Read Te Tusi Tapu I Te Gana Tuvalu Lomiga Lua ESOTO 38 Bible Online

ESOTO 38 - Te Tusi Tapu I Te Gana Tuvalu Lomiga Lua bible

ESOTO 38

¹Ne faite ne Pesaleli te fata-fai-taulaga ki laupapa o te akasia mo te faiga o taulaga sunu. A te fata-fai-taulaga e pau lei ona feitu e fa me e lua tesimale lua mita tena loa kae lua tesimale lua mita foki tena lauefa, ka ko tena maluga e tasi tesimale tolu mita.

²Ne fai foki ne ia a ona nifo i luga i tulimanu e fa ko te mea ke foitino tasi mo te fata-fai-taulaga. Ne ufi katoa ne ia a te fata-fai-taulaga ki te palasi.

³Ne faite foki ne ia a mea katoa o te fata-fai-taulaga: ko ulo, ko sevolo, ko pola, ko pine fakalave mo mea tali lefu ei. Ko mea fai galuega katoa konei ne faite eiloa ki te palasi.

⁴Ne faite foki ne ia se mea valavala palasi kae ne fakamau mai lalo o kaugutu o te fata-fai-taulaga, ko te mea ke nofo tonu i te kogaloto.

⁵Ne faite ne ia a mama sau e fa mo te mea valavala kae fakamau ne ia i luga o tulimanu e fa.

⁶Ne fai foki ne ia ne amo laupapa ki te lakau ko te akasia kae ufi ne ia ki te palasi,

⁷kae faulu ne ia a amo ki mama sau i feitu takitasi o te fata-fai-taulaga. A te fata-fai-taulaga ne faite eiloa ki laupapa kae anaana te koga i loto.

⁸Ne faite ne Pesaleli a te pesini palasi mo tena tulaga palasi ki kilo a fafine kola e tavini i te mataloa o te Faleie o te Aliki.

⁹Ne faite ne ia a te pui fakatamilo o te Faleie o te Aliki ki laugatu lino gali. I tena feitu ki saute, a pui laugatu e taki fa sefulu fa mita te loa,

¹⁰e tautau i pou palasi e luasefulu kola e fakatu ki tulaga palasi e luasefulu, mo pine fakalave e faite ki siliva, e pena foki ana talava.

¹¹A te pui ki te feitu ki matu e pau eiloa mo te feitu tenei.

¹²I te feitu ki te togala, a pui laugatu e taki luasefulu lua mita te loa, mo ona pou e sefulu e mau i olotou tulaga e sefulu, fakatasi mo pine fakalave mo talava e faite ki siliva.

¹³I te feitu ki te saegala, tela e tu i ei a te mataloa, a te pui loto i ei e luasefulu lua foki a mita te lauefa.

¹⁴I feitu takitasi o te mataloa e isi a pui laugatu e taki ono tesimale ono mita, mo pou e tolu mo olotou tulaga e tolu.

¹⁶A pui laugatu katoa kola e fakatamilo i te pui ne faite katoa mai laugatu lino.

¹⁷A tulaga o pou ne faite ki te palasi, ka ko pine fakalave mo talava, mo ufi o ulupou o pou ne faite ki te siliva. Ko pou fakatamilo katoa o te pui loto e fakasoko katoa ki talava siliva.

¹⁸Ko te laugatu pui o te mataloa o te pui fakatamilo ne faite ki laugatu lino gali tela ne laga ki vulu lanu usi, lanu kulakula, mo te kula kae ne teu ki suisuiga fakagaligali. E iva mita tena loa kae lua mita tena maluga, e pela eiloa mo laugatu o te pui fakatamilo.

¹⁹A te pui laugatu tenei e tautau ki pou e fa kola e mau i olotou tulaga palasi e fa. Olotou pine fakalave, mo ufi o ulupou, mo olotou talava ne faite katoa ki siliva.

²⁰A pine fakamau katoa o te Faleie fakatasi mo pine fakalave o te pui loto ne faite katoa ki te palasi.

²¹Tenei te fakasologa o te aofaki o vaega fiti ne fakaaoga i te faitega o te Faleie o te Aliki, te koga tela e tausi i ei a papa fatu e lua kola e tusi i ei a Tulafono e Sefulu. Ne fakatonu ne Mose ke fakamau a te fakasologa o mea konei kae ne tusi ne te matakaiga o Levi kola ne galue mai lalo o te takitakiga a Itamala, te tamaliki tagata a Alona, te faitaulaga.

²²A mea katoa kola ne fakatonugina ne te Aliki ke fai, ne fai katoa ne Pesaleli te tamaliki tagata a Uli, kae ko te mokopuna o Hulo mai te matakaiga o Iuta.

²³A tena fesoasoani tela ko Oliapo, te tamaliki tagata a Aisamako mai i te matakaiga o Tanu, se tufuga poto i te ta fatagata, lomi ata, kae se tagata poto foki i te laga o laugatu ki vulu lanu usi, kulakula mo te kula.

²⁴A te mafa o te aulo katoa tela ne fakatapu mo te Aliki mo fai tena Faleie tapu e tusa mo te afe kilokalame, kae ne fua eiloa ki te fua faka‐te‐malo i aso kona.

²⁵Ko te mafa o te siliva tela ne maua mai i te lauga o tino o te fenua e tusa mo te 3,430 kilokalame, kae ne fua eiloa ki te fua faka te malo i aso kona.

²⁶A mea konei ko te aofaki katoa tela ne togi ne tino katoa kola ne tusi a igoa o latou i te lauga o tino, kae ko te tino tokotasi ne togi eiloa ne ia a te aofaki ne manakogina, kae ne fua eiloa ki te fua faka‐te‐malo i aso kona. E tusa mo te 603,550 a tagata ko taki luasefulu tausaga io me matua atu ne tusi a igoa o latou i te lauga o tino.

²⁷I te siliva eiloa, e 3,400 kilokalame ne fakaaoga mo te faitega o te selau tulaga siliva o te Faleie tapu, e pela foki mo te pui laugatu, kae e 34 kilokalame ne fakaaoga mo te faitega o tulaga takitasi.

²⁸A te tolusefulu kilokalame tela ne toe, ne fakaaoga ne Pesaleli mo te faitega o talava mo laugatu pui mo pine fakalave mo pou, mo ufi o ulupou.

²⁹Kae tusa mo te 2,425 kilokalame o te palasi ne fakatapu mo te Aliki.

³⁰Mai te vaega fiti tenei, ne faite ei ne Pesaleli a tulaga o pou o te mataloa o te Faleie o te Aliki; te fata-fai-taulaga palasi mo tena mea valavala palasi, mo mea katoa o te fata-fai-taulaga,

³¹pela foki mo tulaga o te pui fakatamilo mo tulaga o te mataloa o te pui fakatamilo, mo pine fakamau o te Faleie fakatasi mo pine fakamau o te pui fakatamilo.