Read Te Tusi Tapu I Te Gana Tuvalu Lomiga Lua ESOTO 37 Bible Online

ESOTO 37 - Te Tusi Tapu I Te Gana Tuvalu Lomiga Lua bible

ESOTO 37

¹Ko Pesaleli ne faite ne ia a te Pusa o te Feagaiga ki laupapa o te akasia; a tena loa e 110 senitimita, tena lauefa e 66 senitimita mo tena maluga e 66 senitimita.

²Ne ufi ne ia a loto mo tua o te Pusa o te Feagaiga ki te tina aulo kae fai foki ne ia a te fusi aulo i kaugutu o te pusa.

³Ne faite foki ne ia a mama aulo e fa kae fakamau ki ona vae e fa, e taki lua i te feitu e tasi.

⁴Ne faite foki ne ia ne amo ki laupapa o te akasia kae ufi ne ia ki te aulo,

⁵faulu ei ki loto i mama aulo kola ne fakamau ki feitu takitasi o te pusa.

⁶Ne faite foki ne ia a te pono o te Pusa o te Feagaiga ki te tina aulo, e 110 senitimita tena loa kae 66 senitimita tena lauefa.

⁷Ne faite foki ne ia e lua kelupi ki te aulo tuki,

⁸e takitasi i feitu o te pono. Ne faite eiloa ne ia a manu kona ko te mea ke foliga mai pela eiloa me se mea e tasi o te pono.

⁹A kelupi konei e fakafesagai o la mata, mo la kapakau e fola tela ko ufi katoa ei te pono.

¹⁰Ne faite ne Pesaleli a te taipola ki laupapa o te akasia, a tena loa e 88 senitimita, a tena lauefa e 44 senitimita ka ko tena maluga e 66 senitimita.

¹¹Ne ufi ne ia a te taipola ki te tina aulo, kae sai fakatamilo ki ei te fusi aulo.

¹²Ne fai foki ne ia se patini i mata o te taipola, e 75 milimita tena lauefa e nikoi i kaugutu o te taipola kae fusi fakatamilo foki ne ia a te patini tena ki te aulo.

¹³Ne faite ne ia a mama aulo e fa kae fakamau ki tulimanu e fa o te taipola me ko koga kona e mau i ei ona vae.

¹⁴A mama e faulu ki ei a amo ne fakamau pili eiloa ki te patini i mata o te taipola, ko amo kona e amo ei te taipola.

¹⁵Ne faite ne ia a amo konei ki laupapa o te akasia kae ufi ne ia ki te aulo.

¹⁶Ne faite ne ia a mea tuku meakai ki te tina aulo mo te taipola: ko tifa, ko ipu, mo tia mo pola, ke fakaaoga mo tuku taulaga uaina.

¹⁷Ne faite ne ia a te tulaga‐moli ki te tina aulo. Ko tena foitino katoa ne faite ki te aulo ne tuki; ko ana pula fakagaligali, e aofia i ei a moe mo lau, ko pela me se mea e tasi o tena foitino.

¹⁸E ono ana kaula, e taki tolu i te feitu e tasi.

¹⁹A kaula e ono, e tofu katoa mo pula fakagaligali e taki tolu kae pela eiloa mo pula o te lakau ko te alamoni i olotou moe mo lau.

²⁰E fa foki a pula fakagaligali i te foitino o te tulaga‐moli kola ne faite ne ia ke pela eiloa mo pula o te alamoni i olotou moe mo lau.

²¹E tofu eiloa a kaula taki lua mo te ponaga.

²²A moe, kaula, mo te tulaga moli e tasi eiloa te lotou foitino tela ne faite ki te tina aulo ne tuki.

²³E fitu foki a moli ne faite ne ia mo te tulaga‐moli, kae ne faite foki ne ia ona sikofi mo telē ki te tina aulo.

²⁴E tolu sefulu lima kilokalame o te tina aulo ne fakaaoga ne ia i te faitega o te tulaga‐moli mo ona mea katoa.

²⁵Ne faite ne Pesaleli a te fata-fai-taulaga ki laupapa o te akasia, e sunu i ei a taulaga manogi. E fakatafa te fata-fai-taulaga, me e fa sefulu lima senitimita tena loa kae fa sefulu lima foki senitimita tena lauefa, mo tena maluga e iva sefulu senitimita. A nifo i ona matulimanu e fa ne faite eiloa ke foitino tasi mo te fata-fai-taulaga.

²⁶Ne ufi ne ia a luga o te fata-fai-taulaga mo ona feitu katoa, fakatasi mo ana nifo ki te tina aulo, kae ne fakagaligali ne ia ki te fusi aulo e fakatamilo i ei.

²⁷Ne faite foki ne ia a mama aulo e lua mo amo a te fata-fai-taulaga kae ne fakamau ne ia i feitu takitasi o te fata-fai-taulaga mai lalo o te fusi aulo.

²⁸Ne faite foki ne ia ne amo ki laupapa o te akasia kae ufi ne ia ki te aulo.

²⁹Ne faite foki ne ia a te sinu tapu mo mea manogi lei, kae ne palu ne ia ke manogi pela mo te sausau.