Read Te Tusi Tapu I Te Gana Tuvalu Lomiga Lua ESOTO 35 Bible Online

ESOTO 35 - Te Tusi Tapu I Te Gana Tuvalu Lomiga Lua bible

ESOTO 35

¹Ne kalaga atu a Mose ki tino katoa o Isalaelu, kae fai atu penei, “Tenei te mea ne fakatonu mai ne te Aliki ke fai ne koutou:

²E ono aso e fai ei otou galuega, ka ko te fitu o aso ke fakatapu, kae ke faka'malu mai foki ki a au, te Aliki, ke fai mo aso malolo. So se tino e fai ne ia se galuega i te aso tena, ka fakasala ki te mate.

³Sa faka'kagina se afi i loto i tou fale i te Sapati.”

⁴Ne fai atu a Mose ki tino katoa o Isalaelu penei, “Tenei te mea ne fakatonu mai ne te Aliki:

⁵Fai se taulaga ki te Aliki. A latou kola e fia fai taulaga ki te Aliki, ke aumai ne taulaga aulo, siliva mo palasi;

⁶laugatu lino gali, vulu lanu usi, lanu kulakula mo te kula; ke oko ki laugatu kola ne fai ki fulufulu o kouti;

⁷ko pakili o mamoe tagata kola ne vali ki te lanu kula; pakili manu malosi; mo te lakau ko te akasia;

⁸ko sinu e utu ei a moli; ko mea fakamanogi e palu ei te sinu tapu, ke oko foki ki mea manogi mo taulaga sunu;

⁹ko fatu kaneli mo nisi fatu foki pena kola ka fakamau ki te efota mo te ufi fatafata o te Faitaulaga Pule.

¹⁰“A tufuga poto katoa i a koutou e 'tau o o'mai o fai a mea kola ne fakatonu mai ne te Aliki ke fai:

¹¹ko te Faleie, tena pui i tua mo tena pui i loto, ko ana pine fakalava mo ana laupapa; ko ana lakau fakalava mo ana pou, ke oko foki eiloa ki tona fakavae katoa;

¹²ko te Pusa o te Feagaiga mo ana amo, tena pono mo te laugatu tela e ufi i ei;

¹³ko te taipola mo ana amo, ke oko ki ana mea katoa; e pela foki mo te falaoa tela e tuku sale i ei mo te Atua;

¹⁴ko te tulaga‐moli mo te moli mo ana mea katoa, ke oko ki mata moli mo olotou fagu sinu;

¹⁵ko te fata-fai-taulaga e sunu ei a taulaga manogi mo ana amo; ko te sinu tapu; ko taulaga manogi gali; ke oko ki te pui laugatu o te mataloa o te Faleie;

¹⁶ko te fata-fai-taulaga o taulaga sunu, mo tena mea valavala palasi, ke oko ki ana amo mo mea katoa; te pesini fano mo tena tulaga;

¹⁷ko pui laugatu mo te pui fakatamilo, e pela foki mo ana pou mo ana lagolago katoa; ko te pui laugatu o te mataloa o te pui fakatamilo;

¹⁸ko pine lakau mo lopu o te Faleie mo tena pui fakatamilo;

¹⁹ko gatu ma'lu o faitaulaga kola e pei ki ei mafai e fai olotou galuega i te Potu Tapu, ko gatu tapu kona mo Alona te faitaulaga ke oko foki eiloa ki ana tama tagata katoa.”

²⁰I te otiga ne faipati a Mose, ne 'foki atu a tino Isalaelu ki olotou faleie,

²¹ka ko latou kola ne manako o fai taulaga, ne ave olotou mea ki te Aliki mo faite tena Faleie. Ne o'mai latou mo mea kola e manakogina mo te tapuakiga, ke oko foki ki mea kola e fai ei a gatu o faitaulaga.

²²A latou kola e loto malie, i fafine mo tagata, ne o'mai mo pine fakagaligali, ligi taliga, mama, malele mo teuteu aulo katoa, kae ne fakatapu a mea katoa kona mo te Aliki.

²³A tino kola e isi ne olotu laugatu lino lei; vulu lanu usi, lanu kulakula mo te lanu kula; mo laugatu ne fai ki fulufulu o kouti; mo pakili mamoe kola ko oti ne fakalanu ke kula; io, me ko pakili manu malosi, ne aumai foki.

²⁴A tino katoa kola e mafai o fai meaalofa ki siliva mo palasi, ne aumai foki a olotou meaalofa kona mo te Aliki; a tino foki kola e isi ne olotou lakau ko akasia kola e mafai o fakaaoga i te galuega, ne o'mai foki mo latou.

²⁵A fafine poto i te faiga o filo, ne o'mai mo filo e faite ki te lino gali, mo filo mai te vulu lanu usi, lanu kulakula mo te lanu kula, kola ne faite eiloa ne latou.

²⁶Ne fai foki ne latou a filo mai fulufulu o kouti.

²⁷Ne aumai ne takitaki a fatu kaneli mo nisi fatu taua ake pena ke fakamau ki te efota tapu mo te ufi fatafata.

²⁸Ne o'mai foki mo mea manogi mo sinu mo te moli, mo te sinu tapu, e pela foki mo mea fakaauau manogi.

²⁹A tino Isalaelu kola e loto malie, ne aumai olotou taulaga ki te Aliki, mo fai te galuega tela ne fakatonu ne ia ki a Mose.

³⁰Ne fai mai a Mose ki tino o Isalaelu penei, “A te Aliki ko oti ne tofi ne ia a Pesaleli, te tama a Uli, kae ko te mokopuna o Hulo, mai i te matakaiga o Iuta.

³¹Ne tuku ne te Atua ki a ia te malosi,[30] mo te poto, mo te malamalama mo te apo i te faiga o so se ata e fai ei te galuega,

³²ke oko ki te lomiga mo te fuafuaga o ata, e pela foki mo te faitega o ata kona ki aulo, siliva mo palasi;

³³ke oko ki te katikatiga o fatu taua; mo te teuteuga fakagaligali o lakau, e pela foki ki so se teuteu fakagaligali o so se galuega.

³⁴Ko oti ne tuku atu ne te Aliki ki a ia mo Oliapo te tama a Aisamako mai te matakaiga o Tanu, te atamai o akoako atu o la poto ki nisi tino.

³⁵Ne tuku atu foki ne te Aliki ki a laua te poto i galuega e fai ki fatu, te tusiga o ata, lagaga o laugatu lino mo faiga o vulu lanu usi, lanu kulakula mo te lanu kula, e pela foki mo nisi itu kaiga laugatu fakaatea. A tino galue konei e poto i faiga o galuega katoa, ke oko foki eiloa ki te 'lomiga o ata.