Read Te Tusi Tapu I Te Gana Tuvalu Lomiga Lua ESOTO 36 Bible Online

ESOTO 36 - Te Tusi Tapu I Te Gana Tuvalu Lomiga Lua bible

ESOTO 36

¹“A Pesaleli mo Oliapo mo tino galue katoa kola ne tuku ne te Aliki ki ei te poto mo te malamalama, kola ko iloa ne latou o fai a mea katoa kola e manakogina mo te galuega, e tau mo latou o fai a mea katoa e pela eiloa mo te fakatonuga a te Aliki.”

²Ne kalaga atu a Mose ki a Pesaleli, Oliapo mo tino kola ne tuku atu ne te Aliki ki ei te poto, ke oko ki tino kola ne fia fesoasoani, kae ne fai ki ei a Mose ke kamata te galuega.

³Ne maua ne latou mai i a ia a meaalofa katoa a tino Isalaelu kola ne aumai mo te fakatuga o te Faleie Tapu. Ka ko tino Isalaelu e tumau eiloa te aumaiga o olotou meaalofa i taeao katoa ki a Mose.

⁴Ka ko tino poto kola e fai ne latou te galuega ne olo atu,

⁵o fakaasi ki a Mose penei, “A tino o te fenua ko silia atu a mea kola ne aumai ne latou i lo mea kola e manakogina ki te galuega, e pela mo te mea ne fakatonu mai ne te Aliki ke fai.”

⁶Tena la, ne ave ei te fakatonuga a Mose ki tino katoa, ke mo a se tino e toe fai ne ia se meaalofa mo te Faleie Tapu; tela seki toe fai meaalofa ei a tino ki te galuega.

⁷A mea katoa konei ko oti ne aumai ko silia valevale.

⁸A tino kola e sili atu i te poto i te kau galue, ko latou kona ne faite ne latou te Faleie o te Aliki. Ne fai ne latou te galuega mai laugatu lino e sefulu, kola ne laga fakatasi mo vulu lanu usi, lanu kulakula mo te kula, kae ne sui foki ki ei a ata o kelupi.

⁹A laugatu katoa konei e pau te lotou fua, e taki sefulu lua mita te loa kae lua mita te lauefa.

¹⁰Ne sui ne latou fakatasi a laugatu e lima ki te seti e tasi, ne fai foki ne latou pena a te sua lima.

¹¹Ne fai ne latou a pu fakalave ki te laugatu lanu usi i kapa o te laugatu tafa ki tua o seti takitasi.

¹²Ne fai ne latou a pu fakalave e limasefulu i te laugatu muamua o te seti muamua, kae limasefulu foki a pu fakalave ne fakasoa tonu ki ei i te toe laugatu o te lua o seti.

¹³Ne fai ne latou a pine aulo fakalave e limasefulu, ko te mea ke fakasoko ei a seti kola e lua ke fai mo seti e tasi.

¹⁴Ne fai ne latou a te ufi o te Faleie mai laugatu e sefulu tasi kola ne faite ki fulu o kouti.

¹⁵Ne fai ne latou a laugatu katoa kona ke tasi te lotou fua, e sefulu tolu mita te loa kae lua mita te lauefa.

¹⁶Ne sui fakatasi ne latou a laugatu e lima i te seti e tasi, kae ono laugatu o te sua seti.

¹⁷Ne fai ne latou a pu fakalave e limasefulu i kapa o te toe laugatu i te seti e tasi, kae limasefulu foki a pu fakalave i kapa o te laugatu o te sua seti.

¹⁸Ne fai ne latou a pine fakalave palasi e limasefulu ke fakasoko ei a seti konei e lua, ko te mea ke fai mo ufi e tasi.

¹⁹Ne toe fai ne latou a nisi ufi e lua, te ufi e tasi ne fai ki pakili o mamoe kola ne vali ki te kula, ka ko te sua mea ki pakili manu malosi, ko te mea ke fai mo ufi e tafa ki tua.

²⁰Ne fai ne latou a laupapa o te Faleie ki lakau o te akasia.

²¹A laupapa takitasi e taki fa mita te maluga, kae onosefulu ono senitimita te lauefa,

²²mo nifo fakalave e lua e fakafesagai tonu, ko te mea ke mau fakatasi a laupapa. A laupapa katoa konei e tofu eiloa mo nifo fakalave.

²³Ne fai ne latou a laupapa e luasefulu mo te feitu ki saute,

²⁴kae fasefulu a lagolago siliva e fakamau atu ki olotou feitu tafa ki lalo, e taki lua a lagolago i te laupapa e tasi, ko te mea ke fakalave ki ei a nifo e lua.

²⁵Ne fai ne latou a laupapa e luasefulu mo te feitu ki matu o te Faleie,

²⁶kae fasefulu lagolago siliva, e taki lua i lalo o te laupapa e tasi.

²⁷A te feitu ki tua o te Faleie, ko te feitu tena ki te togala, e ono a laupapa ne fai ne latou i ei,

²⁸kae e lua a laupapa mo matulimanu o te Faleie.

²⁹A laupapa konei i matulimanu e fakasoko ake eiloa mai i lalo ke oko ki luga. Ne fai foki pena te sua ava matulimanu.

³⁰Tela la, e valu a laupapa kae sefulu ono a lagolago siliva, e taki lua lagolago i te laupapa e tasi.

³¹Ne fai ne latou a lakau fakalave e sefulu lima mai i te lakau ko te akasia, e lima a lakau fakalave e taofi ei a laupapa i te feitu e tasi o te Faleie,

³²e lima foki mo te sua feitu, e lima foki mo te feitu ki te togala, ko te feitu tena ki tua.

³³A te lakau fakalava i te kogaloto, e fakamau i te kogaloto o te laupapa, mai i te sua mata o te Faleie ke oko eiloa ki te sua mata.

³⁴Ne ufi ne latou a laupapa ki aulo, kae ne fakamau foki ki ei a mama aulo, ke taofi ki ei a lakau fakalave kola ko oti foki ne ufi ki te aulo.

³⁵Ne fai ne latou a te pui laugatu ki te laugatu lino gali, tela ne laga tasi mo vulu lanu usi, lanu kulakula, mo te lanu kula, kae ne sui ki ei a ata o kelupi.

³⁶Ne fai ne latou a pou e fa ki te lakau ko te akasia, e fakatautau ei te pui laugatu kae ne ufi katoa foki ne latou ki aulo, ko fakamau ei ki ei a pine fakalave ne faite ki aulo. Ne fai foki ne latou a lagolago siliva e fa ke fakatu ki ei a pou.

³⁷A te pui laugatu o te mataloa ne fai ne latou mai i te laugatu lino gali, tela e laga tasi mo vulu lanu usi, lanu kulakula mo te kula, kae ne sui foki fakagaligali katoa.

³⁸Ne faite ne latou a pou e lima mo te pui laugatu tenei kae ne fakamau foki ne latou ki ei a pine fakalave, ne ufi foki ne latou a pou ki aulo, ne fai foki ne latou a tulaga palasi e lima ke fakatu ei a pou.