei au galuega, ka ko te fitu o aso e seai eiloa sau galuega e fai i ei, e tusa eiloa me ko aso e fakamalu ei te laukele, io me ko aso e kati ei a saito.

²²“Tausi te Kaiga o te Katiga o Saito, mafai ko kamata o tau ne koe a fuaga muamua o au saito, tausi foki ki te Kaiga o Fale Fakamalumalu, i te taimi e luku ei fuaga o au lakau mafai ko oti te tau vela.

²³“E tolu taimi i te tausaga e o'mai ei koutou o tapuaki mai ki a au, te Aliki, te Atua o Isalaelu.

²⁴Kafai ko oti ne afuli ne au a malo keatea mai otou mua, kae fakalauefa atu foki mo tuakoi o te otou fenua, e seai eiloa se tino ka taumafai o puke ne ia a te otou fenua i taimi o Kaiga fiafia kona e tolu.

²⁵“Kafai e fai sau taulaga ki a au i se manu, mo a ma ofo fakatasi mai ne koe mo te falaoa tela ne palu ki te mea fakafete. Sa faka'toe foki ki te sua taeao se mea e tasi mai te foitino o te manu tena ne ta mo te Paseka.

²⁶ “I tausaga takitasi katoa, aumai ki te Fale o te Aliki a fuaga muamua o au saito kola ne kati ne koe. “Sa tunu eiloa ne koe se tamā mamoe, io me se tamā kouti ki vaiū o tena matua.”

²⁷Ne fai mai te Aliki ki a Mose penei, “Tusi ki lalo a muna konei, me ko muna eiloa konei e fakavae ei a taku feagaiga ki a koe mo te fenua ko Isalaelu.”

²⁸Ne nofo fakatasi a Mose mo te Aliki e fasefulu po e fasefulu ao, kae e se kai e se inu foki. Ka ko te Aliki ne tusi ne ia i luga o papa fatu a muna o te feagaiga, ko Tulafono e Sefulu.

²⁹I te taimi ne fanaifo ei a Mose mai te Mauga o Sinai, ne puke ifo ne ia a Tulafono e Sefulu, ka ko ona foliga ko maina eiloa fakaatea me ko oti te lua sautalaga mo te Aliki, kae e se iloa ne ia.

³⁰Ne kilo atu a Alona mo tino katoa ki a Mose, kae matea ne latou i ona mata ko maina, ko ma'taku ei latou o fakapilipili atu ki a ia.

³¹Ka ko Mose ne kalaga atu ki a latou, tena olo atu ei Alona mo takitaki katoa o te fenua, tela ne faipati mai ei a Mose ki a latou.

³²I te otiga o te mea tena, ko o'mai ei a tino katoa o Isalaelu ki a ia, tela tuku atu ei ne Mose ki a latou a tulafono katoa kola ne fai mai ne te Aliki i luga o te Mauga o Sinai.

³³I te otiga o Mose ne faipati ki a latou, ne pulou ei ne ia a ona mata ki te veli.

³⁴I so se taimi foki e fano ei a Mose ki te Faleie o te Aliki ke faipati laua mo te Aliki, e tapale keatea ne ia a te veli mai ona mata. Kafai ko vau ki tua ko taku atu ei ne ia ki tino Isalaelu a mea katoa kola ne fakatonu mai ne te Aliki ke fakaasi atu ne ia ki a latou,

³⁵tela ka matea ei ne tino te maina i mata o Mose. Ka oti ko toe pono ei ona mata ki te veli ke oko eiloa ki te sua taimi e toe fano ei o faipati mo te Aliki.